masthmagaa.com:
ಅಫ್ಘನಿಸ್ತಾನದಲ್ಲಿ ಅಧಿಕಾರಕ್ಕೆ ಬಂದಿರೋ ತಾಲಿಬಾನಿಗಳು ತಮ್ಮ ಸೇನೆಯಲ್ಲಿ ‘ಪಾಣಿಪತ್’ ಹೆಸರಿನ ಮಿಲಿಟರಿ ಯೂನಿಟ್ ಅನ್ನ ಕ್ರಿಯೇಟ್ ಮಾಡಿಕೊಂಡಿದ್ದಾರೆ. ಪಾಣಿಪತ್ ಹರಿಯಾಣದಲ್ಲಿ ಬರೋ ಒಂದು ನಗರ. ಇದಕ್ಕೂ ತಾಲಿಬಾನಿಗಳಿಗೂ ಏನು ಸಂಬಂಧ ಅನ್ನೋ ಪ್ರಶ್ನೆ ಬರುತ್ತೆ.. ಇಂಡಿಯನ್ ಹಿಸ್ಟರಿಯಲ್ಲಿ ಪಾಣಿಪತ್ ಹೆಸರನ್ನ ನೀವು ಕೇಳಿರಬೋದು. ಒಂದನೇ ಪಾಣಿಪತ್ ಕದನ, ಎರಡನೇ ಪಾಣಿಪತ್ ಕದನ, ಮೂರನೇ ಪಾಣಿಪತ್ ಕದನ ಅಂತ. 1761ರಲ್ಲಿ ಮರಾಠ ಸಾಮ್ರಾಜ್ಯ ಮತ್ತು ಅಫ್ಘನ್ ರೂಲರ್ ಕಮ್ ದುರ್ರಾನಿ ಸಾಮ್ರಾಜ್ಯದ ಸಂಸ್ಥಾಪಕ ಅಹ್ಮದ್ ಶಾ ದುರ್ರಾನಿ ಸೇನೆಗಳ ಮಧ್ಯೆ ಮೂರನೇ ಪಾಣಿಪತ್ ಕದನ ನಡೆದಿತ್ತು.
ಈ ಯುದ್ಧದಲ್ಲಿ ಮರಾಠರಿಗೆ ಭಾರತದ ಇತರ ಸಾಮ್ರಾಜ್ಯಗಳ ನೆರವು ಸಿಕ್ಕಿರಲಿಲ್ಲ. ಹೀಗಾಗಿ ದುರ್ರಾನಿ ಸೇನೆ ಎದುರು ಮರಾಠ ಸೇನೆ ಸೋತೋಗಿತ್ತು, ಅಫ್ಘನ್ನರು ಗೆದ್ದಿದ್ರು. ಗೆದ್ರೂ ಕೂಡ ನಂತರ ಬೆಳವಣಿಗೆಯಲ್ಲಿ ಅಫ್ಘನ್ನರು ಅಫ್ಘನಿಸ್ತಾನಕ್ಕೆ ವಾಪಸ್ ಹೋಗಬೇಕಾಯ್ತು. ಇದೇ ಮೂರನೇ ಪಾಣಿಪತ್ ಕದನ ಭಾರತದಲ್ಲಿ ಈಸ್ಟ್ ಇಂಡಿಯಾ ಕಂಪನಿಯ ಆಳ್ವಿಕೆ ಶುರುವಾಗಲು ನಾಂದಿಯಾಗಿತ್ತು. ಸೋ ಮೂರನೇ ಪಾಣಿಪತ್ ಕದನದಲ್ಲಿ ಮರಾಠರನ್ನ ಆಫ್ಘನ್ ದೊರೆ ದುರ್ರಾನಿ ಸೋಲಿಸಿದ ಘಟನೆಯಿಂದ ಸ್ಪೂರ್ತಿ ಪಡೆದ ತಾಲಿಬಾನಿಗಳು ಈಗ ತಮ್ಮ ಸೇನೆಯಲ್ಲಿ ಪಾಣಿಪತ್ ಅನ್ನೋ ಆಪರೇಷನಲ್ ಯೂನಿಟ್ ಶುರು ಮಾಡಿದ್ದಾರೆ.
