masthmagaa.com:
ಈ ವರ್ಷದ G7 (Group of Seven) ಶೃಂಗಸಭೆಗೆ ಬರುವಂತೆ ಭಾರತದ ಪ್ರಧಾನಿ ಮೋದಿಯನ್ನ ಯುಕೆ ಪ್ರಧಾನಿ ಬೋರಿಸ್ ಜಾನ್ಸನ್ ಆಹ್ವಾನ ಕೊಟ್ಟಿದ್ದಾರೆ. ಜೊತೆಗೆ ಭಾರತವನ್ನ ‘ಜಗತ್ತಿನ ಔಷಧಾಲಯ’ ಅಂತ ಕರೆದಿರುವ ಬೋರಿಸ್ ಜಾನ್ಸನ್, ಜಗತ್ತಿನ 50 ಪರ್ಸೆಂಟ್ಗೂ ಹೆಚ್ಚು ಕೊರೋನಾ ಲಸಿಕೆಯನ್ನ ಭಾರತ ಈಗಾಗಲೇ ಪೂರೈಕೆ ಮಾಡಿದೆ. ಕೊರೋನಾ ಸಮಯದಲ್ಲಿ ಭಾರತ ಮತ್ತು ಬ್ರಿಟನ್ ಒಟ್ಟಿಗೆ ಕೆಲಸ ಮಾಡಿದೆ ಅಂತಾನೂ ಹೇಳಿದ್ದಾರೆ. ಅಂದ್ಹಾಗೆ ಜೂನ್ 11ರಿಂದ 13ರವರೆಗೆ ಬ್ರಿಟನ್ನ ಕಾರ್ನ್ವಾಲ್ ಪ್ರದೇಶದಲ್ಲಿ ಈ ಶೃಂಗಸಭೆ ನಡೆಯಲಿದೆ. ಗ್ರೂಪ್ ಆಫ್ ಸೆವೆನ್ನಲ್ಲಿ ಬ್ರಿಟನ್, ಕೆನಡಾ, ಫ್ರಾನ್ಸ್, ಜರ್ಮನಿ, ಇಟಲಿ, ಜಪಾನ್, ಅಮೆರಿಕ ದೇಶಗಳಿವೆ. ಭಾರತ ಅದರ ಸದಸ್ಯ ರಾಷ್ಟ್ರ ಆಗಿರದಿದ್ದರೂ ಶೃಂಗಸಭೆಗೆ ಅತಿಥಿಯಾಗಿ ಕರೆಯಲಾಗಿದೆ. ಕೇವಲ ಭಾರತ ಮಾತ್ರವಲ್ಲ ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಕೊರಿಯಾಗೂ ಆಹ್ವಾನ ನೀಡಲಾಗಿದೆ. ಈ ಸಭೆಯಲ್ಲಿ ಕೊರೋನಾ ಮಹಾಮಾರಿ, ಹವಾಮಾನ ಬದಲಾವಣೆ ಮತ್ತು ಮುಕ್ತ ವ್ಯಾಪಾರ ಬಗ್ಗೆ ಚರ್ಚೆ ನಡೆಯಲಿದೆ.
-masthmagaa.com
Contact Us for Advertisement