masthmagaa.com:
ವಿಶ್ವದ ಶ್ರೀಮಂತ ವ್ಯಕ್ತಿಗಳ ಪರಿಷ್ಕೃತ ಪಟ್ಟಿ ಬಿಡುಗಡೆಯಾಗಿದ್ದು ಟೆಸ್ಲಾ ಕಂಪನಿಯ ಸಹ-ಸಂಸ್ಥಾಪಕ ಎಲಾನ್ ಮಸ್ಕ್ ಮೈಕ್ರೋಸಾಫ್ಟ್‌ ಸಹ-ಸಂಸ್ಥಾಪಕ ಬಿಲ್ ಗೇಟ್ಸ್ ಅವರನ್ನ ಹಿಂದಿಕ್ಕಿ ಎರಡನೇ ಸ್ಥಾನಕ್ಕೆ ಏರಿದ್ದಾರೆ. ಬ್ಲೂಮ್ಬರ್ಗ್ ಸಂಸ್ಥೆಯು ವಿಶ್ವದ ಶ್ರೀಮಂತ ವ್ಯಕ್ತಿಗಳ 500 ಜನರ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇದರಲ್ಲಿ 49 ವರ್ಷ ವಯಸ್ಸಿನ ಎಲಾನ್ ಮಸ್ಕ್ ಅವರ ಆಸ್ತಿ 7.2 ಬಿಲಿಯನ್ ಡಾಲರ್ನಷ್ಟು (ಭಾರತದ ರೂಪಾಯಿ ಲೆಕ್ಕದಲ್ಲಿ ಸುಮಾರು 52,000 ಕೋಟಿ) ಏರಿಕೆ ಕಂಡಿದೆ. ಈ ಮೂಲಕ ಅವರ ಒಟ್ಟು ಆಸ್ತಿ 127.9 ಬಿಲಿಯನ್ ಡಾಲರ್ ಆಗಿದೆ (ಭಾರತದ ರೂಪಾಯಿ ಲೆಕ್ಕದಲ್ಲಿ 9.36 ಲಕ್ಷ ಕೋಟಿ). ಇತ್ತೀಚೆಗೆ ನಾಸಾ ಜೊತೆಗೆ ಸೇರಿಕೊಂಡು ಸ್ಪೇಸ್ ಎಕ್ಸ್ ಕಂಪನಿ ಮಾಡಿದ ಪ್ರಾಜೆಕ್ಟ್ಗಳು ಸಕ್ಸಸ್ ಆದ ಪರಿಣಾಮ ಷೇರುಗಳ ಮೌಲ್ಯ ಹೆಚ್ಚಾಗಿದೆ. ಮೂರನೇ ಸ್ಥಾನದಲ್ಲಿರುವ ಬಿಲ್ ಗೇಟ್ಸ್ ಆಸ್ತಿಗೂ ಎಲಾನ್ ಮಸ್ಕ್ ಆಸ್ತಿಗೂ ಹೆಚ್ಚೇನೂ ಅಂತರವಿಲ್ಲ. ಮಸ್ಕ್ ಬಳಿ 127.9 ಬಿಲಿಯನ್ ಡಾಲರ್ ಮತ್ತು ಗೇಟ್ಸ್ ಬಳಿ 127.7 ಬಿಲಿಯನ್ ಡಾಲರ್ ಆಸ್ತಿ ಇದೆ. ವಿಶ್ವದ ಕುಬೇರರ ಈ ಪಟ್ಟಿಯಲ್ಲಿ ಅಮೆಜಾನ್ ಸಿಇಒ ಜೆಫ್ ಬೆಝೋಸ್ ಆರಾಮಾಗಿ ಕೂತಿದ್ದಾರೆ. ಬೆಝೋಸ್ ಆಸ್ತಿ ಬರೋಬ್ಬರಿ 182 ಬಿಲಿಯನ್ ಡಾಲರ್. ಇವರನ್ನ ಹಿಂದಿಕ್ಕಿ ಮೊದಲ ಸ್ಥಾನಕ್ಕೇರುವ ಅವಕಾಶ ಎಲಾನ್ ಮಸ್ಕ್ಗೆ ಇದೆ. ಯಾಕಂದ್ರೆ ಮಸ್ಕ್ ಆಸ್ತಿಯಲ್ಲಿ ಒಂದೇ ವರ್ಷ 100 ಬಿಲಿಯನ್ ಡಾಲರ್ನಷ್ಟು ಏರಿಕೆ ಕಂಡಿದೆ. ಇದು ಹೀಗೇ ಮುಂದುವರೆದ್ರೆ ಶೀಘ್ರದಲ್ಲೇ ಎಲಾನ್ ಮಸ್ಕ್ ವಿಶ್ವದ ನಂಬರ್ ಒನ್ ಶ್ರೀಮಂತ ಎನಿಸಿಕೊಳ್ಳಲಿದ್ದಾರೆ. ಮೊದಲ ಮೂರು ಸ್ಥಾನದಲ್ಲಿರುವವರು ಅಮೆರಿಕದವರು ಅನ್ನೋದು ಗಮನಾರ್ಹ.
ಬ್ಲೂಮ್ಬರ್ಗ್ ಬಿಲಿಯನೇರ್‌ ಇಂಡೆಕ್ಸ್ನ ಟಾಪ್-100ರಲ್ಲಿ ಭಾರತದ 4 ಉದ್ಯಮಿಗಳಿದ್ದಾರೆ. ಮುಕೇಶ್ ಅಂಬಾನಿ 10ನೇ ಸ್ಥಾನದಲ್ಲಿದ್ರೆ, ಗೌತಮ್‌ ಅದಾನಿ 40, ಅಜೀಮ್‌ ಪ್ರೇಮ್‌ಜಿ 56 ಮತ್ತು HCL ಸಂಸ್ಥಾಪಕ ಶಿವ್‌ನಾಡಾರ್‌ 71ನೇ ಸ್ಥಾನದಲ್ಲಿದ್ದಾರೆ.
-masthmagaa.com
Contact Us for Advertisement