masthmagaa.com:
ವಿಶೇಷ ಸೇನಾ ಕಾರ್ಯಾಚರಣೆ ನಡೆಸುವಂತೆ ರಷ್ಯಾ ಸೇನೆಗೆ ಪುಟಿನ್ ಆರ್ಡರ್ ಮಾಡಿದ್ದು ಬೆಳ್ಳಂಬೆಳಗ್ಗೆ. ರಷ್ಯಾದಲ್ಲಿ ಆಗ ಮುಂಜಾನೆ, ಅಮೆರಿಕ ಸೇರಿದಂತೆ ಪಾಶ್ಚಿಮಾತ್ಯ ದೇಶಗಳಲ್ಲಿ ರಾತ್ರಿ ಸಮಯ. ಇಂಥಾ ಟೈಮಲ್ಲಿ ರಷ್ಯಾದ ಸರ್ಕಾರಿ ಮಾಧ್ಯಮದ ಕ್ಯಾಮರಾ ಮುಂದೆ ಕೂತ ಪುಟಿನ್, ಡಾನೆಟ್ಸ್ಕ್ ಪೀಪಲ್ಸ್ ರಿಪಬ್ಲಿಕ್ ಮತ್ತು ಲುಹಾನ್ಸ್ಕ್ ಪೀಪಲ್ಸ್ ರಿಪಬ್ಲಿಕ್ನವರು ರಷ್ಯಾದ ನೆರವು ಕೇಳಿದ್ದಾರೆ. ಇದರ ಆಧಾರದಲ್ಲಿ ವಿಶ್ವಸಂಸ್ಥೆ ಚಾರ್ಟರ್ನ ಆರ್ಟಿಕಲ್ 51ರ ಏಳನೇ ಭಾಗದ ಪ್ರಕಾರ ಮತ್ತು ರಷ್ಯಾದ ಸ್ಟೇಟ್ ಫೆಡರಲ್ ಕೌನ್ಸಿಲ್ನ ಅನುಮೋದನೆ ಪಡೆದು ಮತ್ತು ಫ್ರೆಂಡ್ಶಿಪ್ ಹಾಗೂ ಡಾನೆಟ್ಸ್ಕ್- ಲುಹಾನ್ಸ್ಕ್ ಜೊತೆ ಪರಸ್ಪರ ಮಾಡಿಕೊಂಡಿರೋ ರಕ್ಷಣಾ ಒಪ್ಪಂದದ ಅನ್ವಯ ನಾನು ವಿಶೇಷ ಸೇನಾ ಕಾರ್ಯಾಚರಣೆ ನಡೆಸಲು ನಿರ್ಧರಿಸಿದ್ದೀನಿ ಅಂತೇಳಿದ್ರು. ಜೊತೆಗೆ, ಕಳೆದ ಎಂಟು ವರ್ಷಗಳಿಂದ ಬೆದರಿಕೆ ಮತ್ತು ನರಮೇಧಕ್ಕೆ ಒಳಗಾದ ಜನರನ್ನ ರಕ್ಷಿಸುವುದು ಇದರ ಗುರಿ ಆಗಿದೆ.
