masthmagaa.com:
ಕೊರೋನಾ ವೈರಸ್ಗೆ ಆಕ್ಸ್ಫರ್ಡ್ ಯುನಿವರ್ಸಿಟಿ ಮತ್ತು ಅಸ್ಟ್ರಾಝೆನೆಕಾ ಕಂಪನಿ ಸೇರಿಕೊಂಡು ಅಭಿವೃದ್ಧಿಪಡಿಸುತ್ತಿರುವ ಲಸಿಕೆ ನವೆಂಬರ್ ಮೊದಲ ವಾರದಲ್ಲೇ ಸಿಗಲಿದೆ ಅಂತ ಬ್ರಿಟನ್ನ ‘ದಿ ಸನ್’ ಪತ್ರಿಕೆ ವರದಿ ಮಾಡಿದೆ. ‘ನವೆಂಬರ್ 2ರಿಂದ ಆರಂಭವಾಗುವ ವಾರದಲ್ಲಿ ಲಸಿಕೆಯ ಮೊದಲ ಬ್ಯಾಚ್ನ್ನು ಸ್ವೀಕರಿಸಲು ಸಿದ್ಧತೆ ಮಾಡಿಕೊಳ್ಳಿ’ ಅಂತ ಲಂಡನ್ನ ಪ್ರತಿಷ್ಠಿತ ಆಸ್ಪತ್ರೆಯೊಂದರ ಸಿಬ್ಬಂದಿಗೆ ಸೂಚಿಸಲಾಗಿದೆ ಅಂತ ವರದಿಯಲ್ಲಿ ಹೇಳಲಾಗಿದೆ. ನವೆಂಬರ್ 2ರಿಂದ ಆರಂಭವಾಗಲಿರುವ ವಾರ ಅಂದ್ರೆ ಮುಂದಿನ ವಾರ.
ಬ್ರಿಟನ್ ರಾಷ್ಟ್ರೀಯ ಆರೋಗ್ಯ ಸೇವೆಯಲ್ಲಿರುವ (National Health Service-NHS) ಸಿಬ್ಬಂದಿಗೆ ಆಕ್ಸ್ಫರ್ಡ್ ಲಸಿಕೆಯನ್ನು ಮೊದಲು ಹಾಕಲಾಗುತ್ತದೆ. ಎನ್ಹೆಚ್ಎಸ್ನ ಸಿಬ್ಬಂದಿಯೊಬ್ಬರಿಗೆ ಕಳುಹಿಸದ ಇ-ಮೇಲ್ನಲ್ಲಿ ಇದು ಗೊತ್ತಾಗಿದೆ ಅಂತ ವರದಿಯಾಗಿದೆ. ಡಿಸೆಂಬರ್ 31ರೊಳಗೆ ಅಂದ್ರೆ ‘ಬ್ರೆಕ್ಸಿಟ್ ಪರಿವರ್ತನೆಯ ಅವಧಿ’ ಮುಗಿಯುವ ಮೊದಲೇ ಹೆಚ್ಚಿನ ಪ್ರಮಾಣದಲ್ಲಿ ಲಸಿಕೆ ಉತ್ಪಾದಿಸುವ ಗುರಿಯನ್ನು ಬ್ರಿಟನ್ ಹೊಂದಿದೆ. ಈ ಮೂಲಕ ಆಕ್ಸ್ಫರ್ಡ್ ಲಸಿಕೆಗೆ ಬೇಕಾದ ಯುರೋಪಿಯನ್ ಒಕ್ಕೂಟದ ಅನುಮತಿ ಪ್ರಕ್ರಿಯೆಯಿಂದ ತಪ್ಪಿಸಿಕೊಳ್ಳೋದು ಬ್ರಿಟನ್ ಪ್ಲಾನ್. ಇಲ್ಲಿ ಬ್ರೆಕ್ಸಿಟ್ ಪರಿವರ್ತನೆಯ ಅವಧಿ (Transition Period) ಅಂದ್ರೆ, ಜನವರಿ 31, 2020ರಂದು ಯುರೋಪಿಯನ್ ಯೂನಿಯನ್ನಿಂದ ಬ್ರಿಟನ್ ಹೊರಬಂತು. ಆದ್ರೆ ಅದಕ್ಕೆ 11 ತಿಂಗಳ ಪರಿವರ್ತನೆಯ ಅವಧಿ ನೀಡಲಾಗಿದೆ. ಅಂದ್ರೆ ಡಿಸೆಂಬರ್ 31ರವರೆಗೆ. ಅಲ್ಲಿಯವರೆಗೂ ಬ್ರಿಟನ್ ಯುರೋಪಿಯನ್ ಯೂನಿಯನ್ ನಿಯಮಗಳಿಗೆ ಬದ್ಧವಾಗಿರಬೇಕಾಗುತ್ತದೆ.
