masthmagaa.com:
ರಷ್ಯಾದ ‘ಸ್ಪುಟ್ನಿಕ್-V’ ಕೊರೋನಾ ಲಸಿಕೆಯ ಮೊದಲ ಬ್ಯಾಚ್ ಮುಂದಿನ ವಾರ ಉತ್ತರಪ್ರದೇಶದ ಕಾನ್ಪುರಕ್ಕೆ ಬರಲಿದೆ. ಕಾನ್ಪುರದ ಗಣೇಶ್ ಶಂಕರ್ ವಿದ್ಯಾರ್ಥಿ ಮೆಡಿಕಲ್ ಕಾಲೇಜಿನಲ್ಲಿ ಅದರ 2 ಮತ್ತು 3ನೇ ಹಂತದ ಮಾನವ ಪ್ರಯೋಗ ನಡೆಯಲಿದೆ ಅಂತ ಕಾಲೇಜಿನ ಪ್ರಾಂಶುಪಾಲ ಆರ್.ಬಿ. ಕಮಲ್ ಹೇಳಿದ್ದಾರೆ. ಮಾನವ ಪ್ರಯೋಗಕ್ಕಾಗಿ ಈಗಾಗಲೇ 180 ಸ್ವಯಂಸೇವಕರನ್ನ ನೇಮಿಸಿಕೊಳ್ಳಲಾಗಿದೆ. ಸ್ವಯಂ ಸೇವಕರಿಗೆ ಒಂದು ಡೋಸ್ ಲಸಿಕೆ ನೀಡಿ ಪರೀಕ್ಷಿಸಲಾಗುತ್ತದೆ. ಅವಶ್ಯಕತೆಬಿದ್ದರೆ ಹೆಚ್ಚು ಡೋಸ್ಗಳನ್ನ ನೀಡಲಾಗುತ್ತದೆ. ಬಳಿಕ ಬಂದ ಫಲಿತಾಂಶನಿಂದ ರಷ್ಯಾ ಲಸಿಕೆ ಯಶಸ್ವಿಯೋ ಅಥವಾ ಇಲ್ಲವೋ ಅನ್ನೋದನ್ನ ನಿರ್ಧರಿಸಲಾಗುತ್ತದೆ ಅಂತ ಹೇಳಿದ್ದಾರೆ.
ಅಂದ್ಹಾಗೆ ರಷ್ಯಾ ಲಸಿಕೆಯ ಮಾನವ ಪ್ರಯೋಗಕ್ಕೆ ಭಾರತೀಯ ಔಷಧ ನಿಯಂತ್ರಣ ಪ್ರಾಧಿಕಾರ (DCGI) ಅನುಮತಿ ನೀಡಿದೆ. ದೇಶದಲ್ಲಿ ‘ಸ್ಪುಟ್ನಿಕ್-V’ ಲಸಿಕೆಯ ಪೂರೈಕೆ ಮತ್ತು ಮಾನವ ಪ್ರಯೋಗವನ್ನ ಡಾ. ರೆಡ್ಡೀಸ್ ಲ್ಯಾಬೊರೇಟರೀಸ್ ನೋಡಿಕೊಳ್ಳುತ್ತದೆ. ಈ ಕಂಪನಿಯು ರಷ್ಯನ್ ಡೈರೆಕ್ಟ್ ಇನ್ವೆಸ್ಟ್ಮೆಂಟ್ ಫಂಡ್ (RDIF) ಜೊತೆ ಒಪ್ಪಂದ ಮಾಡಿಕೊಂಡಿದೆ. ಇದರ ಪ್ರಕಾರ ಮಾನವ ಪ್ರಯೋಗದ ಬಳಿಕ ಭಾರತ ಸರ್ಕಾರವೇನಾದ್ರೂ ಲಸಿಕೆಗೆ ಅನುಮೋದನೆ ಕೊಟ್ಟರೆ ಭಾರತಕ್ಕೆ 10 ಕೋಟಿ ‘ಸ್ಪುಟ್ನಿಕ್-V’ ಡೋಸ್ಗಳನ್ನ RDIF ಪೂರೈಕೆ ಮಾಡಲಿದೆ. ಇತ್ತೀಚೆಗಷ್ಟೇ ಈ ಲಸಿಕೆಯು 92% ಸುರಕ್ಷಿತ ಅಂತ ಕಂಪನಿಯೇ ಘೋಷಿಸಿತ್ತು. ಹೀಗಾಗಿ ಈ ಲಸಿಕೆ ಮತ್ತು ಭಾರತದಲ್ಲಿ ಇದರ ಮಾನವ ಪ್ರಯೋಗ ಸಾಕಷ್ಟು ಕುತೂಹಲ ಕೆರಳಿಸಿದೆ.
-masthmagaa.com
Contact Us for Advertisement