masthmagaa.com:
ಕಳೆದ ವರ್ಷ ಭಾರತ ಮತ್ತು ಪಾಕಿಸ್ತಾನ ನಡುವೆ ಸಂಘರ್ಷದ ವಾತಾವರಣ ನಿರ್ಮಾಣವಾಗಿದ್ದು ಎಲ್ಲರಿಗೂ ಗೊತ್ತಿದೆ. ಪುಲ್ವಾಮಾದಲ್ಲಿ ಉಗ್ರರ ದಾಳಿ ಬಳಿಕ ಭಾರತ ಪಾಕ್ ವಿರುದ್ಧ ಏರ್ಸ್ಟ್ರೈಕ್ ಮಾಡಿತ್ತು. ಪಾಕ್ ಗಡಿಯಲ್ಲಿದ್ದ ಉಗ್ರರ ಲಾಂಚ್ಪ್ಯಾಡ್ಗಳನ್ನ ಉಡೀಸ್ ಮಾಡಿತ್ತು. ಇದಾದ ಬಳಿಕ ಎರಡು ದೇಶಗಳ ನಡುವೆ ಯುದ್ಧವೇ ನಡೆದುಹೋಗಬಹುದು ಅನ್ನೋ ಪರಿಸ್ಥಿತಿ ಇತ್ತು. ಈ ಮಧ್ಯೆ ಭಾರತೀಯ ವಿಂಗ್ ಕಮಾಂಡರ್ ಅಭಿನಂದನ್ರನ್ನು ಪಾಕ್ ಸೇನೆ ಸೆರೆ ಹಿಡಿದಿತ್ತು. ಇದೆಲ್ಲಾ ಹಳೇ ವಿಚಾರ. ಆದ್ರೀಗ ಮತ್ತೊಂದು ಇಂಟರೆಸ್ಟಿಂಗ್ ವಿಚಾರ ಬೆಳಕಿಗೆ ಬಂದಿದೆ. ಅದೇನಂದ್ರೆ, ವಿಂಗ್ ಕಮಾಂಡರ್ ಅಭಿನಂದನ್ರನ್ನ ಬಿಡುಗಡೆ ಮಾಡುವಂತೆ ಪಾಕ್ ವಿದೇಶಾಂಗ ಸಚಿವ ಶಾ ಮೊಹಮ್ಮದ್ ಖುರೇಷಿ ಆಗ್ರಹಿಸಿದಾಗ ಪಾಕ್ ಸೇನಾ ಮುಖ್ಯಸ್ಥ ಖಮರ್ ಜಾವೆದ್ ಬಜ್ವಾ ಅವರ ಕಾಲುಗಳು ನಡುಗುತ್ತಿದ್ದವು ಅನ್ನೋ ವಿಚಾರ ಗೊತ್ತಾಗಿದೆ. ಇದನ್ನ ಸ್ವತಃ ಪಾಕ್ ಸಂಸದ ಅಯಾಝ್ ಸಾದಿಕ್ ಹೇಳಿದ್ದಾರೆ.
