masthmagaa.com:
ಮೆಕ್ಅಫೀ’ ಆ್ಯಂಟಿ ವೈರಸ್ ಸಾಫ್ಟ್ವೇರ್ನ ಸೃಷ್ಟಿಕರ್ತ ಜಾನ್ ಮೆಕ್ಅಫೀ ಸ್ಪೇನ್ನ ಬಾರ್ಸಿಲೋನಾ ಜೈಲಿನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇವರಿಗೆ 75 ವರ್ಷ ವಯಸ್ಸಾಗಿತ್ತು. ಅಮೆರಿಕದಲ್ಲಿ ತೆರಿಗೆ ವಂಚನೆ ಮಾಡಿದ ಆರೋಪ ಮತ್ತು ಕ್ರಿಪ್ಟೋಕರೆನ್ಸಿಯಲ್ಲಿ ವಂಚನೆ ಮಾಡಿದ ಆರೋಪಗಳು ಇವರ ಮೇಲಿತ್ತು. ಈ ಹಿನ್ನೆಲೆ ತಲೆಮರೆಸಿಕೊಂಡಿದ್ದ ಜಾನ್ ಮೆಕ್ಅಫೀಯನ್ನ ಹೋದ್ವರ್ಷ ಸ್ಪೇನ್ನ ಬಾರ್ಸಿಲೋನಾ ಏರ್ಪೋರ್ಟ್ನಲ್ಲಿ ಅರೆಸ್ಟ್ ಮಾಡಲಾಗಿತ್ತು. ಸ್ಪೇನ್ನಲ್ಲಿ ಅವರ ವಿಚಾರಣೆ ನಡೀತಿತ್ತು. ಇತ್ತೀಚೆಗಷ್ಟೇ ಜಾನ್ ಮೆಕ್ಅಫೀಯನ್ನ ಅಮೆರಿಕಕ್ಕೆ ಹಸ್ತಾಂತರ ಮಾಡಲು ಸ್ಪಾನಿಷ್ ಹೈಕೋರ್ಟ್ ಆದೇಶ ನೀಡಿತ್ತು. ವಿಚಾರಣೆ ಟೈಮಲ್ಲಿ ಮಾತನಾಡಿದ್ದ ಮೆಕ್ಅಫೀ, ನಂಗೇನಾದ್ರೂ ಅಮೆರಿಕಕ್ಕೆ ಹಸ್ತಾಂತರ ಮಾಡಿದ್ರೆ ನಾನು ಜೀವನಪೂರ್ತಿ ಜೈಲಿನಲ್ಲೇ ಕಾಲ ಕಳೀಬೇಕಾಗುತ್ತೆ ಅಂತ ಹೇಳಿದ್ದರು. ಸ್ಪೇನ್ ಹೈಕೋರ್ಟ್ ನೀಡಿದ ಆದೇಶವನ್ನ ಪ್ರಶ್ನಿಸಿ ಅರ್ಜಿ ಸಲ್ಲಿಸೋ ಅವಕಾಶ ಜಾನ್ ಮೆಕ್ಅಫೀಗೆ ಇತ್ತು. ಆದ್ರೂ ಅವರು ಜೈಲಿನಲ್ಲಿ ನೇಣುಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಅಂತ ಅವರ ಪರ ವಕೀಲರು ತಿಳಿಸಿದ್ದಾರೆ. 