masthmagaa.com:
ಇತ್ತೀಚೆಗಷ್ಟೇ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಜೊತೆಗಿನ ಮಾತುಕತೆಯಲ್ಲಿ ಚೀನಾ ಬೇರೆ ಯಾವುದೇ ದೇಶದ ಒಂದು ಇಂಚು ಭೂಮಿಯನ್ನೂ ಅತಿಕ್ರಮಿಸೋದಿಲ್ಲ ಅಂತ ಶಿ ಜಿನ್ಪಿಂಗ್ ಹೇಳಿದ್ರು. ತುಂಬಾ ದೊಡ್ಡ ಸಾಚಾ ರೀತಿ ಪೋಸ್ ಕೊಟ್ಟಿದ್ರು. ಆದ್ರೀಗ ಸದ್ದಿಲ್ಲದೇ ಪಕ್ಕದ ಭೂತಾನ್ನ ಒಂದಷ್ಟು ಭಾಗವನ್ನು ಬಡಿದು ಬಾಯಿಗೆ ಹಾಕಿಕೊಳ್ಳಲು ಸಿದ್ಧತೆ ಮಾಡಿಕೊಳ್ತಿದೆ. ಇದಕ್ಕೆ ಈ ಉಪಗ್ರಹ ಚಿತ್ರಗಳೇ ಸಾಕ್ಷಿ.. ಡೆಟ್ರೆಸ್ಫಾ ಅನ್ನೋ ಸಂಸ್ಥೆ ಈ ಉಪಗ್ರಹ ಚಿತ್ರಗಳನ್ನು ಟ್ವೀಟ್ ಮಾಡಿದೆ. ಜೊತೆಗೆ ಭೂತಾನ್ ಮತ್ತು ಚೀನಾ ನಡುವಿನ ವಿವಾದಿತ ಪ್ರದೇಶದಲ್ಲಿ ಕಳೆದೊಂದು ವರ್ಷದಿಂದ ನಿರ್ಮಾಣ ಕಾರ್ಯಗಳು ನಡೀತಾ ಇವೆ. 100 ಕಿಲೋಮೀಟರ್ ವ್ಯಾಪ್ತಿಯಲ್ಲಿ 4 ಹೊಸ ಚೀನೀ ಗ್ರಾಮಗಳನ್ನು ನಿರ್ಮಿಸಲಾಗಿದೆ ಅಂತ ಮಾಹಿತಿ ನೀಡಿದೆ. ಅಂದಹಾಗೆ ಚೀನಾ ಮತ್ತು ಭೂತಾನ್ ನಡುವಿನ ಈ ವಿವಾದಿತ ಪ್ರದೇಶ ಇರೋದು ದೋಕ್ಲಾಂ ಹತ್ತಿರದಲ್ಲಿ.. ದೋಕ್ಲಾಂ ಭಾರತ, ಚೀನಾ ಮತ್ತು ಭೂತಾನ್ ಗಡಿ ಹಂಚಿಕೊಂಡಿರೋ ಟ್ರೈಜಂಕ್ಷನ್ ಪ್ರದೇಶವಾಗಿದೆ. ಈ ದೋಕ್ಲಾಂ ಜಾಗದಲ್ಲೇ 2017ರಲ್ಲಿ ಭಾರತ ಮತ್ತು ಚೀನಾ ನಡುವೆ ಸಂಘರ್ಷ ಏರ್ಪಟ್ಟಿತ್ತು. ಹೀಗಾಗಿ ಈ ಭಾಗದಲ್ಲಿ ಹೊಸ ಗ್ರಾಮಗಳ ನಿರ್ಮಾಣ ಭಾರತಕ್ಕೂ ಆತಂಕದ ವಿಚಾರವಾಗಿದೆ. ಇನ್ನು ಭೂತಾನ್ ಮತ್ತು ಚೀನಾ ನಡುವೆ ಈ ಪ್ರದೇಶದ ವಿಚಾರವಾಗಿ ದೀರ್ಘಕಾಲದಿಂದ ಸಂಘರ್ಷ ಇದ್ದು, ಇತ್ತೀಚೆಗಷ್ಟೇ ಒಪ್ಪಂದವಾಗಿತ್ತು. ಇದ್ರಲ್ಲಿ ಭೂತಾನ್ ಈ ಪ್ರದೇಶವನ್ನು ಚೀನಾಗೆ ಬಿಟ್ಟುಕೊಟ್ಟಿದ್ಯಾ ಅಥವಾ ಇಲ್ವಾ ಅನ್ನೋದು ಇನ್ನೂ ಸ್ಪಷ್ಟವಾಗಿಲ್ಲ. ಇತ್ತೀಚೆಗೆ ಅಮೆರಿಕ ರಕ್ಷಣಾ ಇಲಾಖೆ ಕೂಡ ಭಾರತಕ್ಕೆ ಅಂಟಿಕೊಂಡಿರೋ ವಿವಾದಿತ ಜಾಗಗಳಲ್ಲಿ ಚೀನಾ ಗ್ರಾಮಗಳನ್ನು ನಿರ್ಮಿಸ್ತಿದೆ ಅಂತ ಎಚ್ಚರಿಸಿತ್ತು.
-masthmagaa.com
Contact Us for Advertisement