masthmagaa.com:
ಅಮೆರಿಕದ ಬ್ಯುಸಿನೆಸ್ ಮ್ಯಾಗ್ನೆಟ್, ಮೈಕ್ರೋಸಾಫ್ಟ್ ಕಂಪನಿಯ ಸಹ ಸಂಸ್ಥಾಪಕ, ಬಿಲ್ ಅಂಡ್ ಮೆಲಿಂಡಾ ಗೇಟ್ಸ್ ಫೌಂಡೇಷನ್ನ ಸಹ ಸಂಸ್ಥಾಪಕ, ಜಗತ್ತಿನ ಶ್ರೀಮಂತರ ಪಟ್ಟಿಯಲ್ಲಿ 4ನೇ ಸ್ಥಾನದಲ್ಲಿರೋ ಬಿಲ್ ಗೇಟ್ಸ್ ತಮ್ಮ 27 ವರ್ಷಗಳ ದಾಂಪತ್ಯ ಜೀವನಕ್ಕೆ ಫುಲ್ ಸ್ಟಾಪ್ ಇಡಲು ಮುಂದಾಗಿದ್ದಾರೆ. ಅಂದ್ರೆ ಬಿಲ್ ಗೇಟ್ಸ್ ಮತ್ತು ಅವರ ಪತ್ನಿ ಮೆಲಿಂಡಾ ಗೇಟ್ಸ್ ಡಿವೋರ್ಸ್ ಪಡೆಯಲು ಮುಂದಾಗಿದ್ದಾರೆ. ಈ ಸಂಬಂಧ ಅಮೆರಿಕದ ಸಿಯಾಟಲ್ ನಗರದ ಕಿಂಗ್ ಕೌಂಟಿ ಸುಪೀರಿಯರ್ ಕೋರ್ಟ್ಗೆ ಜಂಟಿಯಾಗಿ ವಿಚ್ಛೇದನ ಅರ್ಜಿ ಸಲ್ಲಿಸಿದ್ದಾರೆ. ಡಿವೋರ್ಸ್ ಪಡೆಯಲು ಸ್ಪಷ್ಟ ಕಾರಣ ಗೊತ್ತಾಗಿಲ್ಲ. ಆದ್ರೆ ಇಬ್ಬರೂ ಬಿಡುಗಡೆ ಮಾಡಿರೋ ಹೇಳಿಕೆಯಲ್ಲಿ, ‘After a great deal of thought and a lot of work on our relationship, we have made the decision to end our marriage’ ಅಂತ ಹೇಳಿದ್ದಾರೆ. ಅಂದ್ರೆ ದೊಡ್ಡದೊಂದು ಯೋಚನೆ ಇಟ್ಟುಕೊಂಡು ಮತ್ತು ನಮ್ಮ ರಿಲೇಷನ್ಶಿಪಗೆ ಸಂಬಂಧಿಸಿದಂತೆ ಸಾಕಷ್ಟು ವರ್ಕೌಟ್ ಮಾಡಿದ ಬಳಿಕ ದಾಂಪತ್ಯ ಜೀವನವನ್ನ ಅಂತ್ಯಗೊಳಿಸಲು ನಿರ್ಧರಿಸಿದ್ದೇವೆ ಅಂತ ಹೇಳಿದ್ದಾರೆ. ಬಿಲ್ ಗೇಟ್ಸ್ ಸಹ ಸಂಸ್ಥಾಪಕರಾಗಿರೋ ಮೈಕ್ರೋಸಾಫ್ಟ್ ಕಂಪನಿಯಲ್ಲಿ ಮೆಲಿಂಡಾ ಫ್ರೆಂಚ್ ಗೇಟ್ಸ್ ಪ್ರಾಡಕ್ಟ್ ಮ್ಯಾನೇಜರ್ ಆಗಿ ಸೇರಿಕೊಂಡ್ರು. ಅಲ್ಲಿ ಇಬ್ಬರು ಪರಿಚಯವಾಗಿ ಕೆಲ ವರ್ಷಗಳವರೆಗೆ ಡೇಟಿಂಗ್ ಮಾಡಿದ್ದ ಇಬ್ಬರು 1994ರಲ್ಲಿ ಮದ್ವೆಯಾದ್ರು. ಗೇಟ್ಸ್ ದಂಪತಿಗೆ ಮೂವರು ಮಕ್ಕಳಿದ್ದಾರೆ. ಒಂದು ಗಂಡು, ಎರಡು ಹೆಣ್ಣು. ಬಳಿಕ 2000ನೇ ಇಸವಿಯಲ್ಲಿ ಬಿಲ್ ಮತ್ತು ಮೆಲಿಂಡಾ ತಮ್ಮದೇ ಹೆಸರಿನ ಚಾರಿಟೇಬಲ್ ಟ್ರಸ್ಟ್ ಸ್ಥಾಪಿಸಿದ್ರು. ಇದರ ಕೇಂದ್ರ ಕಚೇರಿ ಸಿಯಾಟಲ್ನಲ್ಲಿದೆ. ಗಂಡ-ಹೆಂಡತಿಯಾಗಿ ಮುಂದುವರಿಯೋಕೆ ಸಾಧ್ಯವಿಲ್ಲ ಅಂತ ಹೇಳಿರೋ ಇಬ್ಬರೂ ಕೂಡ, ತಾವು ಹುಟ್ಟುಹಾಕಿ ಬೆಳೆಸಿರೋ ಬಿಲ್ ಅಂಡ್ ಮೆಲಿಂಡಾ ಗೇಟ್ಸ್ ಫೌಂಡೇಷನ್ನಲ್ಲಿ ಒಟ್ಟಿಗೆ ಕೆಲಸ ಮಾಡೋದಾಗಿ ಹೇಳಿದ್ದಾರೆ. ಇದು ಜಗತ್ತಿನ ಅತಿದೊಡ್ಡ ಖಾಸಗಿ ಚಾರಿಟೇಬಲ್ ಟ್ರಸ್ಟ್ಗಳಲ್ಲಿ ಒಂದು. ಬಡತನ ನಿರ್ಮೂಲನೆ, ಆರೋಗ್ಯ ಕ್ಷೇತ್ರದ ಸುಧಾರಣೆಗೆ ಜಗತ್ತಿನಾದ್ಯಂತ ಬಿಲ್ ಅಂಡ್ ಮೆಲಿಂಡಾ ಗೇಟ್ಸ್ ಫೌಂಡೇಷನ್ ಸಾವಿರಾರು ಕೋಟಿ ಹಣ ಖರ್ಚು ಮಾಡಿದೆ. ಕಳೆದೆರಡು ದಶಕದಲ್ಲಿ 50 ಬಿಲಿಯನ್ ಡಾಲರ್ಗೂ ಹೆಚ್ಚು ಖರ್ಚು ಮಾಡಿದೆ. ಅಂದ್ರೆ ಭಾರತದ ರೂಪಾಯಿ ಲೆಕ್ಕದಲ್ಲಿ ಸುಮಾರು ಮೂರೂವರೆ ಲಕ್ಷ ಕೋಟಿ ರೂಪಾಯಿ. ಮಲೇರಿಯಾ, ಪೊಲಿಯೋ ನಿರ್ಮೂಲನೆ, ಚೈಲ್ಡ್ ನ್ಯೂಟ್ರಿಷನ್ ಮತ್ತು ಲಸಿಕೆ ವಿಚಾರದಲ್ಲಿ ಈ ಟ್ರಸ್ಟ್ನ ಕೊಡುಗೆ ಅಪಾರ. ಕೊರೋನಾ ಪರಿಹಾರಕ್ಕೆ 1.75 ಬಿಲಿಯನ್ ಡಾಲರ್ ಮೀಸಲಿಡೋದಾಗಿ ಕಳೆದ ವರ್ಷವಷ್ಟೇ ಘೋಷಿಸಿತ್ತು. 