masthmagaa.com:
ಕೊರೋನಾ ಲಸಿಕೆಯನ್ನ ಏಪ್ರಿಲ್ 1ರಿಂದ 45 ವರ್ಷ ಮೇಲ್ಪಟ್ಟವರಿಗೂ ಕೊಡೋಕೆ ಕೇಂದ್ರ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. ಇದುವರೆಗೆ ಆರೋಗ್ಯ ಕಾರ್ಯಕರ್ತರು, ಫಂಟ್ಲೈನ್ ವರ್ಕರ್ಸ್, 60 ವರ್ಷ ಮೇಲ್ಪಟ್ಟವರು ಮತ್ತು ವಿವಿಧ ಕಾಯಿಲೆಗಳಿಂದ ಬಳಲುತ್ತಿರುವ 45 ವರ್ಷ ಮೇಲ್ಪಟ್ಟವರಿಗೆ ಮಾತ್ರ ಕೊರೋನಾ ಲಸಿಕೆ ಹಾಕಲಾಗ್ತಿತ್ತು. ಆದ್ರೀಗ 45 ವರ್ಷ ಮೇಲ್ಪಟ್ಟರೆಲ್ಲರೂ ಲಸಿಕೆ ಹಾಕಿಸಿಕೊಳ್ಳಲು ಅರ್ಹರು ಅಂತ ಕೇಂದ್ರ ಸರ್ಕಾರ ಘೋಷಣೆ ಮಾಡಿದೆ. ಈ ಸಂಬಂಧ ಇವತ್ತು ಕೇಂದ್ರ ಸಚಿವ ಪ್ರಕಾಶ್ ಜಾವ್ಡೇಕರ್ ಮಾಹಿತಿ ನೀಡಿದ್ರು. ಅಲ್ಲದೆ 45 ವರ್ಷ ಮೇಲ್ಪಟ್ಟವರೆಲ್ಲರೂ ಈಗಲೇ ತಮ್ಮ ಹೆಸರನ್ನ ನೋಂದಾಯಿಸಿಕೊಂಡು ಲಸಿಕೆ ಹಾಕಿಸಿಕೊಳ್ಳಿ ಅಂತ ಕರೆ ಕೊಟ್ಟಿದ್ದಾರೆ. ದೇಶದಲ್ಲಿ ಕೊರೋನಾ ಸೋಂಕಿನ ಎರಡನೇ ಅಲೆ ಎದ್ದಿರೋ ಬೆನ್ನಲ್ಲೇ ಲಸಿಕೆಯನ್ನ ಎಲ್ಲಾ ಏಜ್ ಗ್ರೂಪ್ನವರಿಗೆ ಓಪನ್ ಅಪ್ ಮಾಡ್ಬೇಕು. ಎಷ್ಟುಸಾಧ್ಯವೋ ಅಷ್ಟುಬೇಗ ಹೆಚ್ಚೆಚ್ಚು ಜನರಿಗೆ ಲಸಿಕೆ ಹಾಕಬೇಕು ಅನ್ನೋ ಕೂಗು ಕೇಳಿ ಬಂದಿತ್ತು. ಕೊನೆಗೂ ಕೇಂದ್ರ ಸರ್ಕಾರ ಈ ನಿಟ್ಟಿನಲ್ಲಿ ಒಂದು ಹೆಜ್ಜೆ ಮುಂದೆ ಇಟ್ಟಿದೆ. ನಮ್ಮ, ನಿಮ್ಮ ಮನೆಯಲ್ಲೂ 45 ವರ್ಷ ಮೇಲ್ಪಟ್ಟವರು ಇರಬಹುದು. ಅಥವಾ ಅಕ್ಕಪಕ್ಕದವರು, ಪರಿಚಯದವರು, ಫ್ರೆಂಡ್ಸ್ ಇರಬಹುದು. ಅವರೆಲ್ಲಾ ಲಸಿಕೆ ಹಾಕಿಸಿಕೊಳ್ಳೋದು ಹೇಗೆ ಅನ್ನೋದು ಸಾಕಷ್ಟು ಜನರಿಗೆ ಗೊತ್ತಿರಲ್ಲ. ಅದನ್ನ ಸಿಂಪಲ್ಲಾಗಿ ಹೇಳ್ತೀವಿ ನೋಡಿ.