ಈ ಘಟಕವನ್ನ ಅಫ್ಘನಿಸ್ತಾನದ ಪೂರ್ವದಲ್ಲಿರೋ ನಂಗರ್ಹಾರ್ ಪ್ರಾಂತ್ಯದಲ್ಲಿ ನಿಯೋಜನೆ ಮಾಡಲಾಗುತ್ತೆ. ಈ ನಂಗರ್ಹಾರ್ ಪ್ರಾಂತ್ಯ ಪಾಕಿಸ್ತಾನ ಜೊತೆ ಗಡಿ ಹಂಚಿಕೊಳ್ಳುತ್ತೆ ಅನ್ನೋದು ಇಂಟರೆಸ್ಟಿಂಗ್. ಇನ್ನು ಈ ಪಾಣಿಪತ್ ಆಪರೇಷನಲ್ ಯೂನಿಟ್ನ ಸದಸ್ಯರು ಸೇನಾ ಸಮವಸ್ತ್ರ ಧರಿಸಿ, ಅಮೆರಿಕದ ರೈಫಲ್ಗಳನ್ನ ಹಿಡಿದುಕೊಂಡು, ನಂಗರ್ಹಾರ್ ರಾಜಧಾನಿ ಜಲಾಲಾಬಾದ್ನಲ್ಲಿ ಪರೇಡ್ ನಡೆಸ್ತಿರೋ ಫೋಟೋಗಳನ್ನ ತಾಲಿಬಾನ್ ಶೇರ್ ಮಾಡ್ಕೊಂಡಿದೆ. ಆದ್ರೆ ತಾಲಿಬಾನ್ನ ಈ ಪಾಣಿಪತ್ ಮಿಲಿಟರಿ ಯೂನಿಟ್ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಪರ ವಿರೋಧ ಚರ್ಚೆ ಜೋರಾಗಿ ನಡೀತಿದೆ. ಕೆಲವರು ಇದನ್ನ ಹೊಗಳಿದ್ರೆ, ಇನ್ನೂ ಕೆಲವರು ಖಂಡಿಸಿದ್ದಾರೆ.
ಭಾರತವನ್ನ ದ್ವೇಷಿಸಲು ತಾಲಿಬಾನ್ ಈಥರ ಪಾಣಿಪತ್ ಅಂತ ಹೆಸರಿಟ್ಟಿದೆ ಎಂದು ಕೆಲವರು ಹೇಳಿದ್ರೆ. ಇನ್ನೂ ಕೆಲವರು ಹಿಸ್ಟರಿ ರಿಪೀಟ್ ಆಗುತ್ತೆ, ಹಿಂದೂಗಳು ಇದನ್ನ ಸ್ಪಷ್ಟ ಸಂಕೇತವಾಗಿ ತೆಗೆದುಕೊಳ್ಳಬೇಕು. ನಾವು ನಮ್ಮ ಪೂರ್ವಜರನ್ನ ಮರೆತಿಲ್ಲ. ಮುಸ್ಕಾನ್ ಸಹೋದರಿ, ನಿಮ್ಮ ಕೂಗು ನಮಗೆ ಕೇಳಿಸುತ್ತೆ ಅಂತೆಲ್ಲಾ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ. ಹಿಜಬ್ ವಿವಾದದಲ್ಲಿ ಮಂಡ್ಯದ ವಿದ್ಯಾರ್ಥಿನಿ ಮುಸ್ಕಾನ್ ಖಾನ್ ಫೇಮಸ್ ಆಗಿದ್ದಳು. ಕೆಲ ಸೋಷಿಯಲ್ ಮೀಡಿಯಾ ಯೂಸರ್ಸ್, ತಾಲಿಬಾನಿಗಳ ಪಾಣಿಪತ್ ಯೂನಿಟ್ ಹಿಂದೆ ಪಾಕಿಸ್ತಾನದ ಕೈವಾಡ ಇದೆ ಎಂದಿದ್ದಾರೆ.
ಅಫ್ಘನಿಸ್ತಾನದಲ್ಲಿ ಅಮೆರಿಕ ಮತ್ತು ನ್ಯಾಟೋ ಪಡೆಗಳು ಬಿಟ್ಟುಹೋದ ಶಸ್ತ್ರಾಸ್ತ್ರಗಳು ಪಾಕಿಸ್ತಾನದಲ್ಲಿ ಕಡಿಮೆ ಬೆಲೆಗೆ ಬಿಕರಿಯಾಗ್ತಿದೆ ಅಂತ ನಿನ್ನೆಯಷ್ಟೇ ಸುತ್ತು ಜಗತ್ತಿನಲ್ಲಿ ಹೇಳಿದ್ವಿ. ಈಗ ತಾಲಿಬಾನಿಗಳು ಪಾಣಿಪತ್ ಹೆಸರಲ್ಲಿ ಮಿಲಿಟರಿ ಯೂನಿಟ್ಟನ್ನೇ ಕ್ರಿಯೆಟ್ ಮಾಡಿದ್ದಾರೆ. ಈ ಎರಡು ದೇಶಗಳು ಸೇರ್ಕೊಂಡ್ ಭಾರತಕ್ಕೇನಾದ್ರೂ ಸಮಸ್ಯೆ ತಂದಿಡ್ತಾವಾ ಅನ್ನೋ ಆತಂಕ ಮೂಡಿದೆ. ಈ ಬಗ್ಗೆ ಭಾರತ ಎಚ್ಚರದಿಂದ ಇರಬೇಕು.
-masthmagaa.com
Contact Us for Advertisement