2019ರಲ್ಲಿ ಒಮ್ಮೆ ಮಾತನಾಡುವಾಗ ಜಾನ್ ಮೆಕ್ಅಫೀ, ಸೈದ್ಧಾಂತಿಕ ಕಾರಣಗಳಿಂದಾಗಿ ಕಳೆದ 8 ವರ್ಷಗಳಿಂದ ತಾನು ತೆರಿಗೆ ಕಟ್ಟಿಲ್ಲ ಅಂತ ಹೇಳಿಕೊಂಡಿದ್ದರು. ಪ್ರಕರಣದ ವಿಚಾರಣೆಯಿಂದ ತಪ್ಪಿಸಿಕೊಳ್ಳಲು ಅದೇ ವರ್ಷ ಅಮೆರಿಕದಿಂದ ಪರಾರಿಯಾಗಿದ್ದ ಅವರು ಸಾಕಷ್ಟು ಸಮಯದವರೆಗೆ ಮೆಗಾಯಾಚ್ನಲ್ಲಿ ತಮ್ಮ ಪತ್ನಿಯೊಂದಿಗೆ ವಾಸವಿದ್ದರು. ಇನ್ನು ಕ್ರಿಪ್ಟೋಕರೆನ್ಸಿ ಬಳಸಿಕೊಂಡು ಅಮೆರಿಕದ ವ್ಯಾಪಾರ ನಿರ್ಬಂಧದಿಂದ ತಪ್ಪಿಸಲು ಕ್ಯೂಬಾಗೆ ಸಹಾಯ ಮಾಡಲು ಮುಂದಾಗಿದ್ರು. ಅಮೆರಿಕ ಅಧ್ಯಕ್ಷೀಯ ಚುನಾವಣೆಗೆ ಲಿಬರ್ಟೇರಿಯನ್ ಪಾರ್ಟಿಯಿಂದ ಸ್ಪರ್ಧಿಸಲು ಕೂಡ ಮುಂದಾಗಿದ್ದರು ಮೆಕ್ಅಫೀ. ಒಂದ್ಸಲವಂತೂ ತಾವು 47 ಮಕ್ಕಳಿಗೆ ತಂದೆ ಅಂತಾನೂ ಹೇಳಿಕೊಂಡಿದ್ದರು.
ಅಂದ್ಹಾಗೆ ಜಾನ್ ಮೆಕ್ಅಫೀ ಸ್ಥಾಪಿಸಿದ ಮೆಕ್ಅಫೀ ಆ್ಯಂಟಿ ವೈರಸ್ ಸಾಫ್ಟ್ವೇರ್ ಅನ್ನ ಮೊದಲು ಕಮರ್ಷಿಯಲ್ ಆಗಿ ರಿಲೀಸ್ ಮಾಡಿದ್ದು 1987ರಲ್ಲಿ. ಅದಕ್ಕೂ ಮೊದಲು ಈ ಸಾಫ್ಟ್ವೇರ್ ಅನ್ನ ನಾಸಾ, ಲಾಕ್ಹೀಡ್ ಮಾರ್ಟಿನ್ ಮುಂತಾದ ಪ್ರತಿಷ್ಠಿತ ಸಂಸ್ಥೆಗಳಲ್ಲಿ ಬಳಸಿಕೊಳ್ಳಲಾಗಿತ್ತು. 2011ರಲ್ಲಿ ಈ ಕಂಪನಿಯನ್ನ ಇಂಟೆಲ್ಗೆ ಸೇಲ್ ಮಾಡಿದ್ರು ಜಾನ್ ಮೆಕ್ಅಫೀ. ಅಲ್ಲಿಂದ ಇಲ್ಲಿವರೆಗೆ ಅವರಿಗೂ ಈ ಸಾಫ್ಟ್ವೇರ್ಗೂ ಯಾವುದೇ ಸಂಬಂಧ ಇಲ್ಲ. ಆದ್ರೆ ಈಗಲೂ ಈ ಆ್ಯಂಟಿವೈರಸ್ ಸಾಫ್ಟ್ವೇರ್ಗೆ ಅವರ ಹೆಸರೇ ಇರೋದು ವಿಶೇಷ. ಜಗತ್ತಿನಾದ್ಯಂತ ಸುಮಾರು 50 ಕೋಟಿ ಜನ ಈ ಮೆಕ್ಅಫೀ ಆ್ಯಂಟಿ ವೈರಸ್ ಸಾಫ್ಟ್ವೇರ್ ಅನ್ನ ಬಳಸುತ್ತಿದ್ದಾರೆ. ಜಾನ್ ಮೆಕ್ಅಫೀ ಸಾವಿಗೆ ಸಾವಿರಾರು ಕ್ರಿಪ್ಟೋಕರೆನ್ಸಿ ಬಳಕೆದಾರರು ಸಂತಾಪ ಸೂಚಿಸಿದ್ದಾರೆ.
-masthmagaa.com
Contact Us for Advertisement