‘ನನಗೆ ನೆನಪಿದೆ, ಅಭಿನಂನ್ರನ್ನ ಸೆರೆ ಹಿಡಿದ ಬಳಿಕ ನಡೆದ ಸಭೆಗೆ ಜನರಲ್ ಬಜ್ವಾ ಬರುವಾಗ ಅವರು ಕಾಲುಗಳು ನಡುಗುತ್ತಿದ್ದವು, ಅವರು ಬೆವರುತ್ತಿದ್ದರು. ಈ ವೇಳೆ ವಿದೇಶಾಂಗ ಸಚಿವ ಶಾ ಮೊಹಮ್ಮದ್ ಖುರೇಷಿ ಅಭಿನಂದನ್ರನ್ನ ಹೋಗಲು ಬಿಡು. ಇಲ್ಲದಿದ್ದರೆ ಪಾಕಿಸ್ತಾನದ ಮೇಲೆ ರಾತ್ರಿ 9 ಗಂಟೆಗೆ ಭಾರತ ದಾಳಿ ಮಾಡುವ ಸಾಧ್ಯತೆ ಇದೆ ಅಂತ ಹೇಳಿದ್ದರು’ ಅಂತ PML-N ಪಕ್ಷದ ಸಂಸದ ಅಯಾಝ್ ಸಾದಿಕ್ ಪಾಕ್ ಸಂಸತ್ನಲ್ಲಿ ಹೇಳಿದ್ದಾರೆ. ಈ ಸಭೆಗೆ ಪ್ರಧಾನಿ ಇಮ್ರಾನ್ ಖಾನ್ ಗೈರಾಗಿದ್ದರು ಅನ್ನೋದು ಕೂಡ ಗೊತ್ತಾಗಿದೆ. ಅಂದ್ಹಾಗೆ PML-N ಪಕ್ಷ ಭಾರತದ ಮೋದಿ ಸರ್ಕಾರದ ಪರವಾಗಿದೆ ಅಂತ ಪಾಕ್ ಸರ್ಕಾರ ಮಾಡಿದ ಆರೋಪಕ್ಕೆ ಪ್ರತಿಕ್ರಿಯಿಸಿದ ಸಾದಿಕ್ ಈ ರೀತಿ ಹೇಳಿದ್ದಾರೆ. ಒಟ್ನಲ್ಲಿ ಭಾರತ ಮತ್ತು ಅಭಿನಂದನ್ ವಿಚಾರದಲ್ಲಿ ಪಾಕ್ ಸೇನಾ ಮುಖ್ಯಸ್ಥ ಗಢಗಢ ನಡುಗಿದ್ದಂತೂ ಸತ್ಯ ಅನ್ನೋದನ್ನ ಸ್ವತಃ ಪಾಕ್ ಒಪ್ಪಿಕೊಂಡಿದೆ.
ಇದರ ಬೆನ್ನಲ್ಲೇ ಅಂದು ಭಾರತದ ವಾಯುಪಡೆ ಮುಖ್ಯಸ್ಥರಾಗಿದ್ದ ಬಿ.ಎಸ್. ಧನೋವಾ ಪ್ರತಿಕ್ರಿಯೆ ನೀಡಿದ್ದು, ‘ಅಂದು ಏನಾದ್ರೂ ಪಾಕ್ ನಮ್ಮ ಮೇಲೆ ದಾಳಿ ಮಾಡಿದ್ದರೆ ಅವರ ಫಾರ್ವರ್ಡ್ ಪೋಸ್ಟ್ಗಳನ್ನ ಉಡೀಸ್ ಮಾಡ್ತಿದ್ವಿ. ಭಾರತ ಅದಕ್ಕೆ ತಯಾರಾಗಿತ್ತು. ಆದ್ರೆ ಪೂರ್ಣ ಪ್ರಮಾಣದ ಯುದ್ಧ ಮಾಡಬೇಕೋ ಅಥವಾ ಮುಂಚೂಣಿ ನೆಲೆಗಳನ್ನ ಮಾತ್ರ ಹೊಡೆದುರಿಳಿಸಬೇಕೋ ಅನ್ನೋದು ಕೇಂದ್ರ ಸರ್ಕಾರಕ್ಕೆ ಬಿಟ್ಟಿತ್ತು. ನಮ್ಮ ಸಾಮರ್ಥ್ಯ ಏನು ಅನ್ನೋದು ಪಾಕಿಸ್ತಾನಕ್ಕೆ ತಿಳಿದಿದೆ. ಹೀಗಾಗಿಯೇ ಸುಮ್ಮನಾದ್ರು’ ಅಂತ ಹೇಳಿದ್ದಾರೆ.
-masthmagaa.com
Contact Us for Advertisement