masthmagaa.com:
ಕೊರೋನಾ ವೈರಸ್ ಸಾಮಾನ್ಯ ಉಸಿರಾಟ ಹಾಗೂ ಮಾತನಾಡುವ ಮೂಲಕ ಗಾಳಿಯಲ್ಲಿ ಹರಡುವ ಸಾಧ್ಯತೆ ಇದೆ ಅಂತ ಅಮೆರಿಕದ ಉನ್ನತ ವಿಜ್ಞಾನಿಗಳು ಹೇಳಿದ್ದಾರೆ. ಇದರ ಬೆನ್ನಲ್ಲೇ ಅಮೆರಿಕದಲ್ಲಿ ಸೋಂಕಿತರು ಮಾತ್ರವಲ್ಲದೆ ಪ್ರತಿಯೊಬ್ಬರೂ ಮಾಸ್ಕ್ ಧರಿಸುವಂತೆ ಅಲ್ಲಿನ ಸರ್ಕಾರ ಸೂಚಿಸಿದೆ.
ಅಮೆರಿಕದ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಹೆಲ್ತ್ನಲ್ಲಿ ಸಾಂಕ್ರಾಮಿಕ ರೋಗಗಳ ಮುಖ್ಯಸ್ಥರಾಗಿರೋ ಡಾ. ಆಂಥೋನಿ ಫೌಚಿ, ‘ಕೆಮ್ಮು ಮತ್ತು ಸೀನುವಿಕೆಯಿಂದ ಮಾತ್ರವಲ್ಲದೆ ಜನರು ಮಾತನಾಡುವಾಗಲೂ ವೈರಸ್ ಹರಡಬಹುದು ಅಂತ ಇತ್ತೀಚಿನ ಕೆಲ ಸಂಶೋಧನೆಗಳಲ್ಲಿ ಕಂಡುಬಂದಿದೆ’ ಎಂದಿದ್ದಾರೆ.
ಏಪ್ರಿಲ್ 1ರಂದು ನ್ಯಾಷನಲ್ ಅಕಾಡೆಮಿ ಆಫ್ ಸೈನ್ಸ್ (ಎನ್ಎಎಸ್) ಕೊರೋನಾ ವೈರಸ್ ಕುರಿತ ಸಂಶೋಧನೆಯೊಂದರ ವರದಿಯನ್ನ ಶ್ವೇತಭವನಕ್ಕೆ ಕಳುಹಿಸಿದ ನಂತರ ಡಾ. ಫೌಚಿ ಈ ಹೇಳಿಕೆಯನ್ನು ಕೊಟ್ಟಿರೋದು ಸಾಕಷ್ಟು ಮಹತ್ವ ಪಡೆದಿದೆ. ಸಂಶೋಧನೆ ಇನ್ನೂ ಪೂರ್ಣಗೊಳ್ಳದಿದ್ದರೂ, ಲಭ್ಯವಿರುವ ಅಧ್ಯಯನಗಳ ಪ್ರಕಾರ ಸಾಮಾನ್ಯ ಉಸಿರಾಟದಿಂದ ಗಾಳಿಯ ಮೂಲಕ ಸೋಂಕು ಹರಡಬಹುದು ಅಂತ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಇದುವರೆಗೆ ಸೀನುವಾಗ ಅಥವಾ ಕೆಮ್ಮಿದಾಗ ಹೊರಬರುವ ಡ್ರಾಪ್ಲೆಟ್ಸ್ಗಳು ಕೊರೋನಾ ಸೋಂಕು ಹರಡುವ ಪ್ರಾಥಮಿಕ ಮಾರ್ಗ ಅಂತ ಅಮೆರಿಕದ ಆರೋಗ್ಯ ಸಂಸ್ಥೆಗಳು ಹೇಳಿದ್ದವು. ಹೀಗಾಗಿ ಸೋಂಕು ತಗುಲಿದವರು ಮಾತ್ರ ಮಾಸ್ಕ್ಗಳನ್ನ ಧರಿಸುವಂತೆ ಸೂಚಿಸಲಾಗಿತ್ತು. ಆದ್ರೀಗ ಗಾಳಿಯ ಮೂಲಕವೂ ಸೋಂಕು ಹರಡುವ ಸಾಧ್ಯತೆ ಇದೆ ಅಂತ ವಿಜ್ಞಾನಿಗಳು ಹೇಳಿರೋದು ಆತಂಕ ಹೆಚ್ಚಿಸಿದೆ.
-masthmagaa.com
Contact Us for Advertisement