ಮುಂದಿನ ವಾರವೇ ಆಕ್ಸ್ಫರ್ಡ್ ಲಸಿಕೆ ಸಿಗುತ್ತಾ ಅನ್ನೋ ಪ್ರಶ್ನೆಗೆ ಪ್ರತಿಕ್ರಿಯಿಸಿರುವ ಬ್ರಿಟನ್ನ ಆರೋಗ್ಯ ಕಾರ್ಯದರ್ಶಿ ಮ್ಯಾಟ್ ಹ್ಯಾಂಕಾಕ್, ‘ಮುಂದಿನ ವರ್ಷದ ಮೊದಲಾರ್ಧದಲ್ಲಿ ದೊಡ್ಡ ಪ್ರಮಾಣದಲ್ಲಿ ಲಸಿಕೆಯನ್ನು ಹಾಕುವ ನಿರೀಕ್ಷೆ ಇದೆ. ಆದ್ರೆ ಲಸಿಕೆ ಹಾಕುವ ಕಾರ್ಯಕ್ರಮವನ್ನು ಈ ವರ್ಷದಲ್ಲೇ ಆರಂಭ ಮಾಡ್ತೀವಿ ಅನ್ನೋದನ್ನ ತಳ್ಳಿ ಹಾಕಲ್ಲ. ಒಂದ್ವೇಳೆ ಲಸಿಕೆ ಲಭ್ಯವಾದ್ರೆ ನಾವು ರೆಡಿಯಾಗಿರಬೇಕು. ಅದಕ್ಕೆ ಬೇಕಾದ ಸಿದ್ಧತೆಯನ್ನು ನಾವು ಈ ವರ್ಷ ಮಾಡುತ್ತಿದ್ದೇವೆ’ ಅಂತ ಹೇಳಿದ್ದಾರೆ.
ಅಂದ್ಹಾಗೆ AZD1222 ಅಥವಾ ChAdOx1 nCoV-19 ಅಂತ ಕರೆಯಲ್ಪಡುವ ಈ ಲಸಿಕೆಯ ಕ್ಯಾಂಡಿಡೇಟ್ನ್ನು ಬ್ರಿಟನ್ನ್ ಆಕ್ಸ್ಫರ್ಡ್ ಯುನಿವರ್ಸಿಟಿ ಅಭಿವೃದ್ಧಿಪಡಿಸಿದೆ. ಇದರ ಮಾನವ ಪ್ರಯೋಗ ಮತ್ತು ಉತ್ಪಾದನೆಯ ಲೈಸೆನ್ಸ್ನ್ನ 2020ರ ಏಪ್ರಿಲ್ನಲ್ಲಿ ಅಸ್ಟ್ರಾಝೆನೆಕಾ ಕಂಪನಿಗೆ ನೀಡಲಾಯ್ತು. ಈ ಲಸಿಕೆ ಮೇಲೆ ಬಹುತೇಕ ಎಲ್ಲಾ ದೇಶಗಳು ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿವೆ. ವಿಶ್ವ ಆರೋಗ್ಯ ಸಂಸ್ಥೆ ಕೂಡ ಆಕ್ಸ್ಫರ್ಡ್ ಲಸಿಕೆ ಬಗ್ಗೆ ಒಳ್ಳೆಯ ಮಾತುಗಳನ್ನು ಆಡುತ್ತಿದೆ. ಆಕ್ಸ್ಫರ್ಡ್ ಲಸಿಕೆ ಒಂದು ವರ್ಷದವರೆಗೆ ಕೊರೋನಾದಿಂದ ರಕ್ಷಣೆ ನೀಡಲಿದೆ ಅಂತ ಅಸ್ಟ್ರಾಝೆನೆಕಾ ಕಂಪನಿಯ ಸಿಇಒ ಈ ಹಿಂದೆ ಹೇಳಿದ್ದರು.
-masthmagaa.com
Contact Us for Advertisement