masthmagaa.com:
ನಾಳೆ ಎಲ್ಲಾ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶದಲ್ಲಿ ಕೊರೋನಾ ಲಸಿಕೆಯ ‘ಡ್ರೈ ರನ್’ ನಡೆಸುವಂತೆ ಕೇಂದ್ರ ಸರ್ಕಾರ ಸೂಚಿಸಿದೆ. ಇದಕ್ಕೆ ರಾಜ್ಯ ಸರ್ಕಾರ ಕೂಡ ರೆಡಿಯಾಗಿದೆ. ರಾಜ್ಯದ 5 ಜಿಲ್ಲೆಗಳಲ್ಲಿ ಡ್ರೈ ರನ್ ನಡೆಸಲಾಗುತ್ತೆ ಅಂತ ಆರೋಗ್ಯ ಸಚಿವ ಡಾ. ಕೆ. ಸುಧಾಕರ್ ಹೇಳಿದ್ದಾರೆ. ಡ್ರೈ ರನ್ ಅಂದ್ರೆ ಲಸಿಕೆ ಸಿಗೋದಕ್ಕೂ ಮೊದಲು ನಡೆಸುವ ಮಾಕ್ ಟೆಸ್ಟ್. ಈ ವೇಳೆ ಲಸಿಕೆ ಹಾಕಲು ಮಾಡಿಕೊಂಡಿರುವ ಸಿದ್ಧತೆ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತೆ. ಇತ್ತೀಚೆಗೆ 4 ರಾಜ್ಯಗಳ ತಲಾ ಎರಡೆರಡು ಜಿಲ್ಲೆಗಳಲ್ಲಿ ಡ್ರೈ ರನ್ ನಡೆಸಲಾಗಿತ್ತು. ಆದ್ರೆ ನಮ್ಮ ರಾಜ್ಯದಲ್ಲಿ ಲಸಿಕೆ ಹಾಕಲು ಹೆಚ್ಚು ಸಿದ್ಧತೆ ಮಾಡಿಕೊಂಡಿರೋದ್ರಿಂದ 5 ಜಿಲ್ಲೆಗಳಲ್ಲಿ ಡ್ರೈ ರನ್ ನಡೆಸಲಾಗ್ತಿದೆ ಅಂತ ಆರೋಗ್ಯ ಸಚಿವರು ಮಾಹಿತಿ ಕೊಟ್ರು. ಅಂದ್ಹಾಗೆ ಆಯಾ ರಾಜ್ಯಗಳ ರಾಜಧಾನಿಯ 3 ಕಡೆ ಡ್ರೈ ರನ್ ನಡೆಸಬೇಕು. ಇದಕ್ಕೆ ಬೇಕಿದ್ರೆ ಬೇರೆ ಜಿಲ್ಲೆಗಳನ್ನ ಕೂಡ ಸೇರಿಸಿಕೊಳ್ಳಬಹುದು ಅಂತ ಕೇಂದ್ರ ಸರ್ಕಾರ ಹೇಳಿತ್ತು. ನಮ್ಮ ರಾಜ್ಯದಲ್ಲಿ ಬೆಂಗಳೂರು ಜೊತೆಗೆ ಮೈಸೂರು, ಶಿವಮೊಗ್ಗ, ಬೆಳಗಾವಿ, ಕಲಬರಗಿ ಜಿಲ್ಲೆಗಳನ್ನ ಇದಕ್ಕೆ ಸೇರಿಸಿಕೊಳ್ಳಲಾಗಿದೆ. ಬೆಂಗಳೂರಿನ ವಿದ್ಯಾಪೀಠ, ಕಾಮಾಕ್ಷಿಪಾಳ್ಯ ಮತ್ತು ಆನೇಕಲ್.. ಈ ಮೂರು ಕಡೆ ಡ್ರೈ ರನ್ ನಡೆಯಲಿದ್ದು, ಒಟ್ಟು 75 ಜನರಿಗೆ ಲಸಿಕೆ ಹಾಕುವ ತಾಲೀಮು ನಡೆಸಲಿದ್ದಾರೆ ಸಿಬ್ಬಂದಿ.
ಇನ್ನು ಬ್ರಿಟನ್ನಿಂದ ಕರ್ನಾಟಕಕ್ಕೆ ಬಂದ ಸುಮಾರು 70ಕ್ಕೂ ಹೆಚ್ಚು ಜನ ಸಂಪರ್ಕಕ್ಕೆ ಸಿಗ್ತಿಲ್ಲ. ಅವರನ್ನ ಪತ್ತೆಹಚ್ಚುವ ಕೆಲಸ ನಡೀತಿದೆ ಅಂತಾನೂ ಆರೋಗ್ಯ ಸಚಿವರು ಹೇಳಿದ್ರು. ಇದುವರೆಗೆ ಬ್ರಿಟನ್ನಿಂದ ಬಂದ 33 ಜನರಿಗೆ ಕೊರೋನಾ ಪಾಸಿಟಿವ್ ಬಂದಿದೆ. ಇವರ ಪ್ರಾಥಮಿಕ ಸಂಪರ್ಕಕ್ಕೆ ಬಂದ 5 ಜನರಿಗೆ ಸೋಂಕು ತಗುಲಿದೆ. ಈ ಮೂಲಕ ಒಟ್ಟು 38 ಜನರಿಗೆ ಸೋಂಕು ತಗುಲಿದಂತಾಗಿದೆ. 38 ಜನರ ಸ್ಯಾಂಪಲ್ಗಳನ್ನ ಜೀನೋಮ್ ಸೀಕ್ವೆನ್ಸಿಂಗ್ಗಾಗಿ ಬೆಂಗಳೂರಿನ ನಿಮ್ಹಾನ್ಸ್ಗೆ ಕಳಿಸಲಾಗಿದೆ. ಇದರಲ್ಲಿ 7 ಜನರಿಗೆ ಬ್ರಿಟನ್ ಮಾದರಿಯ ರೂಪಾಂತರಿ ಕೊರೋನಾ ವೈರಸ್ ತಗುಲಿರೋದು ದೃಢಪಟ್ಟಿದೆ ಅಂತ ಡಾ.ಕೆ. ಸುಧಾಕರ್ ಹೇಳಿದ್ದಾರೆ.
-masthmagaa.com
Contact Us for Advertisement