masthmagaa.com:
ಬೆಂಗಳೂರು: ಕೊರೋನಾ ಹಿನ್ನೆಲೆ ಮಾರ್ಚ್ 22ರಿಂದ ಸ್ಥಗಿತಗೊಂಡಿದ್ದ ‘ನಮ್ಮ ಮೆಟ್ರೋ’ ರೈಲು ಸೋಮವಾರದಿಂದ (ಸೆಪ್ಟೆಂಬರ್ 7) ಸಂಚಾರ ಆರಂಭಿಸಿದೆ. ಇದಕ್ಕಾಗಿ ಬಿಎಂಆರ್ಸಿಎಲ್ ಎಲ್ಲಾ ಪೂರ್ವ ಸಿದ್ಧತೆಗಳನ್ನ ಮಾಡಿಕೊಂಡಿದ್ದು SOP (Standard Operating Procedure) ಬಿಡುಗಡೆ ಮಾಡಿದೆ.
ಮೊದಲ ಹಂತ: ಸೆಪ್ಟೆಂಬರ್ 7ರಿಂದ 10ರವರೆಗೆ (4 ದಿನ) ನೇರಳೆ ಮಾರ್ಗವಾದ ಬೈಯಪ್ಪನ ಹಳ್ಳಿ-ಮೈಸೂರು ರಸ್ತೆ ನಡುವೆ ಕಡಿಮೆ ಸಂಖ್ಯೆಯ ರೈಲುಗಳು ಸಂಚರಿಸಲಿವೆ. ಈ ಅವಧಿಯಲ್ಲಿ ಬೆಳಗ್ಗೆ 8ರಿಂದ 11ರವರೆಗೆ ಮತ್ತು ಸಂಜೆ 4.30ರಿಂದ 7.30ರವರೆಗೆ ತಲಾ 5 ನಿಮಿಷಗಳ ಅಂತರದಲ್ಲಿ ರೈಲುಗಳು ಕಾರ್ಯನಿರ್ವಹಿಸಲಿವೆ.
ಎರಡನೇ ಹಂತ: ಸೆಪ್ಟೆಂಬರ್ 9ರಿಂದ 10ರವರೆಗೆ (2 ದಿನ) ಹಸಿರು ಮಾರ್ಗವಾದ ನಾಗಸಂದ್ರ-ಯಲಚೇನಹಳ್ಳಿ ನಿಲ್ದಾಣಗಳ ನಡುವೆ ಕಡಿಮೆ ಸಂಖ್ಯೆಯ ರೈಲುಗಳು ಸಂಚರಿಸಲಿವೆ. ಈ ಅವಧಿಯಲ್ಲೂ ಬೆಳಗ್ಗೆ 8ರಿಂದ 11ರವರೆಗೆ ಮತ್ತು ಸಂಜೆ 4.30ರಿಂದ 7.30ರವರೆಗೆ ತಲಾ 5 ನಿಮಿಷಗಳ ಅಂತರದಲ್ಲಿ ರೈಲುಗಳು ಕಾರ್ಯನಿರ್ವಹಿಸಲಿವೆ.
ಮೂರನೇ ಹಂತ: ಸೆಪ್ಟೆಂಬರ್ 11ರಿಂದ ಎರಡೂ ಮಾರ್ಗದಲ್ಲಿ ಪೂರ್ಣಪ್ರಮಾಣದಲ್ಲಿ ಮೆಟ್ರೋ ಸಂಚಾರ ಆರಂಭವಾಗಲಿದೆ. ಅಂದ್ರೆ ಬೆಳಗ್ಗೆ 7 ಗಂಟೆಯಿಂದ ರಾತ್ರಿ 9 ಗಂಟೆವರೆಗೆ ರೈಲುಗಳು ಸಂಚರಿಸಲಿವೆ.
– ಸಾಮಾಜಿಕ ಅಂತರ ಕಾಪಾಡುವ ಸಲುವಾಗಿ ಗರಿಷ್ಠ 400 ಜನ ಮಾತ್ರ ಏಕಕಾಲದಲ್ಲಿ ಪ್ರಯಾಣಿಸಬಹುದು
– ಎಲ್ಲಾ ಪ್ರಯಾಣಿಕರು ಸ್ಮಾರ್ಟ್ ಕಾರ್ಡ್ ಹೊಂದಿರಬೇಕು. ಯಾವುದೇ ನಿಲ್ದಾಣದಲ್ಲಿ ಟೋಕನ್ ಮಾರಾಟ ಇರುವುದಿಲ್ಲ.
– ಸ್ಮಾರ್ಟ್ ಕಾರ್ಡ್ ಇಲ್ಲದವರು ನಿಲ್ದಾಣದಲ್ಲಿ ನಿಗದಿಪಡಿಸಿದ ಸ್ಥಳಗಳಲ್ಲಿ ಕ್ಯಾಶ್ಲೆಸ್ ಟ್ರಾನ್ಸಾಕ್ಷನ್ ಮೂಲಕ ಕಾರ್ಡ್ ಪಡೆಯಬಹುದು.
