masthmagaa.com:
ಇಸ್ರೇಲ್ನಲ್ಲಿ ಸರ್ಕಾರ ಬದಲಾಗ್ತಿದ್ದಂತೆ ಪಕ್ಕದ ಗಾಜಾ ಜೊತೆಗೆ ಮತ್ತೊಂದು ಹಂತದ ಸಂಘರ್ಷ ಶುರುವಾಗಿದೆ. ಗಾಜಾ ಕಡೆಯಿಂದ ಹಮಾಸ್ ಪಡೆ ನಿರಂತರವಾಗಿ ಸ್ಪೋಟಕ ತುಂಬಿದ ಬಲೂನುಗಳನ್ನು ಇಸ್ರೇಲ್ ಕಡೆಗೆ ಕಳುಹಿಸ್ತಿದ್ದು, ಇದಕ್ಕೆ ಪ್ರತಿಯಾಗಿ ಇಸ್ರೇಲ್ ಮತ್ತೆ ಗಾಜಾ ಮೇಲೆ ಏರ್ಸ್ಟ್ರೈಕ್ ನಡೆಸಿದೆ. ಈ ಮೂಲಕ 3 ದಿನಗಳಲ್ಲಿ ಎರಡೆರಡು ಬಾರಿ ಕದನ ವಿರಾಮ ಉಲ್ಲಂಘಿಸಿದಂತಾಗಿದೆ. ಇಸ್ರೇಲ್ ಏರ್ಸ್ಟ್ರೈಕ್ನಿಂದ ಯಾವುದೇ ಹಾನಿ ಕುರಿತು ಇನ್ನೂ ವರದಿಯಾಗಿಲ್ಲ. ಆದ್ರೆ ಇಡೀ ಗಾಜಾ ಸಿಟಿಗೆ ಈ ದಾಳಿಯ ಶಬ್ದ ಕೇಳಿಸಿದೆ. ಅಷ್ಟು ದೊಡ್ಡದಾಗಿತ್ತು ಏರ್ಸ್ಟ್ರೈಕ್. ಹಮಾಸ್ನ ಮಿಲಿಟರಿ ಕಾಂಪೌಂಡ್, ರಾಕೆಟ್ ಲಾಂಚ್ ಸೈಟ್ ಗುರಿಯಾಗಿಸಿ ದಾಳಿ ನಡೆಸಲಾಗಿದೆ. ಗಾಜಾ ಕಡೆಯಿಂದ ನಿರಂತರವಾಗಿ ಸ್ಫೋಟಕ ಹೊತ್ತ ಬಲೂನ್ಗಳು ಬರ್ತಿವೆ. ಅದಕ್ಕೆ ಪ್ರತಿಯಾಗಿ ಈ ದಾಳಿ ನಡೆಸಿದ್ದೀವಿ ಅಂತ ಇಸ್ರೇಲ್ ಸೇನೆ ತಿಳಿಸಿದೆ. ಮೊನ್ನೆ ಬೆಳಗ್ಗೆ ಕೂಡ ಇಸ್ರೇಲ್ ರಾಕೆಟ್ ದಾಳಿ ನಡೆಸಿದ್ದು, ಅದ್ರಲ್ಲೂ ಯಾರಿಗೂ ಏನೂ ಹಾನಿ ಆಗಿರಲಿಲ್ಲ. ಅಂದಹಾಗೆ ಮೊನ್ನೆ ಜೆರುಸಲೆಂನಲ್ಲಿ ಯಹೂದಿಗಳು ಮೆರವಣಿಗೆ ನಡೆಸಿದ್ದಕ್ಕೆ ವಿರೋಧ ವ್ಯಕ್ತಪಡಿಸಿ ಹಮಾಸ್ ಈ ರೀತಿ ಸ್ಪೋಟಕ ತುಂಬಿದ ಬಲೂನ್ ಕಳುಹಿಸಿತ್ತು. ಅದಕ್ಕೆ ಇಸ್ರೇಲ್ ರಾಕೆಟ್ ದಾಳಿ ನಡೆಸಿತ್ತು. ಇದ್ರ ಬೆನ್ನಲ್ಲೇ ಪೂರ್ವ ಜೆರುಸಲೆಂನ ಶೇಖ್ ಜಾರಾದಲ್ಲಿ ಯಹೂದಿಯವರು ನೆಲೆಸುತ್ತಿದ್ದು, ಅದ್ರ ವಿರುದ್ಧ ಪ್ಯಾಲೆಸ್ತೇನಿಯರು ಪ್ರತಿಭಟನಾ ಮೆರವಣಿಗೆ ನಡೆಸಿದ್ದಾರೆ. ಈ ವೇಳೆ ಅವರನ್ನು ತಡೆಯೋಕೆ ಪೊಲೀಸರು ಜಲಫಿರಂಗಿ ಮತ್ತು ಸ್ಟನ್ ಗ್ರನೇಡ್ಗಳನ್ನು ಬಳಸಿದ್ದಾರೆ. ನಂತರ ಪ್ಯಾಲೆಸ್ತೇನಿಯರು ಯಹೂದಿಗಳ ಮೇಲೆ ಕಲ್ಲು, ನೀರಿನ ಬಾಟಲಿ ಎಸೆಯೋಕೆ ಶುರು ಮಾಡಿದ್ದಾರೆ. ಈ ವೇಳೆ ಪೊಲೀಸರ ಕ್ರಮಕ್ಕೆ ಹಲವು ಪ್ಯಾಲೆಸ್ತೇನಿಯರು ಗಾಯಗೊಂಡಿದ್ದಾರೆ. ಇದ್ರ ಬೆನ್ನಲ್ಲೇ ಮತ್ತಷ್ಟು ಸ್ಪೋಟಕ ಹೊತ್ತ ಬಲೂನ್ಗಳನ್ನು ಕಳುಹಿಸಿದೆ ಹಮಾಸ್..
ಇನ್ನೊಂದು ವಿಚಾರ ಅಂದ್ರೆ ಇಸ್ರೇಲ್ ಕಡೆಯಿಂದ ಈಗ ಏರ್ಸ್ಟ್ರೈಕ್ ನಡೆಸಿರೋ ತಂಡದಲ್ಲಿ ಭಾರತ ಮೂಲದ 20 ವರ್ಷದ ನಿತ್ಶಾ ಮುಲಿಯಶ ಕೂಡ ಸೇರಿದ್ದಾರೆ. ಇವರು ಇಸ್ರೇಲ್ ಡಿಫೆನ್ಸ್ ಫೋರ್ಸ್ನಲ್ಲಿ ಕೆಲಸ ಮಾಡ್ತಿದ್ದು, ಗುಜರಾತ್ನ ರಾಜ್ಕೋಟ್ ಮೂಲದವರಾಗಿದ್ದಾರೆ. ಇವರು ಇಸ್ರೇಲ್ನ ವಾಣಿಜ್ಯ ನಗರಿ ಟೆಲ್ ಅವೀವ್ನಲ್ಲಿ ನೆಲೆಸಿದ್ದು, ಇಸ್ರೇಲ್ ಸೇನೆ ಸೇರಿರೋ ಮೊದಲ ಗುಜರಾತಿ ಹುಡುಗಿಯಾಗಿದ್ದಾರೆ. ಅವರು ಮಾತ್ರ ಅಲ್ಲ.. ಅವರ ತಂಗಿ 18 ವರ್ಷದ ರಿಯಾ ಕೂಡ ಇದೇ ವರ್ಷ ಸೇನೆ ಸೇರಿದ್ದಾರೆ. ಅಂದಹಾಗೆ ಇಸ್ರೇಲ್ನಲ್ಲಿ ಮಿಲಿಟರಿ ಶಿಕ್ಷಣ ಎಲ್ಲರಿಗೂ ಕಡ್ಡಾಯ. ಸುತ್ತಲೂ ಶತ್ರುಗಳು ತುಂಬಿರೋ ಕಾರಣ 18 ವರ್ಷ ಮೇಲ್ಪಟ್ಟ ಎಲ್ಲರಿಗೂ ಮಿಲಿಟರಿ ಶಿಕ್ಷಣ ನೀಡಲಾಗುತ್ತೆ.
-masthmagaa.com
Contact Us for Advertisement