2019ರಲ್ಲಿ ಇದರ ನಿವ್ವಳ ಆಸ್ತಿ ಸುಮಾರು 43.3 ಬಿಲಿಯನ್ ಡಾಲರ್ ಇತ್ತು. ಈ ಮೂಲಕ ಅಮೆರಿಕದ ಅತಿದೊಡ್ಡ ಖಾಸಗಿ ಚಾರಿಟೇಬಲ್ ಟ್ರಸ್ಟ್ ಎನಿಸಿಕೊಂಡಿದೆ. ಬಿಲ್ ಮತ್ತು ಮೆಲಿಂಡಾ ತಮ್ಮ ಆಸ್ತಿಯಲ್ಲಿ ಈ ಫೌಂಡೆಷನ್ಗೆ 36 ಬಿಲಿಯನ್ ಡಾಲರ್ ಕೊಟ್ಟಿದ್ದಾರೆ. ಇನ್ನು ಮೆಲಿಂಡಾ ಬಗ್ಗೆ ಹೇಳ್ಬೇಕು ಅಂದ್ರೆ, ಅಮೆರಿಕದವರೇ ಆದ ಇವರು ಇತ್ತೀಚಿನ ದಿನಗಳಲ್ಲಿ ತಮ್ಮ ಹೆಸರಿನ ಜೊತೆ ಒರಿಜಿನಲ್ ಸರ್ನೇಮ್ ಆದ ಫ್ರೆಂಚ್ ಅನ್ನೋದನ್ನ ಸೇರಿಸಿದ್ದರು. ಮೆಲಿಂಡಾ ಫ್ರೆಂಚ್ ಗೇಟ್ಸ್ ಅಂತ. 2015ರಲ್ಲಿ ಇವರು ಪಿವೋಟಲ್ ವೆಂಚರ್ಸ್ ಅನ್ನೋ ಇನ್ವೆಸ್ಟ್ಮೆಂಟ್ ಕಂಪನಿಯನ್ನ ಸ್ಥಾಪಿಸಿದ್ರು. 2019ರಲ್ಲಿ ‘ದಿ ಮೂಮೆಂಟ್ ಆಫ್ ಲಿಫ್ಟ್’ ಅನ್ನೋ ಬುಕ್ ಪಬ್ಲಿಷ್ ಮಾಡಿದ್ರು. ಈಗ ಇಬ್ರು ಡಿವೋರ್ಸ್ ಪಡೀತಿರೋದ್ರಿಂದ ಆಸ್ತಿಯಲ್ಲಿ ಪಾಲಾಗಬೇಕು. ಆಸ್ತಿಯನ್ನ ಹೇಗೆ ಪಾಲು ಮಾಡ್ಕೋಬೇಕು ಅನ್ನೋ ಬಗ್ಗೆ ನಾವಿಬ್ಬರು ಒಪ್ಪಂದಕ್ಕೆ ಬಂದಿದ್ದೇವೆ ಅಂತ ಕೋರ್ಟ್ಗೆ ಸಲ್ಲಿಸಿರೋ ಅರ್ಜಿಯಲ್ಲಿ ಉಲ್ಲೇಖಿಸಿದ್ದಾರೆ. ಆದ್ರೆ ಹೇಗೆ, ಎಷ್ಟು ಆಸ್ತಿ ಅನ್ನೋದನ್ನ ಸ್ಪಷ್ಟವಾಗಿ ಹೇಳಿಲ್ಲ. ವಿಶ್ವದ ನಂಬರ್ ಒನ್ ಶ್ರೀಮಂತ ಆಗಿರೋ ಅಮೆಜಾನ್ ಸಂಸ್ಥಾಪಕ ಜೆಫ್ ಬೆಝೋಸ್ ಮತ್ತು ಅವರ ಪತ್ನಿ ಮೆಕೆನ್ಝಿ ಸ್ಕಾಟ್ 2019ರಲ್ಲಿ ಡಿವೋರ್ಸ್ ಪಡೆದಿದ್ದರು.
-masthmagaa.com:
Contact Us for Advertisement