masthmagaa.com:
ಟೋಕಿಯೋ ಒಲಿಂಪಿಕ್ಸ್ನ ಪುರುಷರ ಹಾಕಿ ಸೆಮಿ ಫೈನಲ್ನಲ್ಲಿ ಭಾರತಕ್ಕೆ ನಿರಾಸೆಯಾಗಿದೆ. ಭಾರತ ಮತ್ತು ಬೆಲ್ಜಿಯಂ ತಂಡಗಳ ನಡುವೆ ಇವತ್ತು ನಡೆದ ಸೆಮೀಸ್ನಲ್ಲಿ ಬೆಲ್ಜಿಯಂ 5-2 ಗೋಲುಗಳಿಂದ ಭಾರತವನ್ನ ಸೋಲಿಸಿದೆ. ಈ ಮೂಲಕ ಭಾರತದ ಚಿನ್ನದ ಪದಕ ಕನಸು ನುಚ್ಚು ನೂರಾಗಿದೆ. ಆದ್ರೆ ಕಂಚಿನ ಪದಕದ ಆಸೆ ಇನ್ನೂ ಜೀವಂತವಾಗುಳಿದಿದೆ. ಇವತ್ತಿನ ಮ್ಯಾಚನ್ನ ಪ್ರಧಾನಿ ಮೋದಿ ಕೂಡ ವೀಕ್ಷಿಸಿದ್ರು. ಮ್ಯಾಚ್ ಮುಗಿದ ಬಳಿಕ ತಂಡದ ನಾಯಕ ಮನ್ಪ್ರೀತ್ ಸಿಂಗ್ ಜೊತೆ ಪ್ರಧಾನಿ ದೂರವಾಣಿ ಮೂಲಕ ಮಾತನಾಡಿದ್ದಾರೆ. ಆಗಸ್ಟ್ 5ನೇ ತಾರೀಖು ಜರ್ಮನಿ ಜೊತೆ ಭಾರತ ಕಂಚಿನ ಪದಕಕ್ಕೆ ಸೆಣಸಾಟ ನಡೆಸಲಿದೆ. ಇನ್ನು ನಾಳೆ ಮಧ್ಯಾಹ್ನ 3.30ಕ್ಕೆ ಮಹಿಳೆಯರ ಹಾಕಿ ಸೆಮಿ ಫೈನಲ್ ಮ್ಯಾಚ್ ನಡೆಯಲಿದೆ. ಇದರಲ್ಲಿ ಭಾರತದ ವನಿತೆಯರು ಮತ್ತು ಅರ್ಜೆಂಟೀನಾ ವನಿತೆಯರು ಮುಖಾಮುಖಿಯಾಗಲಿದ್ದಾರೆ. ಬಾಕ್ಸಿಂಗ್ ಸೆಮಿ ಫೈನಲ್ನಲ್ಲಿ ಭಾರತದ ಲೊವ್ಲೀನಾ ಬೋರ್ಗಾಹೈನ್ ಮತ್ತು ಟರ್ಕಿ ಆಟಗಾತಿ ನಡುವೆ ನಾಳೆ ಬೆಳಗ್ಗೆ 11 ಗಂಟೆಗೆ ಮ್ಯಾಚ್ ನಡೆಯಲಿದೆ. ಇನ್ನು ಬ್ಯಾಡ್ಮಿಂಟನ್ ಮಹಿಳೆಯರ ಸಿಂಗಲ್ಸ್ನಲ್ಲಿ ಕಂಚು ಗೆದ್ದಿದ್ದ ಪಿ.ಸಿ. ಸಿಂಧು ತಮ್ಮ ಕೋಚ್ ಜೊತೆ ಇವತ್ತು ದೆಹಲಿಗೆ ಬಂದಿದ್ದಾರೆ. ಇನ್ನು ಇವತ್ತು ಮೆಡಲ್ಸ್ ಪಟ್ಟಿಯಲ್ಲಿ ಯಾರು ಎಷ್ಟನೇ ಸ್ಥಾನದಲ್ಲಿದ್ದಾರೆ ಅಂತ ನೋಡೋದಾದ್ರೆ, 32 ಚಿನ್ನದ ಪದಕಗಳೊಂದಿಗೆ ಚೀನಾ ಮೊದಲ ಸ್ಥಾನದಲ್ಲಿದೆ. ಉಳಿದಂತೆ ಯುಎಸ್ 24, ಜಪಾನ್ 19, ಆಸ್ಟ್ರೇಲಿಯಾ 14 ಚಿನ್ನದ ಪದಕಗಳೊಂದಿಗೆ ಟಾಪ್ ಫೋರ್ನಲ್ಲಿವೆ. ಭಾರತ ಒಂದು ಬೆಳ್ಳಿ, ಒಂದು ಕಂಚಿನ ಪದಕದೊಂದಿಗೆ 64ನೇ ಸ್ಥಾನದಲ್ಲಿದೆ.
-masthmagaa.com
Contact Us for Advertisement