masthmagaa.com:
ವಾಲ್ವ್ (ಕವಾಟ) ಇರುವ N-95 ಮಾಸ್ಕ್ಗಳನ್ನ ಧರಿಸೋದು ಅಪಾಯಕಾರಿ ಅಂತ ಕೇಂದ್ರ ಸರ್ಕಾರವು ಎಲ್ಲಾ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳನ್ನು ಎಚ್ಚರಿಸಿದೆ. ಇಂತಹ ಮಾಸ್ಕ್ಗಳು ಸೋಂಕು ಹರಡುವುದನ್ನ ತಡೆಯುವುದಿಲ್ಲ. ಇದು ಕೊರೋನಾ ನಿಯಂತ್ರಣಕ್ಕೆ ಕೈಗೊಂಡಿರುವ ಕ್ರಮಗಳಿಗೆ ವಿರುದ್ಧ ಅಂತ ಕೇಂದ್ರ ಸರ್ಕಾರವು ಎಲ್ಲಾ ರಾಜ್ಯಗಳಿಗೆ ಪತ್ರ ಬರೆದಿದೆ. ಇಂತಹ ಮಾಸ್ಕ್ಗಳ ಬಳಕೆಯನ್ನ ತಡೆಯಲು ಸಂಬಂಧಪಟ್ಟ ಇಲಾಖೆ ಅಥವಾ ಅಧಿಕಾರಿಗಳಿಗೆ ಸೂಚನೆ ನೀಡುವಂತೆಯೂ ತಿಳಿಸಿದೆ.
ಕೇಂದ್ರ ಆರೋಗ್ಯ ಇಲಾಖೆಯ ಡೈರೆಕ್ಟರ್ ಜನರಲ್ ಆಫ್ ಹೆಲ್ತ್ ಸರ್ವಿಸಸ್ (DGHS) ಈ ಸಂಬಂಧ ರಾಜ್ಯಗಳ ಆರೋಗ್ಯ ಮತ್ತು ವೈದ್ಯಕೀಯ ಶಿಕ್ಷಣದ ಪ್ರಧಾನ ಕಾರ್ಯದರ್ಶಿಗಳಿಗೆ ಬರೆದ ಪತ್ರದಲ್ಲಿ ಈ ವಿಚಾರವನ್ನು ಉಲ್ಲೇಖಿಸಿದೆ. ಕೇವಲ ಗೊತ್ತುಪಡಿಸಿದ ಆರೋಗ್ಯ ಸಿಬ್ಬಂದಿ ಮಾತ್ರ ಕವಾಟ ಇರುವ ಎನ್-95 ಮಾಸ್ಕ್ಗಳನ್ನ ಧರಿಸಬಹುದು. ಆದ್ರೆ ಜನ ಸಾಮಾನ್ಯರು ಕೂಡ ಇಂತಹ ಮಾಸ್ಕ್ ಬಳಸೋದು ಸೂಕ್ತವಲ್ಲ ಎಂದಿದೆ. ಜೊತೆಗೆ ಮನೆಯಲ್ಲೇ ತಯಾರಿಸಿದ ಮಾಸ್ಕ್ಗಳನ್ನ ಬಳಸುವಂತೆ ಸಲಹೆ ನೀಡಿದೆ.
ವಾಲ್ವ್ ಇರುವ ಮಾಸ್ಕ್ ಯಾಕೆ ಒಳ್ಳೇದಲ್ಲ..?
ಮಾಸ್ಕ್ ಧರಿಸುವ ಉದ್ದೇಶವೇ ಬೇರೆಯವರಿಂದ ಸೋಂಕು ನಮಗೆ ತಗುಲದಿರಲಿ ಮತ್ತು ನಮ್ಮಿಂದ ಸೋಂಕು ಬೇರೆಯವರಿಗೆ ಹರಡದಿರಲಿ ಅನ್ನೋದು. ವಾಲ್ವ್ ಇರುವ ಮಾಸ್ಕ್ಗಳನ್ನ ಧರಿಸುವುದರಿಂದ ಉಸಿರಾಡುವ ಗಾಳಿಯು ವಾಲ್ವ್ ಮೂಲಕ ಫಿಲ್ಟರ್ ಆಗಿ ಒಳಗೆ ಹೋಗುತ್ತದೆ. ಇದರಿಂದ ವೈರಾಣು ಮೂಗು ಅಥವಾ ಬಾಯಿಯ ಮೂಲಕ ದೇಹಕ್ಕೆ ಹೋಗುವುದಿಲ್ಲ. ಆದ್ರೆ ಆ ವ್ಯಕ್ತಿಯು ಉಸಿರಾಡಿದ ಗಾಳಿ ಹೊರ ಹೋಗುವಾಗ ಫಿಲ್ಟರ್ ಆಗದೆ ನೇರವಾಗಿ ಹೊರಗೆ ಹೋಗುತ್ತದೆ. ಈ ಗಾಳಿಯನ್ನ ಬೇರೆಯವರು ಉಸಿರಾಡಿದಾಗ ಅವರಿಗೆ ಸೋಂಕು ತಗುವ ಸಾಧ್ಯತೆ ಇರುತ್ತದೆ.
-masthmagaa.com
Contact Us for Advertisement