masthmagaa.com:
ಅಮೆರಿಕದ ಅಧ್ಯಕ್ಷೀಯ ಚುನಾವಣೆಗೆ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿಯಾಗಿರುವ ಜೋ ಬೈಡೆನ್ ಚೀನಾ ಪರ ಸಾಫ್ಟ್ ಕಾರ್ನರ್ ತೋರಿಸುತ್ತಿದ್ದಾರೆ. ಹೀಗಾಗಿ ಅವರು ಅಮೆರಿಕ ಅಧ್ಯಕ್ಷರಾಗೋದು ಭಾರತಕ್ಕೆ ಒಳ್ಳೆಯ ವಿಚಾರವಲ್ಲ ಅಂತ ಡೊನಾಲ್ಡ್ ಟ್ರಂಪ್ ಪುತ್ರ ಡೊನಾಲ್ಡ್ ಟ್ರಂಪ್ ಜೂನಿಯರ್ ಹೇಳಿದ್ದಾರೆ. ಜೊತೆಗೆ ಜೋ ಬೈಡೆನ್ ಅವರ ಪುತ್ರ ಹಂಟರ್ ಬೈಡೆನ್ ವಿರುದ್ಧವೂ ಭ್ರಷ್ಟಾಚಾರದ ಆರೋಪಗಳನ್ನ ಮಾಡಿದ್ದಾರೆ.
‘ಹಂಟರ್ ಬೈಡೆನ್ಗೆ ಚೀನಾದವರು 1.5 ಬಿಲಿಯನ್ ಡಾಲರ್ ಕೊಟ್ಟಿದ್ದಾರೆ. ಆತ ಉದ್ಯಮಿ ಅನ್ನೋ ಕಾರಣಕ್ಕೆ ಇದನ್ನ ಕೊಟ್ಟಿರಬಹುದು ಅಥವಾ ಜೋ ಬೈಡೆನ್ ಮತ್ತು ಹಂಟರ್ ಬೈಡನ್ರನ್ನು ಖರೀದಿಸಬಹುದು ಅನ್ನೋ ಕಾರಣಕ್ಕೆ ಕೊಟ್ಟಿರಬಹುದು. ಹೀಗಾಗಿ ಬೈಡೆನ್ ಕುಟುಂಬಸ್ಥರು ಚೀನಾ ಪರವಾಗಿದ್ದಾರೆ. ಇದು ಭಾರತದ ದೃಷ್ಟಿಯಿಂದ ಒಳ್ಳೆಯ ವಿಚಾರವಲ್ಲ. ಚೀನಾದ ಬೆದರಿಕೆಗಳನ್ನು ನಾವು ಅರ್ಥ ಮಾಡಿಕೊಳ್ಳಬೇಕು. ಬಹುಶಃ ಭಾರತ ಮೂಲದ ಅಮೆರಿಕನ್ನರಿಗೆ ಈ ವಿಚಾರ ಚೆನ್ನಾಗಿ ಗೊತ್ತಿದೆ’ ಅಂತ ಡೊನಾಲ್ಡ್ ಟ್ರಂಪ್ ಜೂನಿಯರ್ ಹೇಳಿದ್ದಾರೆ.
42 ವರ್ಷದ ಡೊನಾಲ್ಡ್ ಟ್ರಂಪ್ ಜೂನಿಯರ್ 74 ವರ್ಷದ ತನ್ನ ತಂದೆಯ ಪುನರಾಯ್ಕೆಗಾಗಿ ಭಾರಿ ಸರ್ಕಸ್ ಮಾಡ್ತಿದ್ದಾರೆ. ಈ ಸಂಬಂಧ ‘ಲಿಬರಲ್ ಪ್ರಿವಿಲೇಜ್’ ಅನ್ನೋ ಪುಸ್ತಕ ಬರೆದು ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಜೋ ಬೈಡೆನ್ ಮತ್ತು ಅವರ ಕುಟುಂಬದ ವಿರುದ್ಧ ಸಾಲು ಸಾಲು ಆರೋಪಗಳನ್ನು ಮಾಡಿದ್ದಾರೆ. ಅಂದ್ಹಾಗೆ ನವೆಂಬರ್ 3ರಂದು ಅಮೆರಿಕದಲ್ಲಿ ಅಧ್ಯಕ್ಷೀಯ ಚುನಾವಣೆ ನಡೆಯಲಿದೆ. ಅಮೆರಿಕದಲ್ಲಿ ಭಾರತ ಮೂಲದ 30 ಲಕ್ಷಕ್ಕೂ ಹೆಚ್ಚು ಜನರಿದ್ದಾರೆ. ಹೀಗಾಗಿ ಎರಡೂ ಪಕ್ಷಗಳ ಅಭ್ಯರ್ಥಿಗಳು ಭಾರತೀಯ ಮೂಲದ ಅಮೆರಿಕನ್ನರ ಮತಗಳನ್ನು ಸೆಳೆಯಲು ಪ್ರಯತ್ನಿಸುತ್ತಿದ್ಧಾರೆ. ಇದಕ್ಕಾಗಿ ಭಾರತ-ಚೀನಾ ಸಂಘರ್ಷದ ವಿಚಾರವನ್ನು ಕೂಡ ಬಳಸಿಕೊಳ್ಳುತ್ತಿರೋದು ಗಮನಾರ್ಹ.
-masthmagaa.com
Contact Us for Advertisement