masthmagaa.com:
ನ್ಯೂಯಾರ್ಕ್: ಮಹಿಳಾ ವಿಭಾಗದ ಯುಎಸ್ ಓಪನ್ ಫೈನಲ್ ಪಂದ್ಯದಲ್ಲಿ ಜಪಾನ್ನ ನವೊಮಿ ಒಸಾಕ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ. 1 ಗಂಟೆ 53 ನಿಮಿಷಗಳ ಕಾಲ ನಡೆದ ಪೈಪೋಟಿಯಲ್ಲಿ 1–6, 6–3 ಮತ್ತು 6–3 ಅಂತರದಲ್ಲಿ ಬೆಲಾರಸ್ನ ವಿಕ್ಟೋರಿಯ ಅಜರೆಂಕಾ ಅವರನ್ನು ಸೋಲಿಸುವ ಮೂಲಕ ಮೂರನೇ ಗ್ರ್ಯಾನ್ಸ್ಲಾಂ ಮುಡಿಗೇರಿಸಿಕೊಂಡಿದ್ದಾರೆ. 22 ವರ್ಷ ವಯಸ್ಸಿನ ಒಸಾಕಾಗೆ ಇದು ಎರಡನೇ ಯುಎಸ್ ಓಪನ್ ಪ್ರಶಸ್ತಿಯಾಗಿದೆ. ಈ ಹಿಂದೆ 2018ರಲ್ಲಿ ಮೊದಲ ಬಾರಿಗೆ ಯುಎಸ್ ಓಪನ್ ಮತ್ತು 2019ರಲ್ಲಿ ಆಸ್ಟ್ರೇಲಿಯಾ ಓಪನ್ನಲ್ಲಿ ಗೆಲುವು ಸಾಧಿಸಿದ್ದರು.
ವಿಶೇಷ ಅಂದ್ರೆ ಈ ಬಾರಿಯ ಯುಎಸ್ ಓಪನ್ನಲ್ಲಿ ತಾವು ಆಡಿದ 7 ಪಂದ್ಯಗಳಲ್ಲೂ ಒಬ್ಬೊಬ್ಬರ ಹೆಸರಿನ ಮಾಸ್ಕ್ ಧರಿಸುವ ಮೂಲಕ ನವೊಮಿ ಒಸಾಕ ಎಲ್ಲರ ಗಮನ ಸೆಳೆದಿದ್ದಾರೆ. ಮೊದಲ ಪಂದ್ಯದಲ್ಲಿ ಬ್ರಿಯೋನ್ನಾ ಟೇಲರ್, ಎರಡನೇ ಪಂದ್ಯದಲ್ಲಿ ಎಲಿಜಾ ಮೆಕ್ಲೈನ್, ಮೂರನೇ ಪಂದ್ಯದಲ್ಲಿ ಅಹಮದ್ ಅರ್ಬೆರಿ, ಕ್ವಾರ್ಟರ್ ಫೈನಲ್ನಲ್ಲಿ ಜಾರ್ಜ್ ಫ್ಲಾಯಿಡ್, ಸೆಮಿ ಫೈನಲ್ನಲ್ಲಿ ಫಿಲಾಂಡೋ ಕ್ಯಾಸೈಲ್ ಮತ್ತು ಫೈನಲ್ನಲ್ಲಿ 12 ವರ್ಷದ ಬಾಲಕ ತಮೀರ್ ರೈಸ್ನ ಹೆಸರುಳ್ಳ ಮಾಸ್ಕ್ ಧರಿಸಿದ್ದರು.
ಇವರೆಲ್ಲರೂ ಅಮೆರಿಕದಲ್ಲಿ ಹಿಂಸಾಚಾರಕ್ಕೆ ಬಲಿಯಾದ ಕಪ್ಪು ವರ್ಣಿಯರಾಗಿದ್ದಾರೆ. ಅವರನ್ನು ಗೌರವಿಸುವ ಸಲುವಾಗಿ ಮತ್ತು ಅಮೆರಿಕದಲ್ಲಿ ನಡೆಯುತ್ತಿರುವ ಜನಾಂಗೀಯ ದ್ವೇಷದ ಬಗ್ಗೆ ಜಾಗೃತಿ ಮೂಡಿಸಲು ಈ ರೀತಿ ಮಾಡಿದ್ದಾರೆ. ಈ ಬಗ್ಗೆ ಮಾತನಾಡಿದ ನವೊಮಿ ಒಸಾಕ, ‘ನನ್ನ ಉದ್ದೇಶ ಜನರು ಈ ಬಗ್ಗೆ ಮಾತನಾಡಲಿ ಅನ್ನೋದು. ಈ ಮೂಲಕ ಜಾಗೃತಿ ಮೂಡಿಸೋದು. ಈ ವಿಚಾರದ ಬಗ್ಗೆ ಹೆಚ್ಚೆಚ್ಚು ಜನರಿಗೆ ಗೊತ್ತಾದಂತೆ ಅದರಲ್ಲಿ ಅವರು ಹೆಚ್ಚು ಆಸಕ್ತರಾಗುತ್ತಾರೆ’ ಎಂದಿದ್ದಾರೆ.
-masthmagaa.com
Contact Us for Advertisement