masthmagaa.com:
ವಲಸೆ ಕಾರ್ಮಿಕರ ಮೇಲಿದ್ದ ಕೆಲವೊಂದು ವಿವಾದಾತ್ಮಕ ನಿರ್ಬಂಧಗಳನ್ನ ತೆಗೆದು ಹಾಕಲು ಸೌದಿ ಅರೇಬಿಯಾ ಮುಂದಾಗಿದೆ. ಇದರ ಪ್ರಕಾರ ವಲಸೆ ಕಾರ್ಮಿಕರು ಇನ್ಮುಂದೆ ಉದ್ಯೋಗ ಬದಲಿಸಲು, ವಿದೇಶಕ್ಕೆ ಪ್ರಯಾಣಿಸಲು ಅಥವಾ ದೇಶವನ್ನು ಶಾಶ್ವತವಾಗಿ ಬಿಡಲು ತಮ್ಮ ಉದ್ಯೋಗದಾತರ ಅನುಮತಿ ಪಡೆಯುವ ಅಗತ್ಯವಿರುವುದಿಲ್ಲ. ಈ ಮೂಲಕ ಭಾರತೀಯರು ಸೇರಿದಂತೆ ಉದ್ಯೋಗಕ್ಕಾಗಿ ಸೌದಿ ಅರೇಬಿಯಾಗೆ ತೆರಳುವ ವಲಸೆ ಕಾರ್ಮಿಕರು ನಿಟ್ಟುಸಿರು ಬಿಡುವಂತಾಗಿದೆ.
ಈಗಿರುವ ನಿರ್ಬಂಧಗಳಿಂದ ವಲಸೆ ಕಾರ್ಮಿಕರು ಹೆಚ್ಚೆಚ್ಚು ಶೋಷಣೆಗೆ ಒಳಗಾಗುತ್ತಿದ್ದರು. ಇದನ್ನ ತಪ್ಪಿಸಲು, ತನ್ನ ಪ್ರಜೆಗಳಿಗೆ ಉದ್ಯೋಗ ಸಿಗುವಂತೆ ಮಾಡಲು ಮತ್ತು ವಿದೇಶಿ ಪ್ರತಿಭೆಗಳನ್ನ ಆಹ್ವಾನಿಸಲು ಈ ನಿರ್ಧಾರ ಕೈಗೊಳ್ಳಲಾಗಿದೆ ಅಂತ ಸೌದಿ ಸರ್ಕಾರ ಹೇಳಿದೆ. ಈ ನಿಯಮಗಳು ಮಾರ್ಚ್ 14, 2021ರಿಂದ ಜಾರಿಗೆ ಬರಲಿದ್ದು ಖಾಸಗಿ ವಲಯದಲ್ಲಿ ಕೆಲಸ ಮಾಡುತ್ತಿರುವ ಎಲ್ಲಾ ವಲಸೆ ಕಾರ್ಮಿಕರಿಗೆ ಅನ್ವಯವಾಗಲಿದೆ. ಹೊಸ ನಿಯಮ ಸೌದಿ ಅರೇಬಿಯಾದ ಲೇಬರ್ ಮಾರ್ಕೆಟ್ ಮತ್ತು 1 ಕೋಟಿಗೂ ಹೆಚ್ಚು ವಲಸೆ ಕಾರ್ಮಿಕರ ಜೀವನದ ಮೇಲೆ ಬಹುದೊಡ್ಡ ಪರಿಣಾಮ ಬೀರಲಿದೆ ಅಂತಾನೇ ಹೇಳಲಾಗ್ತಿದೆ.
ಅಂದ್ಹಾಗೆ ಸದ್ಯ ಗಲ್ಫ್ ರಾಷ್ಟ್ರಗಳಲ್ಲಿ ‘ಕಫಲ’ ಅಥವಾ ‘ಸ್ಪಾನ್ಸರ್ಶಿಪ್’ ವ್ಯವಸ್ಥೆ ಇದೆ. ಇದರ ಪ್ರಕಾರ ವಲಸೆ ಕಾರ್ಮಿಕರು ಬೇರೆ ಕೆಲಸಕ್ಕೆ ಹೋಗಬೇಕಂದ್ರೆ, ದೇಶವನ್ನು ಬಿಡಬೇಕಂದ್ರೆ ಉದ್ಯೋಗದಾತರ ಅನುಮತಿ ಪಡೆಯಬೇಕು. ಇದು ಗುಲಾಮಗಿರಿಯ ಒಂದು ರೂಪ ಅಂತ ಮಾನವ ಹಕ್ಕುಗಳ ಪರ ಹೋರಾಡುವ ಸಂಘಟನೆಗಳು ವಿರೋಧಿಸಿದ್ದವು. ಇದೀಗ ಈ ನಿಯಮಗಳನ್ನ ಬದಲಾಯಿಸಲು ಸೌದಿ ಮುಂದಾಗಿದೆ. ಹೊಸ ನಿಯಮದ ಪ್ರಕಾರ, ವಲಸೆ ಕಾರ್ಮಿಕರು ವಿದೇಶಕ್ಕೆ ಹೋಗಬೇಕಂದ್ರೆ ಎಕ್ಸಿಟ್ ಅಥವಾ ರಿ ಎಂಟ್ರಿ ವೀಸಾಗೆ ಅವರೇ ದುಡ್ಡು ಕೊಡಬೇಕಾದ್ರೂ ಕೂಡ ಉದ್ಯೋಗದಾತರ ಅನುಮತಿ ಪಡೆಯುವ ಅಗತ್ಯವಿರುವುದಿಲ್ಲ. ಅವರೇ ನೇರವಾಗಿ ‘ಅಬ್ಶರ್’ ವ್ಯವಸ್ಥೆ ಮೂಲಕ ಮನವಿ ಸಲ್ಲಿಸಬಹುದು. ಜೊತೆಗೆ ಒಬ್ಬ ಉದ್ಯೋಗದಾತನಿಂದ ಸ್ಪಾನ್ಸರ್ಶಿಪ್ ವರ್ಗಾಯಿಸಿಕೊಳ್ಳಲು ಕೂಡ ವಲಸೆ ಕಾರ್ಮಿಕರಿಗೆ ಅವಕಾಶವಿರುತ್ತದೆ.
-masthmagaa.com
Contact Us for Advertisement