masthmagaa.com:
ಭಾರತದಲ್ಲಿ ಆಕ್ಸ್ಫರ್ಡ್ ಯುನಿವರ್ಸಿಟಿ ಮತ್ತು ಆಸ್ಟ್ರಾಝೆನೆಕಾ ಕಂಪನಿ ಸೇರಿಕೊಂಡು ಅಭಿವೃದ್ಧಿಪಡಿಸಿರುವ ‘ಕೋವಿಶೀಲ್ಡ್’ ಕೊರೋನಾ ಲಸಿಕೆಯ ತುರ್ತು ಬಳಕೆಗೆ ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಅನುಮತಿ ಕೋರಿದೆ. ಈ ಸಂಬಂಧ ಭಾರತದ ಔಷಧ ನಿಯಂತ್ರಣ ಮಹಾನಿರ್ದೇಶನಾಲಯಕ್ಕೆ (DCGI) ಅರ್ಜಿ ಸಲ್ಲಿಸಿದೆ. ಭಾರತದಲ್ಲಿ ಕೊರೋನಾ ಲಸಿಕೆಯ ಬಳಕೆಗೆ ಅನುಮತಿ ಕೋರಿ ಅರ್ಜಿ ಸಲ್ಲಿಸಿದ 2ನೇ ಕಂಪನಿ ಇದಾಗಿದೆ. ನಿನ್ನೆಯಷ್ಟೇ ಅಮೆರಿಕದ ಫೈಝರ್ (Pfizer) ಮತ್ತು ಬಿಯೋನ್ಟೆಕ್ (BIONTECH) ಕಂಪನಿ ತಾನು ಅಭಿವೃದ್ಧಿಪಡಿಸಿರುವ ಲಸಿಕೆಗೆ ಅನುಮತಿ ಕೋರಿ DCGIಗೆ ಪತ್ರ ಬರೆದಿತ್ತು.
ಭಾರತದಲ್ಲಿ ಆಕ್ಸ್ಫರ್ಡ್ ಲಸಿಕೆಯ 3ನೇ ಮತ್ತು ಕೊನೇ ಹಂತದ ಮಾನವ ಪ್ರಯೋಗ ನಡೆಯುತ್ತಿದೆ. ಇದರ ಜವಾಬ್ದಾರಿಯನ್ನ ಸೀರಂ ಇನ್ಸ್ಟಿಟ್ ಆಫ್ ಇಂಡಿಯಾ ವಹಿಸಿಕೊಂಡಿದೆ. ಮತ್ತೊಂದುಕಡೆ ಫೈಝರ್ ಲಸಿಕೆಯ ಮಾನವ ಪ್ರಯೋಗ ಭಾರತದಲ್ಲಿ ನಡೆದಿಲ್ಲ. ಅಲ್ಲದೆ ಫೈಝರ್ ಲಸಿಕೆಯ ನಿರ್ವಹಣೆ ಕೂಡ ಕಷ್ಟ. ಹೀಗಾಗಿ ಆಕ್ಸ್ಫರ್ಡ್ ಲಸಿಕೆ ಮೇಲೆ ಭಾರತ ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದೆ. ಸೋ ಮೊದಲು ಯಾವ ಲಸಿಕೆಗೆ ಅನುಮತಿ ಸಿಗುತ್ತೆ ಅನ್ನೋದು ಸಾಕಷ್ಟು ಕುತೂಹಲ ಕೆರಳಿಸಿದೆ. ಅನುಮತಿ ಸಿಗುತ್ತಿದ್ದಂತೇ ದೇಶದಲ್ಲಿ ಕೊರೋನಾ ಲಸಿಕೆಯ ಅಭಿಯಾನ ಕೂಡ ಆರಂಭವಾಗಲಿದೆ.
ಆಕ್ಸ್ಫರ್ಡ್ ಲಸಿಕೆಯ ಅರ್ಧ ಡೋಸ್ 90% ಪರಿಣಾಮಕಾರಿಯಾದ್ರೆ, ಪೂರ್ತಿ ಡೋಸ್ 62% ಪರಿಣಾಮಕಾರಿ ಅಂತ ಇತ್ತೀಚೆಗೆ ಕಂಪನಿ ಘೋಷಿಸಿಕೊಂಡಿತ್ತು. ಎರಡನ್ನೂ ಸೇರಿಸಿ ತಮ್ಮ ಲಸಿಕೆ 70.4% ಪರಿಣಾಮಕಾರಿ ಅಂತ ಹೇಳಿತ್ತು.
-masthmagaa.com
Contact Us for Advertisement