masthmagaa.com:
ನಟ ಜಗ್ಗೇಶ್ ಮತ್ತು ದರ್ಶನ್ ಅಭಿಮಾನಿಗಳ ನಡುವಿನ ಸಂಘರ್ಷಕ್ಕೆ ಸಂಬಂಧಿಸಿದಂತೆ ನಟ ಜಗ್ಗೇಶ್ ಇವತ್ತು ಮತ್ತೆ ಸುದ್ದಿಗೋಷ್ಠಿ ನಡೆಸಿ ಒಂದಷ್ಟು ಸ್ಪಷ್ಟನೆ ಕೊಡೋ ಪ್ರಯತ್ನ ಮಾಡಿದ್ದಾರೆ. ಹಿಂದೆ ದರ್ಶನ್ಗೆ ಕಷ್ಟ ಬಂದಾಗ ನಾನೇ ಅವರ ಜೊತೆ ನಿಂತಿದ್ದು. ಅದನ್ನೆಲ್ಲಾ ಈಗ ಮರೆತಿದ್ದಾರೆ. ತಮ್ಮ ಅಭಿಮಾನಿಗಳು ಮೊನ್ನೆ ನನಗೆ ಅಡ್ಡಹಾಕಿ ಗಲಾಟೆ ಮಾಡಿದಾಗ ದರ್ಶನ್ ಕಾಲ್ ಮಾಡಬೇಕಿತ್ತು, ಆದ್ರೆ ಮಾಡಲಿಲ್ಲ. ಅಲ್ಲದೆ ರಾಮನಗರದ ಸರ್ಕಲ್ನಲ್ಲೇ ನನಗೆ ಅಡ್ಡಹಾಕಿ ದೊಡ್ಡ ಮಟ್ಟದಲ್ಲಿ ಅವಮಾನ ಮಾಡುವ ಹುನ್ನಾರ ನಡೆಸಲಾಗಿತ್ತು ಅಂತೆಲ್ಲಾ ಹೇಳಿದ್ದಾರೆ.
ನಟ ಜಗ್ಗೇಶ್ ಹೇಳಿದ್ದೇನು..?
ದರ್ಶನ್ ನಮ್ಮ ಹುಡುಗ. ಅವನನ್ನ ಇವತ್ತು, ಮುಂದೆ, ಯಾವತ್ತೂ ಕೂಡ ಪ್ರೀತಿಸ್ತೀನಿ. ನನ್ನ ಒಂದು ಪ್ರಶ್ನೆಗೆ ದರ್ಶನ್ ಅಭಿಮಾನಿಗಳು ಎದೆ ಮುಟ್ಟಿಕೊಂಡು ಉತ್ತರ ಕೊಡಲಿ. ಒಂದಿನ ಪೊಲೀಸರು ದರ್ಶನ್ಗೆ ಚಪ್ಪಲಿ ಇಲ್ಲದೆ ಬರಿಗಾಲಿನಲ್ಲಿ ಸಣ್ಣ ನಟಿಯೊಬ್ಬರ ಮನೆಯಲ್ಲಿ ನಿಲ್ಲಿಸಿದ್ರು, ಕೂಡಿ ಹಾಕಿದ್ರು. ಆಗ ದರ್ಶನ್ ಪರವಾಗಿ ನಿಂತಿದ್ದು ನಾನು. ಹೋಂ ಮಿನಿಸ್ಟರ್, ಡಿಸಿಪಿಗೆ ಕಾಲ್ ಮಾಡಿ ದರ್ಶನ್ ಬಿಡುಗಡೆಗೆ ಮಾಡುವಂತೆ ಹೇಳಿದ್ದೆ. ನಾನ್ ಆಗ ಮಾಡಿದ್ದು ಯಾರಿಗೂ ನೆನಪಿಲ್ವಾ? ದರ್ಶನ್ ಕನ್ನಡದ ರಜನಿಕಾಂತ್, ಸಲ್ಮಾನ್ ಖಾನ್ ಅಂತ ಕರೆದಿದ್ದೆ. ಅವತ್ತು ಯಾರೂ ಕೇಳಲಿಲ್ಲ. ಆದ್ರೆ ದರ್ಶನ್ ಅಭಿಮಾನಿಗಳು ಮೊನ್ನೆ ಗಲಾಟೆ ಮಾಡಿದಾಗ ದರ್ಶನ್ ಅವರಿಗೆ ಕಾಲ್ ಮಾಡಿ ಏನಂತ ಕೇಳಬೇಕಿತ್ತು. ನನಗೂ ಕಾಲ್ ಮಾಡಬೇಕಿತ್ತು. ನನ್ ಹೆಂಡ್ತಿ ನಂಗೆ ಕೇಳ್ತಿದ್ದಾಳೆ ಯಾಕೆ ದರ್ಶನ್ ಕಾಲ್ ಮಾಡಿಲ್ವಾ ಅಂತ. ದರ್ಶನ್ ಅಪಘಾತದಲ್ಲಿ ಗಾಯಗೊಂಡಾಗ ನಾನು ಅವನಿಗೆ ಕಾಲ್ ಮಾಡಿ ವಿಚಾರಿಸಿದ್ದೆ. ನನ್ನ ದೌರ್ಭಾಗ್ಯ ಮೊನ್ನೆ ನಡೆದ ಘಟನೆ ಬಳಿಕ ದರ್ಶನ್ ಕಾಲ್ ಮಾಡಿಲ್ಲ. ದರ್ಶನ್ ಜೊತೆ ದಿನನಿತ್ಯ ಇರೋರೆ ಮೊನ್ನೆ ಬಂದು ಗಲಾಟೆ ಮಾಡಿದ್ದು. ನನ್ನ ಚಲನವಲನದ ಮೇಲೆ ಕಣ್ಣಿಡಲಾಗ್ತಿತ್ತು. ಈ ಹುನ್ನಾರ ರಾಮನಗರದ ಸರ್ಕಲ್ನಲ್ಲಿ ನಡೆಯಬೇಕಿತ್ತು. ರಾಮನಗರ ಸರ್ಕಲ್ನಲ್ಲಿ ಹೀಗೆ ಅಡ್ಡಹಾಕಿ ಗಲಾಟೆ ಮಾಡಿದ್ರೆ ಟ್ರಾಫಿಕ್ ಜಾಮ್ ಆಗಿ ಎಲ್ಲರಿಗೂ ವಿಚಾರ ಗೊತ್ತಾಗುತ್ತೆ. ಎಲ್ಲರ ಮುಂದೆ ಜಗ್ಗೇಶ್ ಮಾನ ಹರಾಜು ಹಾಕಿದಂತೆ ಆಗುತ್ತೆ ಅಂತ ಹುನ್ನಾರ ನಡೆಸಿದ್ರು.
-masthmagaa.com
Contact Us for Advertisement