ಇದಕ್ಕಾಗಿ ನಾವು ಯುಕ್ರೇನ್ನ ನಿಶ್ಯಸ್ತ್ರೀಕರಣ ಮತ್ತು ಡಿನಾಜಿಫಿಕೇಷನ್ಗೆ ಶ್ರಮಿಸುತ್ತೇವೆ. ರಷ್ಯಾ ನಾಗರಿಕರು ಸೇರಿದಂತೆ ಅಲ್ಲಿನ ಜನರ ಮೇಲೆ ಹಲವು ರಕ್ತಸಿಕ್ತ ಅಪರಾಧ ಮಾಡಿದವರನ್ನ ಕೋರ್ಟ್ ಕಟಕಟೆಗೆ ತಂದು ನಿಲ್ಲಿಸ್ತೀವಿ. ಯುಕ್ರೇನ್ ಸೈನಿಕರು ತಮ್ಮ ತಮ್ಮ ಶಸ್ತ್ರಾಸ್ತ್ರಗಳನ್ನ ಬಿಟ್ಟು ಮನೆಗೆ ಹೊರಡಿ. ಶಸ್ತ್ರಾಸ್ತ್ರಗಳನ್ನ ತ್ಯಜಿಸಿದ್ರೆ ಯುದ್ಧ ಭೂಮಿಯಿಂದ ವಾಪಸ್ ಹೋಗಲು ನಿಮ್ಮನ್ನ ಬಿಡ್ತೀವಿ. ಇಲ್ಲದಿದ್ರೆ ಅಲ್ಲಿ ನಡೆಯೋ ರಕ್ತಪಾತಕ್ಕೆ ಯುಕ್ರೇನೇ ಜವಾಬ್ದಾರಿ ಆಗುತ್ತೆ. ಆಧುನಿಕ ಯುಕ್ರೇನ್ನಿಂದ ನಿರಂತವಾಗಿ ಬರ್ತಿರೋ ಬೆದರಿಕೆಗಳಿಂದ ರಷ್ಯಾ ಸುರಕ್ಷಿತವಾಗಿರಲು, ಅಭಿವೃದ್ಧಿ ಹೊಂದಲು ಮತ್ತು ಅಸ್ತಿತ್ವದಲ್ಲಿರಲು ಸಾಧ್ಯವಿಲ್ಲ. ನಮ್ಮ ಕಾರ್ಯಾಚರಣೆಗೆ ಯಾರಾದ್ರೂ ಅಡ್ಡಿಪಡಿಸಿದ್ರೆ ತಕ್ಷಣವೇ ಪ್ರತ್ಯತ್ತುರ ಕೊಡ್ತೀವಿ. ಮತ್ತು ನೀವು ಇತಿಹಾಸದಲ್ಲಿ ಎಂದೆಂದಿಗೂ ಎದುರಿಸದ ಪರಿಣಾಮಗಳನ್ನ ಎದುರಿಸಬೇಕಾಗುತ್ತೆ.
ಈ ವಿಷಯದಲ್ಲಿ ಯಾವುದೇ ಬೆಳವಣಿಗೆಯಾದ್ರೂ ನಾವು ರೆಡಿ ಇದ್ದೀವಿ. ಇದಕ್ಕೆ ಸಂಬಂಧಪಟ್ಟ ಎಲ್ಲಾ ನಿರ್ಧಾರಗಳನ್ನ ಈಗಾಗಲೇ ತೆಗೆದುಕೊಂಡಾಗಿದೆ. ನನ್ನ ಮಾತನ್ನ ಎಲ್ಲರೂ ಕೇಳ್ತಿದ್ದೀರಿ ಅಂದುಕೊಂಡಿದ್ದೀನಿ ಅಂತ ಪುಟಿನ್ ಹೇಳಿದ್ದಾರೆ. ಪುಟಿನ್ ಭಾಷಣದಲ್ಲಿ ತಾವು ಮಿಲಿಟರಿ ಕಾರ್ಯಾಚರಣೆ ಮಾಡ್ತಿರೋದೇಕೆ ಅಂತ ಒಂದ್ಕಡೆ ಹೇಳಿದ್ರೆ, ಮತ್ತೊಂದುಕಡೆ ಯಾರಾದ್ರೂ ಮೂಗು ತೂರಿಸಿದ್ರೆ ಅದರ ಪರಿಣಾಮ ನೆಟ್ಟಗಿರಲ್ಲ ಅಂತ ಅಮೆರಿಕ ಮತ್ತು ನ್ಯಾಟೋ ಪಡೆಗಳಿಗೆ ಕಡಕ್ ಎಚ್ಚರಿಕೆ ಕೊಟ್ಟಿದ್ದಾರೆ. ಪುಟಿನ್ ತಮ್ಮ ಭಾಷಣ ಎಂಡ್ ಮಾಡ್ತಿದ್ದಂತೇ ಯುಕ್ರೇನ್ ರಾಜಧಾನಿ ಕ್ವೀವ್ ಅಥವಾ ಕಿಯಾವ್ನಲ್ಲಿ ಸ್ಫೋಟದ ಸದ್ದು ಕೇಳಿಸಿದೆ.
-masthmagaa.com
Contact Us for Advertisement