masthmagaa.com:
ತೈವಾನ್ ಚೀನಾ ನಡುವಿನ ಸಂಘರ್ಷ ಯುದ್ಧದ ರೂಪ ಪಡೆದುಕೊಳ್ಳುತ್ತಾ ಅನ್ನೋ ಆತಂಕ ಮನೆಮಾಡಿದೆ. ಯಾಕಂದ್ರೆ ಈ ವರ್ಷ ತೈವಾನ್ ವಿಚಾರದಲ್ಲಿ ಚೀನಾ ತುಂಬಾ ಆಕ್ರಮಣಕಾರಿಯಾಗಿ ವರ್ತಿಸ್ತಾ ಇದೆ. 1949ರಲ್ಲಿ ಚೀನಾ ನಾಗರಿಕ ಯುದ್ಧದ ವೇಳೆ ತೈವಾನ್ ಪ್ರತ್ಯೇಕವಾದಾಗಿನಿಂದ ಈವರೆಗೂ ಚೀನಾದಿಂದ ಅತಿಕ್ರಮಣದ ಭೀತಿಯಲ್ಲೇ ಬದುಕ್ತಾ ಇದೆ. ಕಳೆದ ವರ್ಷ 380 ಬಾರಿ ಯುದ್ಧ ವಿಮಾನಗಳು ತೈವಾನ್ ವಾಯುಗಡಿಯನ್ನು ಉಲ್ಲಂಘಿಸಿದ್ರೆ, ಈ ಸಲ ಅಕ್ಟೋಬರ್ 22ರವರೆಗೆ 692 ಬಾರಿ ವಾಯುಗಡಿ ಉಲ್ಲಂಘನೆಯಾಗಿದೆ ಅಂತ ತೈವಾನ್ ತಿಳಿಸಿದೆ. ಅದ್ರಲ್ಲೂ ಇತ್ತೀಚೆಗಂತೂ ಚೀನೀ ಪೈಲಟ್ ಒಬ್ಬ ತೈವಾನೀಸ್ ಏರ್ ಟ್ರಾಫಿಕ್ ಕಂಟ್ರೋಲರ್ನ ತಾಯಿಗೆಲ್ಲಾ ಅಪಮಾನ ಮಾಡಿ ನಿಂದಿಸಿದ್ದಾನೆ. ಅಂದ್ರೆ ಪ್ರಚೋದಿಸಲು ಯತ್ನಿಸಿದ್ದಾನೆ. ಇದ್ರ ಕ್ಲಿಪ್ನ್ನು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಲಾಗಿದೆ.
ಈ ನಡುವೆ ತೈವಾನ್ನ ಸರ್ಕಾರಿ ನಿಯೋಗವೊಂದು ಯೂರೋಪ್ ಪ್ರವಾಸ ಕೈಗೊಂಡಿದೆ. ಯೂರೋಪಿಯನ್ ಒಕ್ಕೂಟದ ಮೂರು ಸದಸ್ಯ ದೇಶಗಳಿಗೆ ಪ್ರಯಾಣಿಸುತ್ತಿದ್ದು, ಚೀನಾಗೆ ಟಕ್ಕರ್ ಕೊಟ್ಟಿದೆ. ಯಾಂಕದ್ರೆ ಚೀನಾ ತೈವಾನ್ಗೆ ಮಾನ್ಯತೆನೇ ಕೊಡಲ್ಲ.. ತೈವಾನ್ ಬೇರೆ ದೇಶನೇ ಅಲ್ಲ. ಅದು ನಮ್ಮದೇ ದ್ವೀಪ ಅಂತ ಹೇಳ್ಕೊಂಡು ಬಂದಿದೆ. ಹೀಗಾಗಿ ತೈವಾನ್ ಸ್ವತಂತ್ರ ದೇಶದಂತೆ ವರ್ತಿಸಿದಾಗಲೆಲ್ಲಾ ಚೀನಾ ಉರ್ಕೊಳ್ತಿರುತ್ತೆ. ಸದ್ಯ 66 ಮಂದಿ ಸದಸ್ಯರಿರೋ ತೈವಾನ್ನ ನಿಯೋಗ ಸ್ಲೋವಾಕಿಯಾಗೆ ಹೋಗಿದ್ದು, ಅಲ್ಲಿಂದ ಜೆಕ್ ರಿಪಬ್ಲಿಕ್ ಮತ್ತು ಲಿಥುವೇನಿಯಾಗೂ ಭೇಟಿ ನೀಡಲಿದೆ. ಈ ಮೂರು ದೇಶಗಳು ತೈವಾನ್ಗೆ ಕೊರೋನಾ ಲಸಿಕೆ ನೀಡಲಿವೆ ಅಂತ ಕೂಡ ವರದಿಯಾಗಿದೆ. ಅಂದಹಾಗೆ ತೈವಾನ್ಗೆ ಬೇರೆ ದೇಶಗಳು ಲಸಿಕೆ ನೀಡದಂತೆ ತಡೆಯುತ್ತಲೇ ಬಂದಿದೆ ಚೀನಾ.
ಇನ್ನು ಅಮೆರಿಕ ಕೂಡ ತೈವಾನ್ ಪರವಾಗಿಯೇ ಇದೆ. ಚೀನಾ ಮತ್ತು ತೈವಾನ್ ನಡುವೆ ಹೆಚ್ಚುತ್ತಿರುವ ಸಂಘರ್ಷದ ಬಗ್ಗೆ ಪ್ರತಿಕ್ರಿಯಿಸಿರೋ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್, ಒಂದ್ವೇಳೆ ಚೀನಾ ತೈವಾನ್ ಮೇಲೆ ಆಕ್ರಮಣ ಮಾಡಿದ್ರೆ ತೈವಾನ್ ರಕ್ಷಣೆಗೆ ನಾವು ಬದ್ಧರಾಗಿದ್ದೀವಿ ಅಂತ ಹೇಳಿದ್ದಾರೆ.
-masthmagaa.com
Contact Us for Advertisement