masthmagaa.com:
ರಷ್ಯಾ ಇತ್ತೀಚೆಗಷ್ಟೇ ಮಿಲಿಟರಿ ಉಪಗ್ರಹವೊಂದನ್ನು ಉಡಾವಣೆ ಮಾಡಿ, ಯಶಸ್ವಿಯಾಗಿದೆ ಅಂತ ಹೇಳಿಕೊಂಡಿತ್ತು. ಆದ್ರೀಗ ಈ ಉಪಗ್ರಹ ಉಡಾವಣೆಯಲ್ಲಿ ಎಡವಟ್ಟಾಗಿದ್ದು, ಮುಂದಿನ ಕೆಲವೇ ವಾರಗಳಲ್ಲಿ ಆ ಉಪಗ್ರಹ ಮತ್ತು ರಾಕೆಟ್ ಭೂಮಿಗೆ ಬಂದು ಅಪ್ಪಳಿಸಲಿದೆ ಅಂತ ತಜ್ಞರು ಎಚ್ಚರಿಸಿದ್ದಾರೆ. ಇದು ಹೊಸ ತಲೆಮಾರಿನ ಬೇಹುಗಾರಿಕಾ ಉಪಗ್ರಹವಾಗಿದ್ದು, ಸೋಮವಾರ ರಾಕೆಟ್ ಅಂಗಾರ ಎ-5 ಮೂಲಕ ರಷ್ಯಾ ಬಾಹ್ಯಾಕಾಶಕ್ಕೆ ಕಳುಹಿಸಿತ್ತು. ಇದ್ರ ತೂಕ ಸುಮಾರು 20 ಟನ್ನಷ್ಟಿದ್ದು, ಭೂಮಿಗೆ ಅಪ್ಪಳಿಸಿದ್ರೆ ದೊಡ್ಡ ಅಪಾಯ ಎದುರಾಗಬಹುದು ಅನ್ನೋದು ತಜ್ಞರ ಅಭಿಪ್ರಾಯ. ರಷ್ಯಾದ ಗೂಢಾಚಾರಿ ಉಪಗ್ರಹಗಳು, ಶಸ್ತ್ರಾಸ್ತ್ರ ಮತ್ತು ನೇವಿಗೇಷನ್ಗೆ ಅಗತ್ಯವಾದ ಉಪಗ್ರಹಗಳನ್ನು ಬಾಹ್ಯಾಕಾಶಕ್ಕೆ ಕಳುಹಿಸಲು ಅಂಗಾರಾ ಎ-5 ರಾಕೆಟ್ ತುಂಬಾ ಮುಖ್ಯವಾಗಿದೆ. ಇದೇ ಭಾರಿ ಗಾತ್ರದ ರಾಕೆಟ್ ಮೂಲಕ ಚಂದ್ರಯಾನ ಕೈಗೊಳ್ಳುವ ಕನಸನ್ನು ಸಾಕಾರಗೊಳಿಸೋ ಬಗ್ಗೆ ರಷ್ಯಾ ಪ್ಲಾನ್ ಮಾಡ್ತಿದೆ. ಆದ್ರೆ ಈ ರಾಕೆಟ್ ಈಗ ಉಪಗ್ರಹವನ್ನು ಕಕ್ಷೆಗೆ ಸೇರಿಸುವಲ್ಲಿ ವಿಫಲವಾಗಿದೆ. ಹೀಗಾಗಿ ವಾಪಸ್ ಭೂಮಿಗೆ ಬಂದಪ್ಪಳಿಸೋ ಅಪಾಯ ಎದುರಾಗಿದೆ. ಆದ್ರೆ ಈ ಬಗ್ಗೆ ರಷ್ಯಾ ಕಡೆಯಿಂದ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ಇತ್ತೀಚೆಗೆ ಚೀನಾದ ಲಾಂಗ್ಮಾರ್ಚ್ ರಾಕೆಟ್ ಕೂಡ ಇದೇ ರೀತಿಯಾಗಿತ್ತು. 21 ಟನ್ ತೂಕ ಇದ್ದ ರಾಕೆಟ್ ನಿಯಂತ್ರಣ ಕಳ್ಕೊಂಡಿತ್ತು. ಆದ್ರೆ ಪುಣ್ಯಕ್ಕೆ ಅದು ಬಂದು ಸಮುದ್ರಕ್ಕೆ ಅಪ್ಪಳಿಸಿತ್ತು. ಯಾರಿಗೂ ಯಾವುದೇ ಹಾನಿಯಾಗಿರಲಿಲ್ಲ.. ಇದೀಗ ಅದೇ ರೀತಿಯ ಮತ್ತೊಂದು ಅಪಾಯ ಎದುರಾಗಿದೆ.
-masthmagaa.com
Contact Us for Advertisement