masthmagaa.com:
ಅಫ್ಘಾನಿಸ್ತಾನದಲ್ಲಿ ತಾಲಿಬಾನಿಗಳು ಮತ್ತು ಹಕ್ಕಾನಿ ಸಂಘಟನೆ ನಡುವೆ ಮತ್ತೆ ಗಲಾಟೆಯಾಗುತ್ತಾ ಅನ್ನೋ ಅನುಮಾನ ಶುರುವಾಗಿದೆ. ಯಾಕಂದ್ರೆ ನಿನ್ನೆ ಕಾಬೂಲ್ನ ಆಸ್ಪತ್ರೆ ಬಳಿ 2 ಆತ್ಮಾಹುತಿ ದಾಳಿ ಮತ್ತು ಫೈರಿಂಗ್ ನಡೆದಿದಿತ್ತು. ಅದ್ರಲ್ಲಿ ಒಟ್ಟು 25 ಮಂದಿ ಪ್ರಾಣ ಕಳ್ಕೊಂಡಿದ್ದು 50ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ರು. ಈ ದಾಳಿಯಲ್ಲಿ ಹಕ್ಕಾನಿ ನೆಟ್ವರ್ಕ್ನ ಪ್ರಮುಖ ನಾಯಕನಾಗಿದ್ದ ಹಮದುಲ್ಲಾ ಮುಖಲಿಸ್ ಕೂಡ ಬಲಿಯಾಗಿದ್ದಾನೆ. ಹಕ್ಕಾನಿ ನೆಟ್ವರ್ಕ್ ಅನ್ನೋ ಉಗ್ರ ಸಂಘಟನೆಯ ಮುಖ್ಯಸ್ಥ ಮತ್ತು ಅಫ್ಘಾನಿಸ್ತಾನದ ಗೃಹಸಚಿವರೂ ಆಗಿರೋ ಸಿರಾಜುದ್ದೀನ್ ಹಕ್ಕಾನಿಗೆ ಈ ಹಮದುಲ್ಲಾ ಮುಖಲಿಸ್ ಮುಖ್ಯ ಸೈನ್ಯ ಸಲಹೆಗಾರನಾಗಿದ್ದ. ಜೊತೆಗೆ ಕಾಬೂಲ್ ಪ್ರಾಂತ್ಯಕ್ಕೆ ಕಮಾಂಡರ್ ಕೂಡ ಆಗಿದ್ದ. ಇತ್ತೀಚೆಗೆ ತಾಲಿಬಾನಿಗಳು ಕಾಬೂಲ್ಗೆ ವಶಕ್ಕೆ ಪಡೆದಾಗ ಒಂದು ಗುಂಪು ಕಾಬೂಲ್ನಲ್ಲಿದ್ದ ಅಶ್ರಫ್ ಘನಿ ಅರಮನೆಗೆ ಹೋಗಿ ಪೋಸ್ ಕೊಟ್ಟಿತ್ತು. ಇದ್ರಲ್ಲಿ ಒಬ್ಬ ವ್ಯಕ್ತಿ ಅಧ್ಯಕ್ಷರ ಕುರ್ಚಿಯಲ್ಲಿ ಕೂಡ ಕುಳಿತಿದ್ದ. ಅವನೇ ಈಗ ಹತ್ಯೆಯಾಗಿರೋ ಹಮದುಲ್ಲಾ ಮುಖಲಿಸ್ ಅಂತ ಗೊತ್ತಾಗಿದೆ. ಈ ಹಮದುಲ್ಲಾ ಮುಖಲಿಸ್ ತಾಲಿಬಾನ್ ಸ್ಪೆಷಲ್ ಫೋರ್ಸ್ ಬದ್ರಿ ಬ್ರಿಗೇಡ್ನ ಕಮಾಂಡರ್ ಕೂಡ ಆಗಿದ್ದ. ಇದೇ ಪಡೆಗೆ ಕಾಬೂಲ್ ರಕ್ಷಣೆಯ ಜವಾಬ್ದಾರಿಯನ್ನು ಹೊರಿಸಲಾಗಿತ್ತು. ಇದಕ್ಕೂ ಮುನ್ನ ಮುಖಲಿಸ್ನನ್ನು ಪಕ್ತಿಕಾ ಮತ್ತು ಖೋಶ್ತ್ ಪ್ರಾಂತ್ಯದ ಗವರ್ನರ್ ಆಗಿ ನೇಮಿಸಲಾಗಿತ್ತು. ಇದ್ರಿಂದ ಹಕ್ಕಾನಿ ನೆಟ್ವರ್ಕ್ ಗ್ರೂಪ್ ಮತ್ತು ತಾಲಿಬಾನ್ಗೆ ದೊಡ್ಡ ಹೊಡೆತ ಸಿಕ್ಕಂತಾಗಿದೆ. ಈ ಹಕ್ಕಾನಿ ನೆಟ್ವರ್ಕ್ 2015ರಲ್ಲಿ ತಾಲಿಬಾನಿಗಳ ಜೊತೆ ಮೈತ್ರಿ ಮಾಡ್ಕೊಂಡು, ಅಮೆರಿಕ ವಿರುದ್ಧದ ಹೋರಾಟದಲ್ಲಿ ಕೈಜೋಡಿಸಿತ್ತು. ಅಂದಹಾಗೆ ಈ ಹಕ್ಕಾನಿ ಗ್ರೂಪ್ ಪಾಕಿಸ್ತಾನ ಮೂಲದಿಂದ ಆಪರೇಟ್ ಮಾಡೋ ಸಂಘಟನೆಯಾಗಿದ್ದು, ಇತ್ತೀಚೆಗೆ ತಾಲಿಬಾನ್ ಸರ್ಕಾರದಲ್ಲಿ ಈ ಸಂಘಟನೆಯ ಸದಸ್ಯರಿಗೆ ದೊಡ್ಡ ದೊಡ್ಡ ಸ್ಥಾನಗಳನ್ನು ಕೊಡಿಸಿದ್ದೇ ಪಾಕಿಸ್ತಾನ ಅಂತ ಸುದ್ದಿಯಾಗಿತ್ತು.
ಇನ್ನು ನಿನ್ನೆ ನಡೆದ ದಾಳಿಯ ಹೊಣೆಯನ್ನು ಯಾವುದೇ ಸಂಘಟನೆ ಹೊತ್ತುಕೊಂಡಿಲ್ಲ. ಆದ್ರೆ ತಾಲಿಬಾನಿಗಳು ಅಫ್ಘಾನಿಸ್ತಾನವನ್ನು ಟೇಕೋವರ್ ಮಾಡಿದ ಬಳಿಕ ಐಎಸ್ ಉಗ್ರರ ಹಾವಳಿ ಜಾಸ್ತಿಯಾಗ್ತಿದೆ. ಈ ಹಿಂದೆ ನಡೆದ ಇಂಥದ್ದೇ ದಾಳಿಗಳ ಹೊಣೆಯನ್ನು ಇದೇ ಉಗ್ರ ಸಂಘಟನೆ ಹೊತ್ತುಕೊಂಡಿತ್ತು. ಹೀಗಾಗಿ ಈ ಬಾರಿಯೂ ಇದೇ ಸಂಘಟನೆ ದಾಳಿ ನಡೆಸಿರಬಹುದು ಅಂತ ಹೇಳಲಾಗ್ತಿದೆ.)
ಇನ್ನು ಈ ದಾಳಿಯ ಬಗ್ಗೆ ಪ್ರತಿಕ್ರಿಯಿಸಿರೋ ತಾಲಿಬಾನ್ ವಕ್ತಾರ ಝಬೀವುಲ್ಲಾ ಮುಜಾಹಿದ್, ಆತ್ಮಾಹುತಿ ದಾಳಿ ಬೆನ್ನಲ್ಲೇ ಉಗ್ರರ ಒಂದು ಗುಂಪು ಆಸ್ಪತ್ರೆ ಆವರಣ ಪ್ರವೇಶಿಸಲು ಯತ್ನಿಸಿತು. ಆದ್ರೆ ತಾಲಿಬಾನ್ ಸ್ಪೆಷಲ್ ಫೋರ್ಸ್ ಹೆಲಿಕಾಪ್ಟರ್ ಮೂಲಕ ಆಸ್ಪತ್ರೆ ಆವರಣದೊಳಗೆ ಇಳಿದು 15 ನಿಮಿಷದಲ್ಲಿ ಬಂದೂಕುಧಾರಿಗಳ ಗುಂಪನ್ನು ಹೊಡೆದುರುಳಿಸಿದೆ ಅಂತ ಹೇಳಿದ್ದಾರೆ.
-masthmagaa.com
Contact Us for Advertisement