masthmagaa.com:
ಕೇಂದ್ರದ 3 ಕೃಷಿ ಕಾನೂನುಗಳನ್ನ ವಿರೋಧಿಸಿ ನಡೆಯುತ್ತಿರೋ ಪ್ರತಿಭಟನೆಗೆ ಸಂಬಂಧಿಸಿದಂತೆ ಟ್ವಿಟ್ಟರ್ನಲ್ಲಿ ಸಾಕಷ್ಟು ಸುಳ್ಳು ಸುದ್ದಿ ಮತ್ತು ಪ್ರಚೋದನಾಕಾರಿ ಕಂಟೆಂಟ್ಗಳನ್ನ ಹಾಕುತ್ತಿದ್ದ 1,178 ಅಕೌಂಟ್ಗಳನ್ನ ತೆಗೆದು ಹಾಕುವಂತೆ ಕೇಂದ್ರ ಸರ್ಕಾರ ಇತ್ತೀಚೆಗೆ ಟ್ವಿಟ್ಟರ್ ಸಂಸ್ಥೆಗೆ ಸೂಚಿಸಿತ್ತು. ಸೂಕ್ತ ಕ್ರಮ ಕೈಗೊಳ್ಳದಿದ್ರೆ ಸಂಸ್ಥೆ ವಿರುದ್ಧ ಕ್ರಮ ಕೈಗೊಳ್ಳಬೇಕಾಗಬಹುದು ಅಂತಾನೂ ಎಚ್ಚರಿಸಿತ್ತು. ಇದರ ಬೆನ್ನಲ್ಲೇ ಎಚ್ಚೆತ್ತಿರೋ ಟ್ವಿಟ್ಟರ್ ಸಂಸ್ಥೆ, ನಿಯಮಗಳನ್ನ ಸ್ಪಷ್ಟವಾಗಿ ಉಲ್ಲಂಘಿಸಿರೋ ಸುಮಾರು 500ಕ್ಕೂ ಹೆಚ್ಚು ಅಕೌಂಟ್ಗಳನ್ನ ತಡೆ ಹಿಡಿದಿದೆ. ಕೆಲವೊಂದು ಅಕೌಂಟ್ಗಳನ್ನಂತೂ ಪರ್ಮನೆಂಟ್ ಆಗಿ ಅಮಾನತು ಮಾಡಿದೆ. ಆದ್ರೆ ಸಾಮಾಜಿಕ ಹೋರಾಟಗಾರರು, ರಾಜಕಾರಣಿಗಳು ಮತ್ತು ಮಾಧ್ಯಮ ಸಂಸ್ಥೆಗಳ ಅಕೌಂಟ್ಗಳನ್ನ ಬ್ಲಾಕ್ ಮಾಡಿಲ್ಲ. ಅವುಗಳನ್ನ ಬ್ಲಾಕ್ ಮಾಡಿದ್ರೆ ಅಭಿವ್ಯಕ್ತ ಸ್ವಾತಂತ್ರ್ಯವನ್ನ ಕಿತ್ತುಕೊಂಡಂತಾಗುತ್ತೆ ಅಂತ ಟ್ವಿಟ್ಟರ್ ಸ್ಪಷ್ಟನೆ ಕೊಟ್ಟಿದೆ. ಇನ್ನು ಬ್ಲಾಕ್ ಆಗಿರುವ ಖಾತೆಗಳು ಭಾರತದಲ್ಲಿ ಮಾತ್ರ ವರ್ಕ್ ಆಗಲ್ಲ. ಬೇರೆ ದೇಶದಲ್ಲಿ ವರ್ಕ್ ಆಗುತ್ತೆ. ಆದ್ರೆ ಯಾರ ಯಾರ ಅಕೌಂಟ್ಗಳನ್ನ ಬ್ಲಾಕ್ ಮಾಡಲಾಗಿದೆ ಅನ್ನೋದನ್ನ ಬಹಿರಂಗಪಡಿಸಿಲ್ಲ. ಹೀಗೆ ತಾವು ತೆಗೆದುಕೊಂಡ ಕ್ರಮದ ಬಗ್ಗೆ ಮಿನಿಸ್ಟ್ರಿ ಆಫ್ ಎಲೆಕ್ಟ್ರಾನಿಕ್ಸ್ ಮತ್ತು ಇನ್ಫಾರ್ಮೇಷನ್ ಟೆಕ್ನಾಲಜಿಗೆ ಮಾಹಿತಿ ನೀಡಿದೆ ಟ್ವಿಟ್ಟರ್ ಸಂಸ್ಥೆ. ಒಂದ್ಕಡೆ ರೂಲ್ಸ್ ಬ್ರೇಕ್ ಮಾಡಿದ ಅಕೌಂಟ್ಗಳನ್ನ ಬ್ಲಾಕ್ ಮಾಡಿದ್ದೇವೆ, ಮತ್ತೊಂದ್ಕಡೆ ಅಭಿವ್ಯಕ್ತ ಸ್ವಾತಂತ್ರ್ಯವನ್ನ ಕಿತ್ತುಕೊಳ್ಳಲು ಸಾಧ್ಯವಿಲ್ಲ ಅಂತಾನೂ ಟ್ವಿಟ್ಟರ್ ಹೇಳಿದೆ. ಅತ್ತ ಟ್ವಿಟ್ಟರ್ ಜೊತೆ ಫೈಟ್ ಏರ್ಪಟ್ಟ ಬೆನ್ನಲ್ಲೇ ಅದಕ್ಕೆ ಪರ್ಯಾಯವಾಗಿ ಕೇಂದ್ರದ ಸಚಿವರು ‘Koo’ ಅನ್ನೋ ಭಾರತದ ಅಪ್ಲಿಕೇಶನ್ ಅನ್ನು ಪ್ರಮೋಟ್ ಮಾಡ್ತಿದ್ದಾರೆ.
-masthmagaa.com
Contact Us for Advertisement