masthmagaa.com:
ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಜಪೂತ್ ಸಾವಿನ ಪ್ರಕರಣ ದಿನಕ್ಕೊಂದು ತಿರುವು ಪಡೆಯುತ್ತಿದೆ. ಇದೀಗ ಸುಶಾಂತ್ ಅವರ ಗೆಳತಿ ರಿಹಾ ಚಕ್ರಬರ್ತಿಗೆ ಡ್ರಗ್ ಡೀಲರ್ಗಳ ಜೊತೆ ಸಂಪರ್ಕ ಇತ್ತು ಎಂಬ ವಿಚಾರ ಬಾಲಿವುಡ್ನಲ್ಲಿ ದೊಡ್ಡ ಕೋಲಾಹಲ ಎಬ್ಬಿಸಿದೆ. ಇದರ ಬೆನ್ನಲ್ಲೇ ಸುಶಾಂತ್ ಪ್ರಕರಣದಲ್ಲಿ ಡ್ರಗ್ ವಿಚಾರ ಕುರಿತು ತನಿಖೆ ನಡೆಸಲು ನಾರ್ಕೊಟಿಕ್ಸ್ ಕಂಟ್ರೋಲ್ ಬ್ಯುರೋ (NCB) ಅಧಿಕಾರಿಗಳ ತಂಡ ದೆಹಲಿಯಿಂದ ಮುಂಬೈಗೆ ಹೊರಟಿದೆ.
ಮುಂಬೈನಲ್ಲಿರುವ ಡ್ರಗ್ ಪೆಡ್ಲರ್ಗಳ ಜಾಲದ ಕುರಿತು ತನಿಖೆ ಶುರು ಮಾಡಲು ಮುಂಬೈನಲ್ಲಿರುವ ಎನ್ಸಿಬಿ ತಂಡಕ್ಕೆ ಈಗಾಗಲೇ ಸೂಚಿಸಲಾಗಿದೆ. ಜೊತೆಗೆ ಬಾಲಿವುಡ್ನಲ್ಲಿ ಆ್ಯಕ್ಟಿವ್ ಆಗಿರುವ ಡ್ರಗ್ ಜಾಲದ ಮೇಲೂ ಕಣ್ಣಿಡುವಂತೆ ಸೂಚಿಸಲಾಗಿದೆ ಅಂತ ನಾರ್ಕೊಟಿಕ್ಸ್ ಕಂಟ್ರೋಲ್ ಬ್ಯುರೋ ತಿಳಿಸಿದೆ. ಶೀಘ್ರದಲ್ಲೇ ರಿಹಾ ಚಕ್ರಬರ್ತಿಗೆ NCB ಸಮನ್ಸ್ ಜಾರಿ ಮಾಡುವ ಸಾಧ್ಯತೆ ಇದೆ.
ಇನ್ನು ರಿಹಾ ಚಕ್ರಬರ್ತಿಗೆ ಡ್ರಗ್ ಡೀಲರ್ಗಳ ಜೊತೆ ಸಂಪರ್ಕ ಇತ್ತು ಎಂಬ ವಿಚಾರ ಬೆಳಕಿಗೆ ಬರ್ತಿದ್ದಂತೇ ಸುಶಾಂತ್ ಅವರ ತಂದೆ ಕೆ.ಕೆ. ಸಿಂಗ್ ‘ರಿಹಾ ಚಕ್ರಬರ್ತಿ ಕೊಲೆಗಾತಿ. ಆಕೆ ನನ್ನ ಮಗನಿಗೆ ಸಾಕಷ್ಟು ಸಮಯದಿಂದ ವಿಷ ಕೊಡುತ್ತಿದ್ದಳು. ಹೀಗಾಗಿ ಆಕೆ ಮತ್ತು ಆಕೆಯ ಸಹಚರರನ್ನು ಅರೆಸ್ಟ್ ಮಾಡಬೇಕು’ ಅಂತ ಹೇಳಿದ್ದಾರೆ.
ಮತ್ತೊಂದುಕಡೆ ರಿಹಾ ಚಕ್ರಬರ್ತಿಯ ಸಹೋದರ ಶೌವಿಕ್ ಚಕ್ರಬರ್ತಿ ಮತ್ತು ಸುಶಾಂತ್ ಅವರ ಸ್ನೇಹಿತ ಸಿದ್ಧಾರ್ಥ್ ಪಿಠಾಣಿಯನ್ನು ಸಿಬಿಐ ಅಧಿಕಾರಿಗಳು ಮುಂಬೈನ DRDO ಗೆಸ್ಟ್ ಹೌಸ್ನಲ್ಲಿ ವಿಚಾರಣೆಗೆ ಒಳಪಡಿಸಿದ್ದಾರೆ. ಇಡಿ ಅಧಿಕಾರಿಗಳು ರಿಹಾ ಚಕ್ರಬರ್ತಿಯ ತಂದೆ ಇಂದ್ರಜಿತ್ ಚಕ್ರಬರ್ತಿಗೆ ಡ್ರಿಲ್ ಮಾಡ್ತಿದ್ದಾರೆ.