masthmagaa.com:
ಯುಕ್ರೇನ್ ಮತ್ತು ರಷ್ಯಾ ನಡುವಿನ ಸಂಘರ್ಷವನ್ನ ಕಮ್ಮಿ ಮಾಡೋ ಉದ್ದೇಶದಿಂದ ಎರಡು ದೇಶಗಳಿಗೆ ಹೋಗಿ, ರಷ್ಯಾ ಅಧ್ಯಕ್ಷ ಪುಟಿನ್ ಮತ್ತು ಯುಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿಯನ್ನ ಭೇಟಿಯಾಗಿ ಮಾತುಕತೆ ನಡೆಸಿದ್ದ ಫ್ರಾನ್ಸ್ ಅಧ್ಯಕ್ಷ ಇಮ್ಯಾನ್ಯುಯೆಲ್ ಮ್ಯಾಕ್ರನ್ ಇದೀಗ ಮಾತುಕತೆಯ ಸಂಪೂರ್ಣ ವಿವರಣೆಯನ್ನ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ಗೆ ಕೊಟ್ಟಿದ್ದಾರೆ. ಬೈಡೆನ್ಗೆ ಕಾಲ್ ಮಾಡಿರೋ ಮ್ಯಾಕ್ರನ್ ಮೀಟಿಂಗ್ ಬಗ್ಗೆ ಚರ್ಚೆ ನಡೆಸಿದ್ದಾರೆ ಅಂತ ವೈಟ್ ಹೌಸ್ ಹೇಳಿದೆ.
ಅತ್ತ ಯುಕೆ ಪ್ರಧಾನಿ ಬೋರಿಸ್ ಜಾನ್ಸನ್ ಇವತ್ತು ಬೆಲ್ಜಿಯಂ ಮತ್ತು ಪೋಲ್ಯಾಂಡ್ಗೆ ಹೋಗಲಿದ್ದಾರೆ. ಬೆಲ್ಜಿಯಂ ರಾಜಧಾನಿ ಬ್ರಸ್ಸೆಲ್ಸ್ನಲ್ಲಿ ನ್ಯಾಟೋ ಮುಖ್ಯಸ್ಥ ಜೇನ್ಸ್ ಸ್ಟೋಲನ್ಬರ್ಗ್ರನ್ನ ಭೇಟಿಯಾಗಲಿದ್ದಾರೆ. ನಂತ್ರ ಪೊಲ್ಯಾಂಡ್ ರಾಜಧಾನಿ ವಾರ್ಸಾಗೆ ಹೋಗಿ ಅಲ್ಲಿನ ನಾಯಕರನ್ನ ಭೇಟಿಯಾಗಲಿದ್ದಾರೆ. ನ್ಯಾಟೋ ಮುಖ್ಯಸ್ಥರ ಭೇಟಿಗೂ ಮುನ್ನ ಮಾತನಾಡಿರೋ ಬೋರಿಸ್ ಜಾನ್ಸನ್, ಯುಕ್ರೇನ್ ವಿಚಾರದಲ್ಲಿ ನ್ಯಾಟೋ ಮಿತ್ರರಾಷ್ಟ್ರಗಳು ತಮ್ಮ ತತ್ವಗಳನ್ನ ಕಾಂಪ್ರಮೈಸ್ ಮಾಡಿಕೊಳ್ಳಬಾರ್ದು ಅಂತ ಕರೆ ಕೊಟ್ಟಿದ್ದಾರೆ.
ಮತ್ತೊಂದುಕಡೆ ರಷ್ಯಾ ಮತ್ತು ಅದರ ಕುಚಿಕು ದೇಶ ಬೆಲಾರುಸ್ ನಡುವೆ ಇವತ್ತಿನಿಂದ 10 ದಿನಗಳ ಕಾಲ ಜಂಟಿ ಸೇನಾಭ್ಯಾಸ ನಡೆಯಲಿದೆ. ರಷ್ಯಾ ಮತ್ತು ಯುಕ್ರೇನ್ ಪಕ್ಕದಲ್ಲಿರೋ ಬೆಲಾರುಸ್ನಲ್ಲಿ ಈ ಮಿಲಿಟರಿ ಡ್ರಿಲ್ ನಡೆಯಲಿದೆ. ಇದಕ್ಕಾಗಿ ರಷ್ಯಾ ಸೇನೆಯ ಸುಮಾರು 30,000 ಯೋಧರು, S-400 ಸರ್ಫೇಸ್ ಟು ಏರ್ ಮಿಸೈಲ್ ಸಿಸ್ಟಂನ ಎರಡು ಬೆಟಾಲಿಯನ್ ಮತ್ತು ಹಲವು ಫೈಟರ್ ಜೆಟ್ಗಳನ್ನ ರಷ್ಯಾ ಬೆಲಾರುಸ್ಗೆ ಕಳಿಸಿದೆ. ಇದರಲ್ಲಿ ಹೆಚ್ಚಿನ ಶಸ್ತ್ರಾಸ್ತ್ರಗಳನ್ನ ಯುಕ್ರೇನ್ ಗಡಿ ಸಮೀಪ ಇರೋ ಲೊಕೇಷನ್ಗಳಿಗೆ ಕಳಿಸಲಾಗಿದೆ ಅನ್ನೋದು ಉಪಗ್ರಹ ಚಿತ್ರಗಳಲ್ಲಿ ಗೊತ್ತಾಗಿದೆ. ಬೆಲಾರುಸ್ ಗಡಿಯಿಂದ ಯುಕ್ರೇನ್ ರಾಜಧಾನಿ ಕ್ವಿವ್ ಕೇವಲ 210 ಕಿಲೋ ಮೀಟರ್ ದೂರದಲ್ಲಿದೆ ಅನ್ನೋದು ಕೂಡ ಗಮನಾರ್ಹ.