– ನಿಮ್ಮ ಮೊಬೈಲ್ನಲ್ಲಿ ಆರೋಗ್ಯ ಸೇತು ಅಪ್ಲಿಕೇಷನ್ ಓಪನ್ ಮಾಡಿ. ಈ ಅಪ್ಲಿಕೇಷನ್ ಇಲ್ಲ ಅಂದ್ರೆ ಡೌನ್ಲೋಡ್ ಮಾಡಿಕೊಳ್ಳಿ.
– ಅಪ್ಲಿಕೇಷನ್ ಓಪನ್ ಮಾಡಿದ ತಕ್ಷಣ ಮೇಲ್ಗಡೆನೇ ನಿಮ್ಗೆ ವ್ಯಾಕ್ಸಿನೇಷನ್ ಅನ್ನೋದು ಕಾಣುತ್ತೆ. ಅದರ ಮೇಲೆ ಕ್ಲಿಕ್ ಮಾಡಿ.
– ನಿಮ್ಮ ಮೊಬೈಲ್ ನಂಬರ್ ಟೈಪ್ ಮಾಡಿ, ಒಟಿಪಿ ಅನ್ನೋದ್ರ ಮೇಲೆ ಕ್ಲಿಕ್ ಮಾಡಿ. ನಂತ್ರ ನಿಮ್ಮ ಮೊಬೈಲ್ಗೆ ಬರುವ ಒಟಿಪಿಯನ್ನ ಟೈಪ್ ಮಾಡಿ ವೆರಿಫೈ ಮಾಡಿಕೊಳ್ಳಿ.
– ಒಬ್ಬ ವ್ಯಕ್ತಿ ಮ್ಯಾಕ್ಸಿಮಮ್ ನಾಲ್ವರ ಹೆಸರನ್ನ ಲಸಿಕೆಗೆ ರಿಜಿಸ್ಟರ್ ಮಾಡ್ಬೋದು ಅಂತ ತೋರಿಸುತ್ತೆ. ನಂತರ ಲಸಿಕೆ ಹಾಕಿಸಿಕೊಳ್ಳೋರು ಆಸ್ಪತ್ರೆಗೆ ಬರುವಾಗ ತರುವ ದಾಖಲೆಯನ್ನ ಸೆಲೆಕ್ಟ್ ಮಾಡ್ಬೇಕು. ಆಧಾರ್ ಕಾರ್ಡ್, ವೋಟರ್ ಐಡಿ, ಡ್ರೈವಿಂಗ್ ಲೈಸೆನ್ಸ್ ಯಾವುದಾದ್ರೂ ಒಂದನ್ನ ಸೆಲೆಕ್ಟ್ ಮಾಡಿ.
– ನಂತರ ನೀವು ಸೆಲೆಕ್ಟ್ ಮಾಡಿದ ದಾಖಲೆಯ ನಂಬರ್ ಟೈಪ್ ಮಾಡ್ಬೇಕು. ಆಧಾರ್ ಕಾರ್ಡ್ ಅಂತಾದ್ರೆ ಆಧಾರ್ ನಂಬರ್. ನಂತ್ರ ಆಧಾರ್ ಕಾರ್ಡ್ನಲ್ಲಿ ನಿಮ್ಮ ಹೆಸರು ಹೇಗಿದೆಯೋ ಹಾಗೇ ಟೈಪ್ ಮಾಡಿ. ಆಮೇಲೆ ಪುರುಷನಾ, ಮಹಿಳೆನಾ ಅನ್ನೋದನ್ನ ಸೆಲೆಕ್ಟ್ ಮಾಡಿ. ಹುಟ್ಟಿದ ವರ್ಷವನ್ನ ಟೈಪ್ ಮಾಡಿ ಸಬ್ಮಿಟ್ ಕೊಟ್ರೆ ಆಯ್ತು.
