masthmagaa.com:
ಈಗಾಗಲೇ ಎಲೆಕ್ಟ್ರಾನಿಕ್ ಕಾರುಗಳ ಕ್ಷೇತ್ರದಲ್ಲಿ ಕ್ರಾಂತಿ ಮಾಡಿರೋ ಕ್ರೇಜಿ ಉದ್ಯಮಿ ಎಲಾನ್ ಮಸ್ಕ್ ಇಂಟರ್ನೆಟ್ ಕ್ಷೇತ್ರದಲ್ಲೂ ಕ್ರಾಂತಿ ಮಾಡೋ ಪ್ರಯತ್ನದಲ್ಲಿದ್ದಾರೆ. ಇಂಟರ್ನೆಟ್ ಸೇವೆ ನೀಡುವ ಸ್ಟಾರ್ ಲಿಂಕ್ ಯೋಜನೆಗೆ 30 ಬಿಲಿಯನ್ ಡಾಲರ್ ಅಂದ್ರೆ ರೂಪಾಯಿ ಲೆಕ್ಕದಲ್ಲಿ ನೋಡೋದಾದ್ರೆ 2.2 ಲಕ್ಷ ಕೋಟಿಯಷ್ಟು ಬಂಡವಾಳ ಹೂಡುವ ಪ್ಲಾನ್ ಇದೆ ಅಂತ ಎಲಾನ್ ಮಸ್ಕ್ ಹೇಳಿದ್ದಾರೆ. ಸ್ಟಾರ್ ಲಿಂಕ್ ಅನ್ನೋದು ಸೆಟಲೈಟ್ ಇಂಟರ್ನೆಟ್ ಸರ್ವೀಸ್.. ಭೂಮಿಗೆ ಹತ್ತಿರವಾದ ಅಂದ್ರೆ ಕೆಳ ಕಕ್ಷೆಯಲ್ಲಿ ಸಾವಿರಾರು ಉಪಗ್ರಹಗಳನ್ನು ನಿಯೋಜಿಸಿ, ಕನೆಕ್ಟಿವಿಟಿ ಕಡಿಮೆ ಇರುವ ಜಾಗಗಳಿಗೂ ಹೈ ಸ್ಪೀಡ್ ಇಂಟರ್ನೆಟ್ ನೀಡುವ ಒಂದು ಯೋಜನೆ. ಈಗಾಗಲೇ 1500 ಉಪಗ್ರಹಗಳನ್ನು ಕಕ್ಷೆಗೆ ಸೇರಿಸಲಾಗಿದ್ದು, ಆಗಸ್ಟ್ ವೇಳೆಗೆ ಇಡೀ ಭೂಮಿಗೆ ಅಂದ್ರೆ ದಕ್ಷಿಣ ಮತ್ತು ಉತ್ತರ ಧ್ರುವ ಬಿಟ್ಟು ಉಳಿದೆಲ್ಲಾ ಭಾಗಗಳಿಗೆ ಇಂಟರ್ನೆಟ್ ಕನೆಕ್ಟಿವಿಟಿ ಸೌಲಭ್ಯ ಒದಗಿಸುವ ಸಾಧ್ಯತೆ ಇದೆ ಅಂತ ಎಲಾನ್ ಮಸ್ಕ್ ಹೇಳಿದ್ದಾರೆ. ಬಾರ್ಸೆಲೋನಾದಲ್ಲಿ ಟೆಲಿಕಾಂ ಇಂಡಸ್ಟ್ರಿಯ ಮೊಬೈಲ್ ವರ್ಲ್ಡ್ ಕಾಂಗ್ರೆಸ್ ಅನ್ನೋ ಒಂದು ಕಾನ್ಫರೆನ್ಸ್ನಲ್ಲಿ, ವಿಡಿಯೋ ಲಿಂಕ್ ಮೂಲಕ ಭಾಗಿಯಾದ ಎಲಾನ್ ಮಸ್ಕ್ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಈಗಾಗಲೇ ನಾವು 69 ಸಾವಿರಕ್ಕೂ ಹೆಚ್ಚು ಆಕ್ಟೀವ್ ಯೂಸರ್ಗಳನ್ನು ಹೊಂದಿದ್ದು, ಮುಂದಿನ 12 ತಿಂಗಳಲ್ಲಿ ಅದು 5 ಲಕ್ಷದ ಗಡಿ ದಾಟುತ್ತೆ ಅನ್ನೋ ನಂಬಿಕೆ ನಮಗಿದೆ. ಸ್ಟಾರ್ಲಿಂಕ್ ತನ್ನ ಟರ್ಮಿನಲ್ಗಳನ್ನು 500 ಡಾಲರ್ ಅಂದ್ರೆ 37 ಸಾವಿರ ರೂಪಾಯಿಗೆ ಮಾರಾಟ ಮಾಡ್ತಿದೆ. ಆದ್ರೆ ಅದರ ನಿರ್ಮಾಣಕ್ಕೆ 1000 ಡಾಲರ್ ಖರ್ಚಾಗುತ್ತಿದೆ. ಹೀಗಾಗಿ ಟರ್ಮಿನಲ್ ನಿರ್ಮಾಣ ವೆಚ್ಚ ಕಡಿಮೆ ಮಾಡಿ, 220ರಿಂದ 250 ಡಾಲರ್ಗೆ ಇಳಿಸೋ ಬಗ್ಗೆ ಕೂಡಾ ಯೋಚಿಸ್ತಿದ್ದೇವೆ ಅಂತ ಮಸ್ಕ್ ಹೇಳಿದ್ದಾರೆ. ಜೊತೆಗೆ ಈಗಾಗಲೇ 2 ಪ್ರಮುಖ ದೇಶಗಳ ಟೆಲಿಕಾಂ ಆಪರೇಟರ್ಗಳ ಜೊತೆ ಮಹತ್ವದ ಒಪ್ಪಂದಗಳಿಗೆ ಸಹಿ ಹಾಕಿದ್ದೀನಿ ಅಂತ ಹೇಳಿದ್ದಾರೆ. ಆದ್ರೆ ಅದು ಯಾವ ದೇಶಗಳು ಅಂತ ಮಾತ್ರ ಹೇಳಿಲ್ಲ.. ಅತಿ ಹೆಚ್ಚು ಇಂಟರ್ನೆಟ್ ಬಳಕೆದಾರರ ಪಟ್ಟಿಯಲ್ಲಿ ಚೀನಾ ಮೊದಲ ಸ್ಥಾನದಲ್ಲಿದ್ರೆ, ಭಾರತ 2ನೇ ಸ್ಥಾನದಲ್ಲಿದೆ. 3ನೇ ಪ್ಲೇಸ್ನಲ್ಲಿ ಅಮೆರಿಕ ಇದೆ.
-masthmagaa.com
Contact Us for Advertisement