masthmagaa.com:
ಉತ್ತರ ಕೊರಿಯಾ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್ಗೆ ಚೀನಾ ಅಂದ್ರೆ ಒಂಥರಾ ಪ್ರೀತಿ.. ಚೀನಾ ಜೊತೆಗೆ ಒಳ್ಳೆ ಸಂಬಂಧವನ್ನೇ ಹೊಂದಿದ್ದಾರೆ. ಅದೇ ರೀತಿ ಈಗ ಚೀನಾದ ಹುತಾತ್ಮ ಯೋಧರಿಗೆ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ. ಇಲ್ಲಿನ ರಾಜಧಾನಿ ಪ್ಯೊಂಗ್ಯಾಂಗ್ನಲ್ಲಿ 1950-53ರ ಕೊರಿಯಾ ಯುದ್ಧದಲ್ಲಿ ಮಡಿದ ಚೀನೀ ಯೋಧರಿಗೆ ಗೌರವ ಅರ್ಪಿಸಲು ಫ್ರೆಂಡ್ಶಿಪ್ ಟವರ್ ಅನ್ನೋ ಒಂದು ಮೆಮೋರಿಯಲ್ ನಿರ್ಮಿಸಲಾಗಿದೆ. ಕಿಮ್ ಜಾಂಗ್ ಉನ್ ಪ್ರತಿವರ್ಷ ಇಲ್ಲಿಗೆ ಹೋಗಿ ಶ್ರದ್ಧಾಂಜಲಿ ಸಲ್ಲಿಸಲ್ಲ. 2011ರಲ್ಲಿ ಅವರು ಅಧಿಕಾರಕ್ಕೇರಿದ ಬಳಿಕ ಈವರೆಗೆ 3 ಸಲ ಹೋಗಿದ್ದಾರೆ ಅಷ್ಟೆ.. ಮೊನ್ನೆಯಷ್ಟೇ ಕೊರಿಯನ್ ಯುದ್ಧ ಅಂತ್ಯಗೊಂಡ 68ನೇ ವರ್ಷವನ್ನು ಆಚರಿಸಲಾಯ್ತು. ಅದರ ಮರುದಿನವೇ ಕಿಮ್ ಈ ಸ್ಮಾರಕಕ್ಕೆ ಭೇಟಿ ನೀಡಿದ್ದಾರೆ. ಈ ವೇಳೆ ಕಿಮ್ ಜಾಂಗ್ ಉನ್ ಮಾತನಾಡಿ, ಕೊರಿಯಾ ಜನರ ಐತಿಹಾಸಿಕ ಹೋರಾಟದಲ್ಲಿ ಸಹಾಯ ಮಾಡಿದ ಚೀನಾದ ಯೋಧರ ಉದಾತ್ತ ಆತ್ಮಗಳು ಅಮರವಾಗಿ ಉಳಿಯುತ್ತವೆ. ಚೀನಾದ ಜೊತೆಗಿನ ಸಂಬಂಧವನ್ನು ಪೀಳಿಗೆಯಿಂದ ಪೀಳಿಗೆಗೆ ದೃಢವಾಗಿ ಮುನ್ನಡೆಸಲಾಗುತ್ತೆ ಅಂತ ಹೇಳಿದ್ದಾರೆ ಅಂತ ಸರ್ಕಾರಿ ಮಾಧ್ಯಮ ಕೆಸಿಎನ್ಎ ವರದಿ ಮಾಡಿದೆ. ಅಂದಹಾಗೆ ಕೊರಿಯಾ ಯುದ್ಧದಲ್ಲಿ ಚೀನಾ ಉತ್ತರ ಕೊರಿಯಾ ಪರವಾಗಿ ದಕ್ಷಿಣ ಕೊರಿಯಾ ಮತ್ತು ಅಮೆರಿಕ ವಿರುದ್ಧ ಹೋರಾಟ ನಡೆಸಿತ್ತು. ಅದ್ರೂ ಕೂಡ ಈ ಯುದ್ಧ ಕದನವಿರಾಮದೊಂದಿಗೆ ಅಂತ್ಯವಾಗಿತ್ತು. ಯಾರೂ ಗೆಲ್ಲೋಕೆ ಸಾಧ್ಯವಾಗಿರಲಿಲ್ಲ. ಯಾವುದೇ ಶಾಂತಿ ಒಪ್ಪಂದ ಕೂಡ ಆಗಿರಲಿಲ್ಲ. ಇದೇ ಕಾರಣಕ್ಕೆ ಉತ್ತರ ಕೊರಿಯಾ ಮತ್ತು ದಕ್ಷಿಣ ಕೊರಿಯಾ ನಡುವೆ ಇಂದಿಗೂ ತಾಂತ್ರಿಕವಾಗಿ ಯುದ್ಧ ನಡೀತಾನೇ ಇದೆ.
-masthmagaa.com
Contact Us for Advertisement