masthmagaa.com:
ಕಳೆದ 20 ವರ್ಷಗಳಿಂದ ಅಫ್ಘನಿಸ್ತಾನದಲ್ಲಿರೋ ಅಮೆರಿಕ ಸೇನೆ ಈ ವರ್ಷದ ಸೆಪ್ಟೆಂಬರ್ 11ರ ಒಳಗೆ ಅಫ್ಘನಿಸ್ತಾನದಿಂದ ಕಂಪ್ಲೀಟ್ ಆಗಿ ಗಂಟುಮೂಟೆ ಕಟ್ಕೊಂಡು ಅಮೆರಿಕಕ್ಕೆ ವಾಪಸ್ ಬರಲಿದೆ ಅಂತ ಅಮೆರಿಕದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅಮೆರಿಕ ಸೇನೆಯನ್ನ ಹಿಂದಕ್ಕೆ ಕರೆಸಿಕೊಳ್ಳೋ ಸಂಬಂಧ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಇವತ್ತು ಘೋಷಣೆ ಮಾಡಲಿದ್ದಾರೆ. ಈ ಮೂಲಕ ಅಮೆರಿಕ ಕಂಡ ಅತಿ ದೀರ್ಘಾವಧಿ ಯುದ್ಧ ಅಂತ್ಯವಾಗಲಿದೆ. ವಿಯೆಟ್ನಾಂನಲ್ಲಿ ಅಮೆರಿಕ ಸೇನೆ 19 ವರ್ಷಗಳ ಕಾಲ ಇತ್ತು. ಅಫ್ಘನಿಸ್ತಾನದಲ್ಲಿ 20 ವರ್ಷ ಆಗ್ತಿದೆ. ಅಂದ್ಹಾಗೆ 2001ರ ಸೆಪ್ಟೆಂಬರ್ 11ರಂದು ಮಂಗಳವಾರ ಅಲ್-ಖೈದಾ ಉಗ್ರರು ಅಮೆರಿಕದ ವರ್ಲ್ಡ್ ಟ್ರೇಡ್ ಸೆಂಟರ್ಗೆ ವಿಮಾನ ನುಗ್ಗಿಸಿ ದಾಳಿ ನಡೆಸಿದ್ರು. ದಾಳಿಯಲ್ಲಿ ಸುಮಾರು ಮೂರು ಸಾವಿರ ಜನ ಮೃತಪಟ್ಟಿದ್ರು. ಅದಾದ ಬಳಿಕ ಅಫ್ಘನಿಸ್ತಾನದಲ್ಲಿದ್ದ ತಾಲಿಬಾನ್ ಮತ್ತು ಅಲ್-ಖೈದಾ ಕ್ಯಾಂಪ್ಗಳ ಮೇಲೆ ಅಮೆರಿಕ ದಾಳಿ ನಡೆಸ್ತು. ಆಫ್ಘನಿಸ್ತಾನದಲ್ಲಿದ್ದ ತಾಲಿಬಾನ್ ಸರ್ಕಾರವನ್ನ ಕೆಳಗಿಳಿಸ್ತು ಅಮೆರಿಕ. ನಂತ್ರ 2011ರಲ್ಲಿ ಅಂದ್ರೆ WTO ಮೇಲೆ ದಾಳಿ ನಡೆದು 10 ವರ್ಷಗಳಾದ ಬಳಿಕ ಪಾಕಿಸ್ತಾನದಲ್ಲಿ ಅಡಗಿ ಕೂತಿದ್ದ ಒಸಮಾ ಬಿನ್ ಲಾಡೆನ್ ಅನ್ನ ಮುಗಿಸಿಬಿಡ್ತು ಅಮೆರಿಕ. 2001ರಿಂದ ಅಫ್ಘನಿಸ್ತಾನದಲ್ಲಿ ಅಮೆರಿಕ ನಡೆಸುತ್ತಿರೋ ದಾಳಿಯಲ್ಲಿ ಇದುವರೆಗೆ ಸುಮಾರು 2,400 ಅಮೆರಿಕ ಯೋಧರು ಪ್ರಾಣ ಕಳೆದುಕೊಂಡಿದ್ದಾರೆ. 20 ವರ್ಷದ ಕಾರ್ಯಾಚರಣೆಗೆ ಸುಮಾರು 2 ಟ್ರಿಲಿಯನ್ ಡಾಲರ್ ಖರ್ಚಾಗಿದೆ ಅಂತಾನೂ ಅಂದಾಜಿಸಲಾಗಿದೆ. ಅಫ್ಘನಿಸ್ತಾನದಿಂದ ಸೇನೆಯನ್ನ ಹಿಂಪಡೆಯಲು ಡೊನಾಲ್ಡ್ ಟ್ರಂಪ್ ಮೇ 1ರ ಡೆಡ್ಲೈನ್ ಹಾಕ್ಕೊಂಡಿದ್ರು. ಆದ್ರೀಗ ಬೈಡೆನ್ ಸರ್ಕಾರ ಸೆಪ್ಟೆಂಬರ್ 11ರ ಡೆಡ್ಲೈನ್ ಹಾಕ್ಕೊಂಡಿದ್ದಾರೆ. 2011ರ ವೇಳೆಗೆ ಅಫ್ಘನಿಸ್ತಾನದಲ್ಲಿ 1 ಲಕ್ಷ ಅಮೆರಿಕದ ಯೋಧರು ಇದ್ದರು. ಬಳಿಕ ಆ ಸಂಖ್ಯೆ ಕಮ್ಮಿಯಾಗ್ತಾ ಬಂತು.
-masthmagaa.com
Contact Us for Advertisement