masthmagaa.com:
ಎಫ್ಎಟಿಎಫ್ ಫೈನಾನ್ಶಿಯಲ್ ಆಕ್ಷನ್ ಟಾಸ್ಕ್ ಫೋರ್ಸ್ನ ಗ್ರೇ ಲಿಸ್ಟ್ನಿಂದ ಈ ಸಲ ಆದ್ರೂ ಹೊರಗೆ ಬರಬಹುದು.. ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆಗಳಿಂದ ದುಡ್ಡು ಸಿಗಬಹುದು ಅಂತ ಭಾರಿ ಆಸೆಯಿಂದ ಕಾದುಕೂತಿದ್ದ ಪಾಕಿಸ್ತಾನಕ್ಕೆ ಭಾರಿ ಮುಖಭಂಗವಾಗಿದೆ. ಪ್ಯಾರಿಸ್ನಲ್ಲಿ 3 ದಿನಗಳ ಕಾಲ ನಡೆದ ಎಫ್ಎಟಿಎಫ್ ಸಭೆಯಲ್ಲಿ ಪಾಕಿಸ್ತಾನವನ್ನು ಮತ್ತೆ ಗ್ರೇ ಲಿಸ್ಟ್ನಲ್ಲೇ ಮುಂದುವರಿಸಲು ನಿರ್ಧರಿಸಲಾಗಿದೆ. ಭಾರತದ ಮೋಸ್ಟ್ ವಾಂಟೆಡ್ ಉಗ್ರ ಹಫೀಜ್ ಸಯೀದ್, ಮಸೂದ್ ಅಝರ್ ಮತ್ತು ಅವರ ನೇತೃತ್ವದ ಗುಂಪಿನ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳದ ಹಿನ್ನೆಲೆಯಲ್ಲಿ ಈ ಹೆಜ್ಜೆ ಇಡಲಾಗಿದೆ. ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಫೈನಾನ್ಶಿಯಲ್ ಆಕ್ಷನ್ ಟಾಸ್ಕ್ ಫೋರ್ಸ್ ಅಧ್ಯಕ್ಷ ಮಾರ್ಕಸ್ ಪ್ಲೆಯರ್, ಪಾಕಿಸ್ತಾನವನ್ನು 2022ರ ಏಪ್ರಿಲ್ವರೆಗೂ ಗ್ರೇಲಿಸ್ಟ್ನಲ್ಲೇ ಮುಂದುವರಿಸೋ ನಿರ್ಧಾರ ಪ್ರಕಟಿಸಿದ್ದಾರೆ. ಅಂದಹಾಗೆ ಪಾಕಿಸ್ತಾನವನ್ನು 2018ರಿಂದಲೂ ಈ ಗ್ರೇ ಲಿಸ್ಟ್ನಲ್ಲೇ ಇಡಲಾಗಿದೆ. ಫೈನಾನ್ಶಿಯಲ್ ಆಕ್ಷನ್ ಟಾಸ್ಕ್ ಫೋರ್ಸ್ ಅನ್ನೋದು ಅಕ್ರಮ ಹಣ ವರ್ಗಾವಣೆ ಮತ್ತು ಉಗ್ರರಿಗೆ ಹಣಕಾಸು ನೆರವಿನ ಮೇಲೆ ನಿಗಾ ಇಡುವ ಸಂಸ್ಥೆಯಾಗಿದೆ. ಇದರ ಗ್ರೇ ಲಿಸ್ಟ್ನಲ್ಲಿರೋ ದೇಶಗಳಿಗೆ ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆಗಳಿಂದ ಆರ್ಥಿಕ ನೆರವು ಸಿಗೋದು ಕಷ್ಟವಾಗುತ್ತೆ. ಈಗಾಗಲೇ ಸಾಲದ ಹೊಣೆಯಿಂದ ಬಗ್ಗಿಹೋಗಿರೋ ಪಾಕಿಸ್ತಾನಕ್ಕೆ ಎಫ್ಎಟಿಫ್ ಗ್ರೇ ಲಿಸ್ಟ್ ಗಾಯದ ಮೇಲೆ ಬರೆ ಎಳೆದಂತಾಗಿದೆ.
-masthmagaa.com
Contact Us for Advertisement