masthmagaa.com:
ಆಗಸ್ಟ್ 31ಕ್ಕೆ ಏನಾಗುತ್ತೆ ಅನೋದರತ್ತ ವಿಶ್ವದ ಚಿತ್ತ ನೆಟ್ಟಿದೆ. ಯಾಕಂದ್ರೆ ಅಫ್ಘಾನಿಸ್ತಾನದಿಂದ ಹೊರಬರಲು ಅಮೆರಿಕ ಹಾಕಿಕೊಂಡಿರೋ ಡೆಡ್ಲೈನ್ ಆಗಸ್ಟ್ 31ಕ್ಕೆ ಮುಗಿಯುತ್ತಿದೆ. ನಿನ್ನೆಯಷ್ಟೇ ಜೋ ಬೈಡೆನ್ ಕೂಡ ಆಗಸ್ಟ್ 31ರೊಳಗೆ ಸ್ಥಳಾಂತರ ಪ್ರಕ್ರಿಯೆ ಮುಗಿಸ್ತೀವಿ ಅಂತ ಹೇಳಿದ್ರು. ಅದ್ರ ಬೆನ್ನಲ್ಲೇ ಕಾಬೂಲ್ ಏರ್ಪೋರ್ಟ್ನಲ್ಲಿ ಜನಜಂಗುಳಿ ಜಾಸ್ತಿಯಾಗಿತ್ತು. ಇದೀಗ ಆಗಸ್ಟ್ 31ರ ನಂತರವೂ ಅಫ್ಘಾನಿಸ್ತಾನದಿಂದ ಹೊರಹೋಗುವವರಿಗೆ ಅವಕಾಶ ನೀಡಲು ತಾಲಿಬಾನಿಗಳು ನಿರ್ಧರಿಸಿದ್ದಾರೆ. ಈ ಬಗ್ಗೆ ಮಾತನಾಡಿದ ಅಮೆರಿಕ ಸೆಕ್ರೆಟರಿ ಆಫ್ ಸ್ಟೇಟ್ ಅಂಟೋನಿ ಬ್ಲಿಂಕನ್, ಆಗಸ್ಟ್ 31ರ ನಂತರವೂ ಸ್ಥಳಾಂತರ ಪ್ರಕ್ರಿಯೆ ನಡೆಯಲಿದೆ. ಈ ವೇಳೆ ಜನರ ಸುರಕ್ಷತೆಗೆ ಸಂಬಂಧಿಸಿದಂತೆ ತಮ್ಮ ಜವಾಬ್ದಾರಿ ನಿಭಾಯಿಸುವಂತೆ ಅಮೆರಿಕ ಸೇರಿದಂತೆ 114 ದೇಶಗಳು ತಾಲಿಬಾನಿಗಳಿಗೆ ಸೂಚಿಸಿವೆ ಅಂತ ಹೇಳಿದ್ದಾರೆ. ಅಫ್ಘಾನಿಸ್ತಾನದಲ್ಲಿ ಒಂದು ಲೆಕ್ಕದ ಪ್ರಕಾರ 6 ಸಾವಿರ ಮಂದಿ ಅಮೆರಿಕನ್ನರು ಇದ್ದಾರೆ ಅಂತ ಅಂದಾಜಿಸಲಾಗಿತ್ತು. ಅವರಲ್ಲಿ ಈಗ 4000 ಮಂದಿಯನ್ನು ಸ್ಥಳಾಂತರ ಮಾಡಲಾಗಿದೆ. ಇನ್ನೂ ಒಂದೂವರೆ ಸಾವಿರ ಜನ ಅಲ್ಲೇ ಇದ್ದು, ಅವರಲ್ಲಿ 500 ಮಂದಿಯನ್ನು ಪತ್ತೆ ಮಾಡಲಾಗಿದೆ. ಅದೇ ರೀತಿ ಉಳಿದ 1 ಸಾವಿರ ಮಂದಿಯನ್ನು ಸಂಪರ್ಕಿಸುವ ಪ್ರಯತ್ನ ನಡೀತಾ ಇದೆ ಅಂತ ಹೇಳಿದ್ದಾರೆ. ಇತ್ತ ಜರ್ಮನಿ ಕೂಡ ಅಫ್ಘನ್ನರು ಆಗಸ್ಟ್ 31ರ ನಂತರವೂ ದೇಶ ತೊರೆಯಲು ಅವಕಾಶ ನೀಡೋದಾಗಿ ತಾಲಿಬಾನಿಗಳು ಭರವಸೆ ನೀಡಿದ್ದಾರೆ ಅಂತ ತಿಳಿಸಿದೆ. ಜರ್ಮನ್ ರಾಯಭಾರಿ ಮಾರ್ಕಸ್ ಪೋಟ್ಜೆಲ್ ತಾಲಿಬಾನ್ನ ಡೆಪ್ಯುಟಿ ಚೀಫ್ ನೆಗೋಷಿಯೇಟರ್ ಶೇರ್ ಮೊಹ್ಮದ್ ಅಬ್ಬಾಸ್ ಸ್ಟಾನಿಕ್ಝೈ ಜೊತೆ ಮಾತುಕತೆ ನಡೆಸಿದ್ದಾರೆ. ಈ ವೇಳೆ ಖಚಿತ ದಾಖಲೆ ಹೊಂದಿರೋ ಅಫ್ಘನ್ನರು ಆಗಸ್ಟ್ 31ರ ನಂತರವೂ ನಾಗರಿಕ ವಿಮಾನಗಳಲ್ಲಿ ಪ್ರಯಾಣಿಸಲು ಅನುಮತಿ ನೀಡ್ತೀವಿ. ಏರ್ಪೋರ್ಟ್ವರೆಗೆ ರಕ್ಷಣೆ ಕೂಡ ನೀಡ್ತೀವಿ ಅಂತ ಭರವಸೆ ನೀಡಿದ್ದಾರೆ. ಆದ್ರೆ ಸೇನಾ ವಿಮಾನಗಳ ಕಾರ್ಯಾಚರಣೆ ಆಗಸ್ಟ್ 31ರ ನಂತರ ಇರೋದಿಲ್ಲ ಅಂತ ಜರ್ಮನಿ ಸ್ಪಷ್ಟಪಡಿಸಿದೆ.)
Contact Us for Advertisement