masthmagaa.com:
ಇತ್ತೀಚೆಗಷ್ಟೇ ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್ಐಗೆ ಹೊಸ ಮುಖ್ಯಸ್ಥರನ್ನಾಗಿ ಜನರಲ್ ನದೀಂ ಅಂಜುಮ್ ಹೆಸಸರನ್ನ ಘೋಷಿಸಲಾಗಿತ್ತು. ಇದೀಗ ಅವರ ನೇಮಕದ ಉಳಿದ ಪ್ರಕ್ರಿಯೆ ಶುರುವಾಗಿದೆ. ಇದಕ್ಕೂ ಮುನ್ನ ಇವರ ನೇಮಕ ಸಂಬಂಧ ಭಾರಿ ವಿವಾದವಾಗಿತ್ತು. ಯಾಕಂದ್ರೆ ಈ ಹಿಂದೆ ಐಎಸ್ಐ ಮುಖ್ಯಸ್ಥರಾಗಿದ್ದ ಫೈಜ್ ಹಮೀದ್ರನ್ನೇ ಐಎಸ್ಐ ಮುಖ್ಯಸ್ಥರಾಗಿ ಮುಂದುವರಿಸಬೇಕು ಅನ್ನೋದು ಇಮ್ರಾನ್ ಖಾನ್ ಆಸೆ ಅಂತ ವರದಿಯಾಗಿತ್ತು. ಆದ್ರೆ ಅವರನ್ನು ಬದಲಿಸಬೇಕು ಅನ್ನೋದು ಸೇನಾ ಮುಖ್ಯಸ್ಥ ಖಮರ್ ಜಾವೇದ್ ಬಜ್ವಾ ನಿರ್ಧಾರವಾಗಿತ್ತು. ಅಕ್ಟೋಬರ್ 6ರಂದು ಸೇನೆಯ ಮಾಧ್ಯಮ ಐಎಸ್ಪಿಆರ್ ಈ ಬಗ್ಗೆ ಮೊದಲು ಮಾಹಿತಿ ನೀಡಿತ್ತು. ಇದೀಗ ಕೊನೆಗೂ ಇಮ್ರಾನ್ ಖಾನ್ ಮತ್ತು ಖಮರ್ ಜಾವೇದ್ ಬಜ್ವಾ ನಡುವೆ ಮೀಟಿಂಗ್ ನಡೆದಿದ್ದು, ಕೊನೆಗೂ ಒಮ್ಮತಕ್ಕೆ ಬರಲಾಗಿದೆ. ಐಎಸ್ಐ ಮುಖ್ಯಸ್ಥರನ್ನಾಗಿ ಜನರಲ್ ನದೀಂ ಅಂಜುಮ್ ನೇಮಕದ ಪ್ರಕ್ರಿಯೆ ಶುರು ಮಾಡಲಾಗಿದೆ.
ಈ ನಡುವೆ ಫೈಜ್ ಹಮೀದ್ ಬದಲಾವಣೆಗೆ ಕಾರಣ ಏನು ಅನ್ನೋದು ತುಂಬಾ ಚರ್ಚೆಯಾಗ್ತಿದೆ. ಪ್ರಮುಖವಾಗಿ, ಅಫ್ಘಾನಿಸ್ಥಾನ ಸರ್ಕಾರ ರಚನೆ ವೇಳೆ ಅಲ್ಲಿಗೆ ಹೋಗಿದ್ದ ಐಎಸ್ಐ ಮುಖ್ಯಸ್ಥ ಫೈಜ್ ಹಮೀದ್ ಫುಲ್ ಪಬ್ಲಿಕ್ಕಾಗಿ ಕಾಣಿಸಿಕೊಂಡಿದ್ರು. ಅಲ್ಲದೆ ಅವರ ಪವರ್ ಕೂಡ ನಿರಂತರವಾಗಿ ಹೆಚ್ಚುತ್ತಲೇ ಇತ್ತು. ಅಫ್ಘಾನಿಸ್ತಾನದ ಎಲ್ಲಾ ಮುಜಾಹಿದ್ಗಳ ನಿಯಂತ್ರಣ ಇರೋದು ಐಎಸ್ಐ ಬಳಿ. ಹೀಗಾಗಿ ಅದ್ರ ಮುಖ್ಯಸ್ಥನ ಬದಲಾವಣೆಗೆ ಪಾಕ್ ಸೇನಾ ಮುಖ್ಯಸ್ಥ ನಿರ್ಧರಿಸಿದ್ರು ಅನ್ನೋದು ಒಂದು ವಾದ.. ಮತ್ತೊಂದು ಕಡೆ ಫೈಜ್ ಹಮೀದ್ರನ್ನು ಸೇನಾ ಮುಖ್ಯಸ್ಥರನ್ನಾಗಿ ಮಾಡಲು ಈ ದಾರಿಯಲ್ಲಿ ಹೋಗಲಾಗ್ತಿದೆ ಅಂತ ಕೂಡ ಹೇಳಲಾಗ್ತಿದೆ. ಅಂದ್ರೆ ಲೆಫ್ಟಿನೆಂಟ್ ಜನರಲ್ ಆಗಿದ್ದ ಫೈಜ್ ಹಮೀದ್ 2019ರಲ್ಲಿ ಐಎಸ್ಐ ಮುಖ್ಯಸ್ಥರಾಗಿ ಆಯ್ಕೆಯಾಗಿದ್ರು. ಇವರು ನೇರವಾಗಿ ಸೇನಾ ಮುಖ್ಯಸ್ಥರಾಗಲು ಸಾಧ್ಯವಿಲ್ಲ. ಹೀಗಾಗಿ ಪೇಶಾವರ್ ಕೋರ್ ಕಮಾಂಡರ್ ಆಗಿ ನಿಯೋಜಿಸಲಾಗಿದೆ. ಈ ಕೋರ್ ಕಮಾಂಡರ್ ಹುದ್ದೆ ನಿರ್ವಹಿಸಿದರೆ ಫೈಜ್ ಹಮೀದ್ ಸೇನಾ ಮುಖ್ಯಸ್ಥರಾಗೋ ಅವಕಾಶವನ್ನು ಪಡ್ಕೊಳ್ತಾರೆ. ಹೀಗಾಗಿಯೇ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಅಂತ ಕೂಡ ಹೇಳಲಾಗ್ತಿದೆ.
-masthmagaa.com
Contact Us for Advertisement