ಯುಕ್ರೇನ್ ಮೇಲೆ ರಷ್ಯಾ ಆಕ್ರಮಣ ಮಾಡ್ಬೋದು ಅನ್ನೋ ಆತಂಕ ಇರುವಾಗಲೇ ಈ ಜಂಟಿ ಮಿಲಿಟರಿ ಡ್ರಿಲ್ ನಡೆಸೋದು ಸರಿಯಲ್ಲ, ಸಮಸ್ಯೆ ಮತ್ತಷ್ಟು ಉಲ್ಬಣ ಆಗುತ್ತೆ, ಇದನ್ನ ಕೈ ಬಿಡಬೇಕು ಅಂತ ಅಮೆರಿಕ ಮತ್ತು ನ್ಯಾಟೋ ಪದೇಪದೇ ಆಗ್ರಹಿಸಿದ್ವು. ಆದ್ರೆ ರಷ್ಯಾ ಮಾತ್ರ ನಾವಿದನ್ನ ಮೊದಲೇ ಪ್ಲಾನ್ ಮಾಡಿದ್ವಿ, ಮಿಲಿಟರಿ ಡ್ರಿಲ್ ಮುಗಿದ ಬಳಿಕ ನಮ್ಮ ಸೇನೆಯನ್ನ ಬೆಲಾರುಸ್ನಿಂದ ವಾಪಸ್ ಕರೆಸಿಕೊಳ್ತೀವಿ ಅಂತ ಹೇಳ್ತಿದೆ.
ಅಂದ್ಹಾಗೆ ಈ ಹಿಂದೆ ಸೋವಿಯತ್ ಒಕ್ಕೂಟದಲ್ಲಿದ್ದ ಬೆಲಾರುಸ್ ಈಗ ರಷ್ಯಾದ ಕುಚಿಕು ಆಗಿದೆ. ಬೆಲಾರುಸ್ ಅಧ್ಯಕ್ಷ ಅಲೆಕ್ಸಾಂಡರ್ ಲುಕಶೆಂಕೊ ಮತ್ತು ರಷ್ಯಾ ಅಧ್ಯಕ್ಷ ಪುಟಿನ್ ಇಬ್ಬರೂ ಒಳ್ಳೇ ಫ್ರೆಂಡ್ಸ್ ಆಗಿದ್ದಾರೆ. 2020ರ ಬೆಲಾರುಸ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅಕ್ರಮ ನಡೆದಿದೆ ಅಂತ ದೇಶವ್ಯಾಪಿ ಭಾರಿ ಪ್ರತಿಭಟನೆ ನಡೆದಿತ್ತು. ಹಲವು ಪಾಶ್ಚಿಮಾತ್ಯ ದೇಶಗಳು ಬೆಲಾರುಸ್ ಮೇಲೆ ಸ್ಯಾಂಕ್ಷನ್ಸ್ ಹೇರಿದ್ವು ಮತ್ತು ಎಲೆಕ್ಷನ್ ರಿಸಲ್ಟ್ ಅನ್ನ ರೆಕಗ್ನೈಜ್ ಮಾಡಲು ನಿರಾಕರಿಸಿದ್ವು.
ಅಂಥಾ ಟೈಮಲ್ಲಿ ಲುಕಶೆಂಕೊಗೆ ಪುಟಿನ್ ಸಂಪೂರ್ಣ ಬೆಂಬಲ ಕೊಟ್ಟಿದ್ರು. ಹೀಗೆ ಉತ್ತರದಲ್ಲಿ ಬೆಲಾರುಸ್, ದಕ್ಷಿಣದಲ್ಲಿ ರಷ್ಯಾ ಆಕ್ರಮಿತ ಕ್ರೈಮಿಯಾ ಮತ್ತು ಪೂರ್ವದಲ್ಲಿ ರಷ್ಯಾ ಬೆಂಬಲಿತ ಪ್ರತ್ಯೇಕತಾವಾದಿಗಳು – ಮೂರೂ ಕಡೆಯಿಂದಲೂ ಯುಕ್ರೇನ್ ಅನ್ನ ರಷ್ಯಾ ಸುತ್ತುವರಿದಂತಾಗಿದೆ. ಯುಕ್ರೇನ್ನ ಉತ್ತರ ಭಾಗದಲ್ಲಿ ಸುಮಾರು 1 ಲಕ್ಷ ಯೋಧರನ್ನ ರಷ್ಯಾ ನಿಯೋಜಿಸಿರಬಹುದು ಅಂತ ಪೆಂಟಗನ್ ವಕ್ತಾರ ಜಾನ್ ಕಿರ್ಬಿ ಹೇಳಿದ್ದಾರೆ.
-masthmagaa.com
Contact Us for Advertisement