masthmagaa.com:
ಅಮೆರಿಕ: ಕೊರೋನಾದಿಂದ ಪೆಟ್ಟು ತಿಂದಿರುವ ಅಮೆರಿಕನ್ನರು ಮತ್ತು ಉದ್ಯಮಿಗಳಿಗಾಗಿ ಘೋಷಿಸಲಾದ 892 ಬಿಲಿಯನ್ ಡಾಲರ್ ಅಂದ್ರೆ 64 ಲಕ್ಷ ಕೋಟಿ ರೂಪಾಯಿಗೂ ಅಧಿಕ ಮೊತ್ತದ ಪರಿಹಾರ ಪ್ಯಾಕೇಜ್ಗೆ ಸಹಿ ಹಾಕಲು ಟ್ರಂಪ್ ನಿರಾಕರಿಸಿದ್ದಾರೆ. ಮೇಲ್ಮನೆಯಾದ ಸೆನೆಟ್ ಮತ್ತು ಕಾಂಗ್ರೆಸ್ನಲ್ಲಿ ಪಾಸ್ ಆಗಿದ್ದು, ಅಧ್ಯಕ್ಷ ಟ್ರಂಪ್ ಸಹಿ ಬಾಕಿ ಇತ್ತು. ಆದ್ರೆ ಈ ಬಗ್ಗೆ ಪ್ರತಿಕ್ರಿಯಿಸಿರುವ ಟ್ರಂಪ್, ಕಾಂಗ್ರೆಸ್ ಘೋಷಿಸಿರುವ ಪ್ಯಾಕೇಜ್ ಅತ್ಯಂತ ಕಡಿಮೆಯಾಗಿದೆ. ಕೊರೋನಾದಿಂದ ಜನ ಪರದಾಡುತ್ತಿದ್ದು, ಸಣ್ಣ ಉದ್ಯಮಗಳು ನೆಲಕ್ಕಚ್ಚಿ ಹೋಗಿವೆ. ಹೀಗಾಗಿ ಕಾಂಗ್ರೆಸ್ ಈ ಮಸೂದೆಯಲ್ಲಿ ತಿದ್ದುಪಡಿ ಮಾಡಿ, ವೈಯಕ್ತಿಕ ಪರಿಹಾರದ ಮೊತ್ತವನ್ನು 600 ಡಾಲರ್ನಿಂದ 2 ಸಾವಿರಕ್ಕೆ ಏರಿಸಬೇಕು.. ಅದೇ ರೀತಿ ದಂಪತಿಗೆ ನೀಡುವ ಪರಿಹಾರವನ್ನು 4 ಸಾವಿರ ಡಾಲರ್ಗೆ ಏರಿಸಬೇಕು ಅಂತ ಹೇಳಿದ್ದಾರೆ. ಚುನಾವಣೆಯಲ್ಲಿ ಸೋತು ಮನೆಗೆ ಹೋಗೋಕೆ ರೆಡಿಯಾಗಿರೋ ಟ್ರಂಪ್ ಈಗ ಹೊಸ ಆಟ ಹೂಡಿದ್ದಾರೆ.
600 ಡಾಲರ್, ಅಂದ್ರೆ 44 ಸಾವಿರ ರೂಪಾಯಿ ಒಬ್ಬೊಬ್ಬರಿಗೆ ಬಾಳ ಕಮ್ಮಿ ಆಯ್ತು. ನಾನು ಇದಕ್ಕೆ ಸೈನ್ ಹಾಕಲ್ಲ. ಅಟ್ಲೀಸ್ಟ್ ಒಬ್ಬೊಬ್ಬರಿಗೆ 73 ಸಾವಿರ ರೂಪಾಯಿ ಆದ್ರೂ ಕೊಡಬೇಕು. ಗಂಡ ಹೆಂಡತಿ ಇಬ್ರಿದ್ರೆ 1 ಲಕ್ಷದ 46 ಸಾವಿರ ರೂಪಾಯಿ ಆದ್ರೂ ಕೊಡಬೇಕು ಅಂತ ಟ್ರಂಪ್ ಹೇಳಿದ್ದಾರೆ. ಈ ಮೂಲಕ ನನ್ನಷ್ಟು ಜನಪರ ಅಧ್ಯಕ್ಷ ಯಾರೂ ಇಲ್ಲ ಅಂತಾ ತೋರಿಸಿಕೊಳ್ಳೋಕೆ ಟ್ರೈ ಮಾಡ್ತಿದಾರೆ.
ಟ್ರಂಪ್ ಕಡೆಯ ದಿನಗಳ ಕಾರ್ಯಾಚರಣೆ ಇಷ್ಟಕ್ಕೇ ನಿಂತಿಲ್ಲ. ಇಬ್ಬರು ರಿಪಬ್ಲಿಕನ್‌ ಮುಖಂಡರು ಸೇರಿದಂತೆ 15 ಜನರಿಗೆ ಕ್ಷಮಾದಾನ ಮಾಡುವ ಆದೇಶಕ್ಕೂ ಟ್ರಂಪ್ ಸಹಿ ಹಾಕಿದ್ದಾರೆ. ಈ ಸಂದರ್ಭದಲ್ಲಿ ಐವರ ಕ್ಷಮಾದಾನ ಅರ್ಜಿ ರಿಜೆಕ್ಟ್ ಮಾಡಿದ್ದು ಅವರಿಗೆ ಶಿಕ್ಷೆ ವಿಧಿಸಿ ಆದೇಶ ಹೊರಡಿಸಿದ್ದಾರೆ. ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಯುವ ಮುನ್ನ ಇನ್ನೂ ಹಲವರಿಗೆ ಕ್ಷಮಾದಾನ ನೀಡುವ ನಿರ್ಧಾರವನ್ನು ಟ್ರಂಪ್ ಕೈಗೊಳ್ಳಲಿದ್ದಾರೆ ಅಂತಾ ಹೇಳಲಾಗ್ತಿದೆ. ತಮ್ಮ ಅಧಿಕಾರಾವಧಿ ಅಂತ್ಯಗೊಳ್ಳಲು 3-4 ವಾರಗಳು ಬಾಕಿ ಇರುವಾಗ ಟ್ರಂಪ್ ಈ ಕ್ರಮ ಕೈಗೊಂಡಿದ್ದಾರೆ. ಅಧಿಕಾರದಿಂದ ನಿರ್ಗಮಿಸುವ ವೇಳೆ ಅಮೆರಿಕದ ಅಧ್ಯಕ್ಷರು ಇಂತಹ ನಿರ್ಧಾರ ಕೈಗೊಳ್ಳುವುದು ಇದು ಹೊಸದೇನಲ್ಲ. ಹಿಂದಿನವರೂ ಈ ಥರ ಮಾಡಿದ್ದಾರೆ.
-masthmagaa.com
Contact Us for Advertisement
