masthmagaa.com:
ಅಫ್ಘನಿಸ್ತಾನದ ಕಾಬೂಲ್ ಏರ್ಪೋರ್ಟ್ ಬಳಿ ನಿನ್ನೆ ರಾತ್ರಿ ನಡೆದ ಸರಣಿ ಸ್ಫೋಟದಲ್ಲಿ ಕನಿಷ್ಠ 60 ಜನ ಮೃತಪಟ್ಟಿದ್ದಾರೆ. ನೂರಾರು ಜನ ಗಾಯಗೊಂಡಿದ್ದಾರೆ. ಉಗ್ರರು ತಮ್ಮನ್ನ ತಾವು ಸ್ಫೋಟಿಸಿಕೊಳ್ಳೋ ಮೂಲಕ ಈ ದಾಳಿ ನಡೆಸಿದ್ದಾರೆ. ಏರ್ಪೋರ್ಟ್ನ ಪ್ರಮುಖ ಗೇಟ್ ಮತ್ತು ಏರ್ಪೋರ್ಟ್ ಸಮೀಪದ ಹೋಟೆಲ್ ಬಳಿ ಸ್ಫೋಟ ಸಂಭವಿಸಿದೆ. ಈ ಹೋಟೆಲ್ನಲ್ಲಿ ಅಫ್ಘನಿಸ್ತಾನದಿಂದ ಹೊರಹೋಗಬೇಕು ಅಂದುಕೊಂಡಿದ್ದವರು ತಂಗಿದ್ದರು. ದಾಳಿಯಲ್ಲಿ ಅಮೆರಿಕದ 13 ಯೋಧರು ಪ್ರಾಣ ಕಳ್ಕೊಂಡಿದ್ದಾರೆ ಅಂತ ಅಮೆರಿಕದ ರಕ್ಷಣಾ ಇಲಾಖೆ ಪೆಂಟಗನ್ ಹೇಳಿಕೊಂಡಿದೆ. ಕಳೆದ 10 ವರ್ಷದಲ್ಲಿ ಅಮೆರಿಕ ಸೇನೆಗಾದ ದೊಡ್ಡ ನಷ್ಟ ಇದು. 2011ರಲ್ಲಿ ಕಾಬೂಲ್ನಲ್ಲಿ ಅಮೆರಿಕದ ಸೇನಾ ವಿಮಾನವನ್ನ ಹೊಡೆದುರುಳಿಸಿದಾಗ 31 ಯೋಧರು ಮೃತಪಟ್ಟಿದ್ದರು. ಈಗ 13 ಮಂದಿ. ತಾಲಿಬಾನ್ಗೆ ಹೆದರಿ ಜನ ಅಲ್ಲಿಂದ ಜಾಗ ಖಾಲಿ ಮಾಡ್ತಿರುವಾಗಲೇ ಸ್ಫೋಟ ಸಂಭವಿಸಿರೋದು ಜನ ಮತ್ತು ವಿವಿಧ ದೇಶಗಳ ಆತಂಕವನ್ನ ಮತ್ತಷ್ಟು ಹೆಚ್ಚಿಸಿದೆ. ದಾಳಿಯ ಹೊಣೆಯನ್ನ ಐಸಿಸ್ ಉಗ್ರ ಸಂಘಟನೆ ಹೊತ್ತುಕೊಂಡಿದೆ. ಅದ್ರಲ್ಲೂ ಐಸಿಸ್ನ ಅಂಗಸಂಸ್ಥೆಯಾದ ಐಸಿಸಿಸ್ ಕೆ ಅನ್ನೋ ಉಗ್ರ ಸಂಘಟನೆ ದಾಳಿ ನಡೆಸಿದ್ದು ತಮ್ಮವರೇ ಅಂತ ಹೇಳಿಕೊಂಡಿದೆ. ನಿನ್ನೆಯಷ್ಟೇ ಪಾಶ್ಚಿಮಾತ್ಯ ದೇಶಗಳ ಗುಪ್ತಚರ ಇಲಾಖೆಗಳು ಕಾಬೂಲ್ ಏರ್ಪೋರ್ಟ್ನಲ್ಲಿ ಭಯೋತ್ಪಾದನೆ ದಾಳಿ ನಡೀಬಹುದು. ಹೀಗಾಗಿ ಏರ್ಪೋರ್ಟ್ಗೆ ಬರಬೇಡಿ ಅಂತ ಎಚ್ಚರಿಸಿತ್ತು. ಜಿ7 ಶೃಂಗಸಭೆಯಲ್ಲಿ ಮಾತನಾಡಿದ್ದ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಕೂಡ, ಕಾಬೂಲ್ ಏರ್ಪೋರ್ಟ್ನಲ್ಲಿ ಐಸಿಸ್ ಕೆ ದಾಳಿ ನಡೆಸೋ ಅಪಾಯವಿದೆ ಅಂತ ಹೇಳಿದ್ರು. ಇದರ ನಡುವೆಯೇ ಏಕೈಕ ಸುರಕ್ಷಿತ ಪ್ರದೇಶ ಎನಿಸಿಕೊಂಡಿದ್ದ ಕಾಬೂಲ್ ಏರ್ಪೋರ್ಟ್ನಲ್ಲಿ ಭಯೋತ್ಪಾದಕ ದಾಳಿ ನಡೆದುಬಿಟ್ಟಿದೆ.
-masthmagaa.com
Contact Us for Advertisement