masthmagaa.com:
ಅಫ್ಘನಿಸ್ತಾನದಲ್ಲಿ ಶಿಯಾ ಅಲ್ಪಸಂಖ್ಯಾತರನ್ನ ಗುರಿಯಾಗಿಸಿ ನಡೆಸುತ್ತಿರುವ ಆತ್ಮಾಹುತಿ ದಾಳಿ ಮುಂದುವರಿದಿದೆ. ಇವತ್ತು ಕಂದಾಹಾರ್ ನಗರದಲ್ಲಿ ಶಿಯಾ ಮುಸ್ಲಿಮರಿಗೆ ಸೇರಿದ ಮಸೀದಿಯಲ್ಲಿ ಸ್ಫೋಟ ಸಂಭವಿಸಿ, ಕನಿಷ್ಠ 33 ಜನ ಮೃತಪಟ್ಟಿದ್ದಾರೆ. 73ಕ್ಕೂ ಹೆಚ್ಚು ಜನ ಗಾಯಗೊಂಡಿದ್ದಾರೆ. ಮೃತರು ಮತ್ತು ಗಾಯಗೊಂಡವರ ಸಂಖ್ಯೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ. ಶುಕ್ರವಾರದ ಪ್ರಾರ್ಥನೆಗೆ ಅಂತ ಹೆಚ್ಚು ಜನ ಮಸೀದಿಯಲ್ಲಿ ಸೇರಿದ್ದರು. ಈ ವೇಳೆ ಮೂವರು ಆತ್ಮಾಹುತಿ ದಾಳಿಕೋರರು ತಮ್ಮನ್ನ ತಾವು ಸ್ಫೋಟಿಸಿಕೊಂಡಿದ್ದಾರೆ. ಇಬ್ಬರು ಮಸೀದಿ ಒಳಗೆ ಸ್ಫೋಟಿಸಿಕೊಂಡ್ರೆ, ಓರ್ವ ಪ್ರವೇಶ ದ್ವಾರದಲ್ಲಿ ಸ್ಫೋಟಿಸಿಕೊಂಡಿದ್ದಾನೆ ಅಂತ ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ. ಕಳೆದ ಶುಕ್ರವಾರ ಕೂಡ ಕುಂದುಝ್ ನಗರದಲ್ಲಿ ಶಿಯಾ ಮುಸ್ಲಿಮರ ಮಸೀದಿ ಮೇಲೆ ಇದೇ ಥರದ ಆತ್ಮಾಹುತಿ ದಾಳಿ ನಡೆದಿತ್ತು. ಅದರಲ್ಲಿ 80 ಜನ ಪ್ರಾಣ ಕಳ್ಕೊಂಡಿದ್ರು. ಈಗ ಕಂದಹಾರ್ನಲ್ಲಿ… ಅಂದ್ಹಾಗೆ ತಾಲಿಬಾನಿಗಳು ಸುನ್ನಿ ಮುಸ್ಲಿಮರು. ಅಫ್ಘನಿಸ್ತಾನದಲ್ಲಿ ಸುನ್ನಿಗಳೇ ಬಹುಸಂಖ್ಯಾತರು. ಶಿಯಾಗಳು ಅಲ್ಪಾಸಂಖ್ಯಾತರು. ಇದೀಗ ಶಿಯಾಗಳನ್ನ ಗುರಿಯಾಗಿಸಿ ಮಾಡಿದ ದಾಳಿಯನ್ನ ಶಿಯಾ ಬಹುಸಂಖ್ಯಾತರಿರೋ ಇರಾನ್ ಖಂಡಿಸಿದೆ. ಅಫ್ಘನಿಸ್ತಾನದ ಪಕ್ಕದಲ್ಲೇ ಇದೆ ಈ ಇರಾನ್.
-masthmagaa.com
Contact Us for Advertisement