masthmagaa.com:
ಕೊರೋನಾ ವೈರಸ್ಗೆ ಹೈದ್ರಾಬಾದ್ ಮೂಲದ ಭಾರತ್ ಬಯೋಟೆಕ್ ಮತ್ತು ಐಸಿಎಂಆರ್ ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ‘ಕೋವಾಕ್ಸಿನ್’ ಲಸಿಕೆಯ ತುರ್ತು ಬಳಕೆಗೆ ಅನುಮತಿ ಕೋರಿ ಭಾರತ್ ಬಯೋಟೆಕ್ ಕಂಪನಿ ಭಾರತೀಯ ಔಷಧ ನಿಯಂತ್ರಣ ನಿರ್ದೇಶನಾಲಯಕ್ಕೆ (DCGI) ಅರ್ಜಿ ಸಲ್ಲಿದೆ. ಭಾರತದಲ್ಲಿ ಕೊರೋನಾ ಲಸಿಕೆಗೆ ಅನುಮತಿ ಕೋರಿದ 3ನೇ ಕಂಪನಿ ಇದಾಗಿದೆ. ಈ ಹಿಂದೆ ಅಮೆರಿಕದ ಫೈಝರ್ ಮತ್ತು ಭಾರತದ ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಕೂಡ ಅನುಮತಿ ಕೇಳಿತ್ತು. ಆದ್ರೆ ಇದುವರೆಗೆ ಭಾರತದಲ್ಲಿ ಯಾವ ಲಸಿಕೆಗೂ ಅನುಮತಿ ಸಿಕ್ಕಿಲ್ಲ. ಮೂಲಗಳ ಪ್ರಕಾರ ಈ ಮೂರು ಕಂಪನಿಗಳ ಮನವಿಯನ್ನ ತಜ್ಞರ ಸಮಿತಿ ನಾಳೆ ಪರಿಶೀಲನೆ ನಡೆಸುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಈ ಲಸಿಕೆಗಳ ಪೈಕಿ ಭಾರತ್ ಬಯೋಟೆಕ್ನ ‘ಕೋವಾಕ್ಸಿನ್’ ಮತ್ತು ಸೀರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾದ ಆಕ್ಸ್ಫರ್ಡ್ ಲಸಿಕೆಯಾದ ‘ಕೋವಿಶೀಲ್ಡ್’ ಲಸಿಕೆಗಳ ಮಾನವ ಪ್ರಯೋಗ ಭಾರತದಲ್ಲಿ ನಡೆಯುತ್ತಿದೆ. ಆದ್ರೆ ಫೈಝರ್ ಲಸಿಕೆಯ ಮಾನವ ಪ್ರಯೋಗ ನಮ್ಮ ದೇಶದಲ್ಲಿ ನಡೆದಿಲ್ಲ. ಮತ್ತೊಂದು ವಿಚಾರ ಅಂದ್ರೆ ಫೈಝರ್ ಲಸಿಕೆ 95% ಪರಿಣಾಮಕಾರಿ ಅಂತ ಕಂಪನಿ ಘೋಷಿಸಿಕೊಂಡಿದೆ. ಆಕ್ಸ್ಫರ್ಡ್ ಲಸಿಕೆಯ ಅರ್ಧ ಡೋಸ್ 90% ಪರಿಣಾಮಕಾರಿ, ಪೂರ್ತಿ ಡೋಸ್ 62% ಪರಿಣಾಮಕಾರಿ ಅಂತ ಕಂಪನಿ ಘೋಷಿಸಿಕೊಂಡಿದೆ. ಆದ್ರೆ ಭಾರತ್ ಬಯೋಟೆಕ್ನ ‘ಕೋವಾಕ್ಸಿನ್’ ಲಸಿಕೆ ಎಷ್ಟು ಪರಿಣಾಮಕಾರಿ ಅನ್ನೋದನ್ನ ಕಂಪನಿ ಇನ್ನೂ ಹೇಳಿಲ್ಲ. ಈ ಎಲ್ಲಾ ಅಂಶಗಳನ್ನ ಗಮನದಲ್ಲಿಟ್ಟುಕೊಂಡು ತಜ್ಞರ ಸಮಿತಿ ಲಸಿಕೆಗೆ ಅನುಮೋದನೆ ಕೊಡಲಿದೆ. DCGI ಅನುಮೋದನೆ ಕೊಟ್ಟ ತಕ್ಷಣ ದೇಶದಲ್ಲಿ ಕೊರೋನಾ ಲಸಿಕೆ ಲಭ್ಯವಾಗಲಿದೆ, ಲಸಿಕೆ ಹಾಕುವ ಅಭಿಯಾನ ಶುರುವಾಗಲಿದೆ.
-masthmagaa.com
Contact Us for Advertisement