– ಮುಂದಿನ ಹಂತದಲ್ಲಿ ಹೆಸರನ್ನ ಟಿಕ್ ಮಾರ್ಕ್ ಮಾಡಿ, ಶೆಡೂಲ್ ವ್ಯಾಕ್ಸಿನೇಷನ್ ಮೇಲೆ ಕ್ಲಿಕ್ ಮಾಡಿ ನಿಮ್ಮ ಪಿನ್ ಕೋಡ್ ಟೈಪ್ ಮಾಡಿ. ಜೊತೆ ಸರ್ಕಾರಿ ಆಸ್ಪತ್ರೆಯಲ್ಲಿ ಫ್ರೀ ಲಸಿಕೆ ಬೇಕಾ ಅಥವಾ ಖಾಸಗಿ ಆಸ್ಪತ್ರೆಯಲ್ಲಿ ದುಡ್ ಕೊಟ್ಟು ತೆಗೆದುಕೊಳ್ಳುವ ಲಸಿಕೆ ಬೇಕಾ ಅಂತ ಸೆಲೆಕ್ಟ್ ಮಾಡಿ. ನಂತರ ‘ಫೈಂಡ್ ವ್ಯಾಕ್ಸಿನೇಷನ್’ ಸೆಂಟರ್ ಮೇಲೆ ಕ್ಲಿಕ್ ಮಾಡಿ. ಒಂದಷ್ಟು ಲಿಸ್ಟ್ ಬರುತ್ತೆ. ಅದರಲ್ಲಿ ನೀವು ಎಲ್ಲಿ ಲಸಿಕೆ ಹಾಕೋಬೇಕು ಅಂದುಕೊಂಡಿದ್ದೀರೋ ಆ ವ್ಯಾಕ್ಸಿನೇಷನ್ ಸೆಂಟರ್ ಸೆಲೆಕ್ಟ್ ಮಾಡಿ. ನಂತರ ಯಾವ ದಿನಾಂಕದಂದು ಲಸಿಕೆ ಹಾಕಿಸಿಕೊಳ್ಳಬೇಕು ಅಂದುಕೊಂಡಿದ್ದೀರೋ ಅದನ್ನ ಟೈಪ್ ಮಾಡಿ. ನಂತರ ‘ಚೆಕ್ ಅವೈಲೇಬಿಲಿಟಿ’ ಮೇಲೆ ಕ್ಲಿಕ್ ಮಾಡಿ ಪ್ರೊಸೀಡ್ ಕೊಟ್ರೆ ಆಯ್ತು. ಆ ದಿನ ಹೋಗಿ ಲಸಿಕೆ ಹಾಕ್ಕೊಂಡು ಬರಬಹುದು. ಸರ್ಕಾರಿ ಆಸ್ಪತ್ರೆಯಾದ್ರೆ ಏನೂ ದುಡ್ಡು ಕೊಡಬೇಕಂತಿಲ್ಲ. ಖಾಸಗಿ ಆಸ್ಪತ್ರೆಯಾದ್ರೆ 250 ರೂಪಾಯಿ ಕೊಡ್ಬೇಕು. ಹೆಸರನ್ನ ನೋಂದಾಯಿಸಿಕೊಳ್ಳೋ ಪ್ರೋಸೀಜರ್ ಹೇಳೋಕೆ ಉದ್ದ ಅನ್ಸುತ್ತೆ. ಆದ್ರೆ ತುಂಬಾ ಈಸಿ ಇದೆ. ಆರೋಗ್ಯ ಸೇತು ಅಪ್ಲಿಕೇಷನ್ಗೆ ಹೋದ್ರೆ ನಿಮ್ಗೇ ಗೊತ್ತಾಗುತ್ತೆ.
-masthmagaa.com
Contact Us for Advertisement