masthmagaa.com:
ಭಾರತದ ಭೂಸೇನಾ ಮುಖ್ಯಸ್ಥ ಜನರಲ್ ಎಂ.ಎಂ. ನರಾವಣೆ ಡಿಸೆಂಬರ್ 9ರಿಂದ 14ರವರೆಗೆ ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ಮತ್ತು ಸೌದಿ ಅರೇಬಿಯಾ ಪ್ರವಾಸ ಕೈಗೊಳ್ಳಲಿದ್ದಾರೆ. ಈ ಮೂಲಕ ಭಾರತದ ಸೇನಾ ಮುಖ್ಯಸ್ಥರೊಬ್ಬರು ಈ ದೇಶಗಳಿಗೆ ಭೇಟಿ ನೀಡುತ್ತಿರೋದು ಇದೇ ಮೊದಲು. ಭೇಟಿ ವೇಳೆ ಎರಡೂ ದೇಶಗಳ ಸೇನಾ ಮುಖ್ಯಸ್ಥರನ್ನ ಭೇಟಿಯಾಗಲಿರುವ ನರಾವಣೆ ರಕ್ಷಣಾ ಸಂಬಂಧವನ್ನ ಮತ್ತಷ್ಟು ಗಟ್ಟಿಗೊಳಿಸುವ ಕುರಿತು ಮಾತುಕತೆ ನಡೆಸಲಿದ್ದಾರೆ. ರಾಜತಾಂತ್ರಿಕ ಉದ್ದೇಶದಿಂದ ಭೂಸೇನಾ ಮುಖ್ಯಸ್ಥರು ಈ ವರ್ಷದಲ್ಲಿ ಫಾರಿನ್ ಟೂರ್ ಹೋಗ್ತಿರೋದು ಇದು ಮೂರನೇ ಸಲ. ಅಕ್ಟೋಬರ್ನಲ್ಲಿ ಮ್ಯಾನ್ಮಾರ್ ಮತ್ತು ನವೆಂಬರ್ನಲ್ಲಿ ನೇಪಾಳಕ್ಕೆ ಭೇಟಿ ನೀಡಿದ್ದರು ನರಾವಣೆ. ಭಾರತ ಮತ್ತು ಚೀನಾ ನಡುವೆ ಗಡಿಯಲ್ಲಿ ಸಂಘರ್ಷದ ವಾತಾವರಣ ಮುಂದುವರಿದಿರುವ ನಡುವೆಯೇ ಸೇನಾ ಮುಖ್ಯಸ್ಥರು ವಿವಿಧ ದೇಶಗಳ ಜೊತೆಗೆ ರಕ್ಷಣಾ ಸಂಬಂಧವನ್ನ ಗಟ್ಟಿಗೊಳಿಸಲು ಮುಂದಾಗಿರೋದು ಗಮನಾರ್ಹ. ಡಿಸೆಂಬರ್ 9-10 ರಂದು ಸೇನಾ ಮುಖ್ಯಸ್ಥರು ಯುಎಇನಲ್ಲಿ ಇರಲಿದ್ದಾರೆ. ಡಿಸೆಂಬರ್ 11-12 ಶುಕ್ರವಾರ-ಶನಿವಾರ ಆಗಿರೋದ್ರಿಂದ ಪಶ್ಚಿಮ ಏಷ್ಯಾ ರಾಷ್ಟ್ರಗಳಲ್ಲಿ ಅಂದು ರಜಾ ದಿನ. ಹೀಗಾಗಿ ಡಿಸೆಂಬರ್ 13-14ರಂದು ಸೌದಿ ಅರೇಬಿಯಾದಲ್ಲಿ ಇರಲಿದ್ದಾರೆ.
-masthmagaa.com
Contact Us for Advertisement