masthmagaa.com:
ಅಪೋಲೋ – 11 ಮಿಷನ್ ಬಗ್ಗೆ ನಿಮಗೆ ಗೊತ್ತಿರಬಹುದು. ಗೊತ್ತಿಲ್ಲ ಅಂದ್ರೆ ಹೇಳ್ತೀವಿ.. ಇದು ಚಂದ್ರನ ಅಂಗಳನ ಮೇಲೆ ಮೊದಲ ಬಾರಿ ಮಾನವನನ್ನ ಇಳಿಸಿದ ಮಿಷನ್. 1969ರಲ್ಲಿ ನಾಸಾದ ಮೂವರು ಗಗನಯಾತ್ರಿಗಳಾದ ನೀಲ್ ಆರ್ಮ್ಸ್ಟ್ರಾಂಗ್, ಬಝ್ ಆಲ್ಡ್ರಿನ್ ಮತ್ತು ಮೈಕಲ್ ಕೋಲಿನ್ಸ್ ಈ ಮಿಷನ್ ಕೈಗೊಂಡಿದ್ರು. 1969ರ ಜುಲೈ 20ಕ್ಕೆ ಚಂದ್ರನ ಮೇಲೆ ಮೊದಲು ಕಾಲಿಟ್ಟಿದ್ದು ನೀಲ್ ಆರ್ಮ್ಸ್ಟ್ರಾಂಗ್ ಮತ್ತು ಬಝ್ ಆಲ್ಡ್ರಿನ್ ಮಾತ್ರ. ಅವರಿಬ್ರು ಇಳಿದು ಹತ್ತೋವರೆಗೆ ಕಮ್ಯಾಂಡ್ ಮಾಡ್ಯೂಲ್ ಹಾರುತ್ತಿರುವಂತೆ ನೋಡಿಕೊಂಡಿದ್ದೆಲ್ಲಾ ಮೈಕಲ್ ಕೋಲಿನ್ಸ್. ಅಂದ್ರೆ ಒಂದ್ರೀತಿ ಪೈಲಟ್ ರೀತಿ ಕೆಲಸ ಮಾಡಿದ್ರು ಮೈಕಲ್ ಕೋಲಿನ್ಸ್. ಹೀಗಾಗಿ ಆರ್ಮ್ಸ್ಟ್ರಾಂಗ್ ಮತ್ತು ಆಲ್ಡ್ರಿನ್ನಷ್ಟು ಮೈಕಲ್ ಕೋಲಿನ್ಸ್ ಅವರ ಹೆಸರು ಪ್ರಸಿದ್ಧಿ ಪಡೆಯಲೇ ಇಲ್ಲ. ಇದೇ ಕಾರಣಕ್ಕೆ ಮೈಕಲ್ ಕೋಲಿನ್ಸ್ ಅವರನ್ನ ‘forgotten astronaut’ – ಮರೆತುಹೋದ ಗಗನಯಾತ್ರಿ ಅಂತಾನೇ ಕರೀತಾರೆ. ಹೀಗೆ ಅಪೋಲೋ-11 ಸ್ಪೇಸ್ಫ್ಲೈಟ್ನ ಭಾಗವಾಗಿದ್ದ ಮೈಕಲ್ ಕೋಲಿನ್ಸ್ ತಮ್ಮ 90ನೇ ವಯಸ್ಸಿನಲ್ಲಿ ಇಹಲೋಕ ತ್ಯಜಿಸಿದ್ದಾರೆ. ಅವರು ಕ್ಯಾನ್ಸರ್ನಿಂದ ಬಳಲುತ್ತಿದ್ದರು. ಕೋಲಿನ್ಸ್ ಅಗಲಿಕೆಗೆ ನಾಸಾ ಕೂಡ ಗೌರವ ನಮನ ಸಲ್ಲಿಸಿದೆ. 1969ರಲ್ಲಿ ಚಂದ್ರನ ಮೇಲೆ ಲೂನಾರ್ ಮಾಡ್ಯೂಲ್ ‘ಈಗಲ್’ ಲ್ಯಾಂಡ್ ಆಗಿ, ಬಳಿಕ ಕಮ್ಯಾಂಡ್ ಮಾಡ್ಯೂಲ್ ‘ಕೊಲಂಬಿಯಾ’ಗೆ ವಾಪಸ್ ಬರುತ್ತಿರೋ ಫೋಟೋವನ್ನ ಮೈಕಲ್ ಕೋಲಿನ್ಸ್ ಕ್ಲಿಕ್ ಮಾಡಿದ್ದರು. ಅದೇ ಫೋಟೋವನ್ನ ಟ್ವೀಟ್ ಮಾಡುವ ಮೂಲಕ ನಾಸಾ ಗೌರವ ನಮನ ಸಲ್ಲಿಸಿದೆ.
-masthmagaa.com
Contact Us for Advertisement