masthmagaa.com:
ಕೊರೋನಾ ವೈರಸ್ಗೆ ಅಮೆರಿಕದ ‘ಫೈಝರ್’ (Pfizer) ಮತ್ತು ಜರ್ಮನಿಯ ‘ಬಯೋನ್ಟೆಕ್’ (BioNTech) ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಲಸಿಕೆ (BNT162b2) ವೈರಾಣುವಿನಿಂದ ರಕ್ಷಣೆ ನೀಡಲು 90%ಗೂ ಹೆಚ್ಚು ಪರಿಣಾಮಕಾರಿಯಾಗಿದೆ ಅಂತ ಕಂಪನಿ ಘೋಷಿಸಿದೆ. ಅಂದ್ಹಾಗೆ ಈ ಲಸಿಕೆಯ ಮೂರನೇ ಮತ್ತು ಕೊನೇ ಹಂತದ ಮಾನವ ಪ್ರಯೋಗ ಜುಲೈ 27ರಿಂದ ಆರಂಭವಾಗಿತ್ತು. ಇದುವರೆಗೆ 43,000ಕ್ಕೂ ಹೆಚ್ಚು ಸ್ವಯಂಸೇವಕರಿಗೆ ಲಸಿಕೆ ಹಾಕಲಾಗಿದೆ. ಈ ಪೈಕಿ 38,000 ಸ್ವಯಂ ಸೇವಕರು ಎರಡನೇ ಡೋಸ್ ಕೂಡ ಪಡೆದಿದ್ದಾರೆ. ಎರಡನೇ ಡೋಸ್ ಪಡೆದ 7 ದಿನದಲ್ಲಿ ಮತ್ತು ಮೊದಲ ಡೋಸ್ ಪಡೆದ 28 ದಿನಗಳಲ್ಲಿ ಸ್ವಯಂ ಸೇವಕರ ದೇಹದಲ್ಲಿ ಕೊರೋನಾ ವಿರುದ್ಧ ಪ್ರತಿರಕ್ಷಣಾ ವ್ಯವಸ್ಥೆ ರೂಪುಗೊಂಡಿದೆ ಅಂತ ಕಂಪನಿ ಹೇಳಿದೆ.
ಇದರ ಬೆನ್ನಲ್ಲೇ ಫೈಝರ್ ಕಂಪನಿಯ ಅಧ್ಯಕ್ಷ ಡಾ. ಆಲ್ಬರ್ಟ್ ಬೌರ್ಲ ಮಾತನಾಡಿ, ‘ಇವತ್ತು ವಿಜ್ಞಾನ ಮತ್ತು ಮನುಕುಲಕ್ಕೆ ದೊಡ್ಡ ದಿನವಾಗಿದೆ. ಈ ಲಸಿಕೆಯ ಮೂರನೇ ಹಂತದ ಮಾನವ ಪ್ರಯೋಗದ ಪ್ರಾಥಮಿಕ ಫಲಿತಾಂಶ ಬಂದಿದೆ. ಅದರಲ್ಲಿ ಈ ಲಸಿಕೆಯು ಕೊರೋನಾ ವಿರುದ್ಧ ರಕ್ಷಣೆ ನೀಡಲಿದೆ ಅನ್ನೋದಕ್ಕೆ ಸಾಕ್ಷ್ಯ ಸಿಕ್ಕಿದೆ’ ಅಂತ ಹೇಳಿದ್ದಾರೆ. ಜೊತೆಗೆ ಈ ವರ್ಷದಲ್ಲಿ 5 ಕೋಟಿ ಡೋಸ್ಗಳನ್ನ ಮತ್ತು 2021ರಲ್ಲಿ 130 ಕೋಟಿ ಡೋಸ್ಗಳನ್ನ ಉತ್ಪಾದನೆ ಮಾಡುವ ಗುರಿ ಹೊಂದಿದ್ದೇವೆ ಅಂತ ಹೇಳಿದ್ದಾರೆ. ಈ ಗುಡ್ ನ್ಯೂಸ್ ಬೆನ್ನಲ್ಲೇ ಗ್ಲೋಬಲ್ ಸ್ಟಾಕ್ ಮಾರ್ಕೆಟ್ ಮೇಲಕ್ಕೆದ್ದಿದೆ.
-masthmagaa.com
Contact Us for Advertisement