– ಯಾವುದೇ ನಿಲ್ದಾಣದಲ್ಲಿ ಸ್ಮಾರ್ಟ್ ಕಾರ್ಡ್ ರೀಚಾರ್ಜ್ ಮಾಡುವುದಿಲ್ಲ. ನಮ್ಮ ಮೆಟ್ರೋ ಅಪ್ಲಿಕೇಶನ್ ಅಥವಾ ಬಿಎಂಆರ್ಸಿಎಲ್ ವೆಬ್ಸೈಟ್ ಮೂಲಕ ರೀಚಾರ್ಜ್ ಮಾಡಬಹುದು.
– ಪ್ರವೇಶ ಮತ್ತು ನಿರ್ಗಮನ ಗೇಟ್ಗಳಲ್ಲಿ ಇಟ್ಟಿರುವ ಕಾರ್ಡ್ ರೀಡರ್ನಲ್ಲಿ ಸ್ಮಾರ್ಟ್ ಕಾರ್ಡ್ ಇಡುವ ಬದಲು ಅದನ್ನ ಗೇಟ್ ರೀಡರ್ ಬಳಿ ತೋರಿಸಬೇಕು.
– ಪ್ರವೇಶ ದ್ವಾರಗಳಲ್ಲಿ ಇಟ್ಟಿರುವ ಹ್ಯಾಂಡ್ ಸ್ಯಾನಿಟೈಸರ್ ಅನ್ನು ಎಲ್ಲಾ ಪ್ರಯಾಣಿಕರು ಬಳಸಬೇಕು.
– ಪ್ರಯಾಣಿಕರು ಥರ್ಮಲ್ ಸ್ಕ್ಯಾನರ್ ಎದುರು ತಮ್ಮ ಕೈಗಳನ್ನು ಇಡಬೇಕು. ದೇಹದ ತಾಪಮಾನ 37 ಡಿಗ್ರಿ ಸೆಲ್ಸಿಯಸ್ಗಿಂತ ಕಡಿಮೆ ಇದ್ದರೆ ಮಾತ್ರ ಅವಕಾಶ.
– ಸೋಂಕಿನ ಲಕ್ಷಣಗಳಾದ ಕೆಮ್ಮು, ಉಸಿರಾಟದ ತೊಂದರೆ ಇದ್ದವರಿಗೆ ಅವಕಾಶವಿಲ್ಲ. ಅಂತಹವರ ಮಾಹಿತಿ ಪಡೆದು ಆರೋಗ್ಯ ತಪಾಸಣೆಗೆ ಕಳಿಸಲಾಗುತ್ತೆ.
– ಮಾಸ್ಕ್ ಧರಿಸದ ಯಾವುದೇ ಪ್ರಯಾಣಿಕನಿಗೆ ಮೆಟ್ರೋ ರೈಲಿನಲ್ಲಿ ಸಂಚರಿಸಲು ಅವಕಾಶವಿಲ್ಲ.
– ಒಬ್ಬ ಪ್ರಯಾಣಿಕ ಒಂದೇ ಬ್ಯಾಗ್ ಕೊಂಡೊಯ್ಯಲು ಅವಕಾಶ. ಆರೋಗ್ಯ ಸೇತು ಆ್ಯಪ್ ಬಳಕೆಗೆ ಉತ್ತೇಜನ.
– ಎಲ್ಲಾ ಪ್ರಯಾಣಿಕರು 2 ಮೀಟರ್ ಅಂತರ ಕಾಪಾಡಬೇಕು. ಮೆಟ್ರೋ ನಿಲ್ದಾಣ, ಲಿಫ್ಟ್, ರೈಲಿನ ಒಳಗೆ ಹಾಕಿರುವ ಹಳದಿ ಬಣ್ಣದ ಪಟ್ಟಿ ಮೇಲೆಯೇ ನಿಲ್ಲಬೇಕು.
– ಎಸ್ಕಲೇಟರ್ಗಳಲ್ಲಿ ಒಂದು ಮೆಟ್ಟಿಲು ಬಿಟ್ಟು ನಿಲ್ಲಬೇಕು. ಲಿಫ್ಟ್ಗಳಲ್ಲಿ 4ರಿಂದ 6 ಜನ ಮಾತ್ರ ಹೋಗಬೇಕು.
– ನಿಲ್ದಾಣಗಳಲ್ಲಿ ಜನರ ಗುಂಪನ್ನು ನಿಯಂತ್ರಿಸಲು ಕಷ್ಟವಾದ್ರೆ ಆ ನಿಲ್ದಾಣಗಳಲ್ಲಿ ರೈಲುಗಳ ನಿಲುಗಡೆ ಇರುವುದಿಲ್ಲ.
-masthmagaa.com
Contact Us for Advertisement