masthmagaa.com:
ಇಂಗ್ಲೆಂಡ್ನಲ್ಲಿ ಒಮೈಕ್ರಾನ್ ವೈರಾಣು ಸಾಮುದಾಯಿಕ ಮಟ್ಟದಲ್ಲಿ ಹರಡಿದೆ ಅಂತ ಯುನೈಟೆಡ್ ಕಿಂಗ್ಡಮ್ ಆರೋಗ್ಯ ಸಚಿವ ಸಾಜಿದ್ ಜಾವಿದ್ ಹೇಳಿದ್ದಾರೆ. ಸಂಸತ್ನಲ್ಲಿ ಒಮೈಕ್ರಾನ್ ತಡೆಗೆ ತೆಗೆದುಕೊಂಡಿರೋ ಟಫ್ ರೂಲ್ಸ್ಗಳನ್ನು ಸಮರ್ಥಿಸಿಕೊಂಡಿರೋ ಇವರು, ದೇಶದಲ್ಲಿ ಈವರೆಗೆ 336 ಒಮೈಕ್ರಾನ್ ಪ್ರಕರಣಗಳು ಪತ್ತೆಯಾಗಿವೆ. ಇಂಗ್ಲೆಂಡ್ನಲ್ಲಿ 261, ಸ್ಕಾಟ್ಲ್ಯಾಂಡ್ನಲ್ಲಿ 71 ಮತ್ತು ವೇಲ್ಸ್ನಲ್ಲಿ 4 ಮಂದಿಗೆ ಒಮೈಕ್ರಾನ್ ಅಂಟಿದೆ ಅಂತ ಮಾಹಿತಿ ನೀಡಿದ್ದಾರೆ. ಇವರಲ್ಲಿ ವಿದೇಶ ಪ್ರಯಾಣ ಮಾಡದವರೂ ಸೇರಿದ್ದಾರೆ. ಹೀಗಾಗಿ ಸಮುದಾಯ ಮಟ್ಟದಲ್ಲಿ ಒಮೈಕ್ರಾನ್ ಹರಡೋಕೆ ಶುರುವಾಗಿದೆ ಅಂತ ಹೇಳಿದ್ದಾರೆ.
ಒಮೈಕ್ರಾನ್ ಬೆನ್ನಲ್ಲೇ ಫ್ರಾನ್ಸ್ನಲ್ಲೂ ನಿರಂತರವಾಗಿ ಕೊರೋನಾ ಜಾಸ್ತಿಯಾಗ್ತಿದೆ. ಹೀಗಾಗಿ ಮುಂದಿನ 4 ವಾರಗಳ ಕಾಲ ನೈಟ್ಕ್ಲಬ್ಗಳನ್ನು ಬಂದ್ ಮಾಡುವಂತೆ ಆದೇಶಿಸಿದೆ. ಯುವಕರಲ್ಲಿ ಹೆಚ್ಚಾಗಿ ಕೊರೋನಾ ಹರಡುತ್ತಿರೋದ್ರಿಂದ ಶಾಲಾ ಕಾಲೇಜುಗಳಲ್ಲಿ ಸಾಮಾಜಿಕ ಅಂತರ ಮತ್ತು ಮಾಸ್ಕ್ ಕಡ್ಡಾಯದಂತ ರೂಲ್ಸ್ಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆಯೂ ಸೂಚಿಸಲಾಗಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿರೋ ಪ್ರಧಾನಿ ಜೀನ್ ಕ್ಯಾಸ್ಟೆಕ್ಸ್, ಲಾಕ್ಡೌನ್ ಮಾಡೋ ಪ್ಲಾನ್ ಸದ್ಯಕ್ಕಿಲ್ಲ. ನಮ್ ದೇಶಲ್ಲಿ 90 ಪರ್ಸೆಂಟ್ನಷ್ಟು ವಯಸ್ಕರಿಗೆ ಲಸಿಕೆ ಹಾಕಿಯಾಗಿದೆ ಅಂತ ಹೇಳಿದ್ದಾರೆ.
ಅಮೆರಿಕದ ನ್ಯೂಯಾರ್ಕ್ನಲ್ಲಿ ಖಾಸಗಿ ಕಂಪನಿಗಳ ಉದ್ಯೋಗಿಗಳಿಗೂ ಲಸಿಕೆ ಕಡ್ಡಾಯಗೊಳಿಸಲಾಗಿದೆ. ಇದೇ ಮೊದಲ ಬಾರಿಗೆ ಅಮೆರಿಕದ ರಾಜ್ಯವೊಂದರಲ್ಲಿ ಖಾಸಗಿ ಕಂಪನಿಗಳಲ್ಲಿ ಈ ರೀತಿ ಲಸಿಕೆ ಕಡ್ಡಾಯಗೊಳಿಸಿದಂತಾಗಿದೆ. ಇತ್ತೀಚೆಗೆ ಜೋ ಬೈಡೆನ್ ದೇಶದಾದ್ಯಂತ ನೂರಕ್ಕೂ ಹೆಚ್ಚು ನೌಕರರನ್ನು ಹೊಂದಿರೋ ಕಂಪನಿಗಳು ಜನವರಿ 4ರ ಒಳಗಾಗಿ ಕಂಪ್ಲೀಟಾಗಿ ಲಸಿಕೆ ಹಾಕಿಸಿಕೊಳ್ಳಬೇಕು ಅಂತ ಆದೇಶಿಸಿದ್ರು. ಆದ್ರೆ ಈ ಆದೇಶಕ್ಕೆ ಕೋರ್ಟ್ ತಡೆ ನೀಡಿತ್ತು.
-masthmagaa.com
