masthmagaa.com:
ಇಸ್ರೇಲ್ ಮೂಲದ ಎನ್ಎಸ್ಒ ಗ್ರೂಪ್ ಅಭಿವೃದ್ಧಿಪಡಿಸಿ, ಮಾರಾಟ ಮಾಡ್ತಿರೋ ಪೆಗಸಸ್ ಅನ್ನೋ ಹ್ಯಾಕಿಂಗ್ ಸಾಫ್ಟ್ವೇರ್ ಬಳಸಿಕೊಂಡು ಜಗತ್ತಿನಾದ್ಯಂತ ಸಾವಿರಾರು ಪತ್ರಕರ್ತರು, ವಕೀಲರು, ರಾಜಕೀಯ ನಾಯಕರು, ಸರ್ಕಾರದ ಸಚಿವರು, ಮಾನವ ಹಕ್ಕುಗಳ ಹೋರಾಟಗಾರರು, ಅರಬ್ ರಾಯಲ್ ಫ್ಯಾಮಿಲಿ ಸದಸ್ಯರ ಫೋನ್ಗಳನ್ನ ಹ್ಯಾಕ್ ಮಾಡಲಾಗಿದೆ ಅನ್ನೋ ಗಂಭೀರ ಆರೋಪ ಕೇಳಿಬಂದಿದೆ. ಭಾರತ ಸೇರಿದಂತೆ ಜಗತ್ತಿನ 50ಕ್ಕೂ ಹೆಚ್ಚು ದೇಶಗಳ 600 ರಾಜಕಾರಣಿಗಳು, 189 ಪತ್ರಕರ್ತರು, 85 ಮಾನವ ಹಕ್ಕು ಹೋರಾಟಗಾರರು, 65 ಉದ್ಯಮಿಗಳು, ಸರ್ಕಾರಿ ಅಧಿಕಾರಿಗಳ ಫೋನ್ಗಳನ್ನ ಹ್ಯಾಕ್ ಮಾಡಿ ಅವರ ಮೇಲೆ ಕದ್ದುಮುಚ್ಚಿ ನಿಗಾ ಇಡಲಾಗಿತ್ತು ಅನ್ನೋದು ಗೊತ್ತಾಗಿದೆ. ಅಂದ್ಹಾಗೆ ಹ್ಯಾಕ್ ಆಗಿರಬಹುದಾದ 50,000 ಜನರ ಫೋನ್ ನಂಬರ್ಗಳ ಡೇಟಾಬೇಸ್ವೊಂದು ಪ್ಯಾರಿಸ್ನ ಫಾರ್ಬಿಡನ್ ಸ್ಟೋರಿಸ್ ಅನ್ನೋ ಎನ್ಜಿಒ ಮತ್ತು ಅಮ್ನೆಸ್ಟಿ ಇಂಟರ್ನ್ಯಾಷನಲ್ ಅನ್ನೋ ಮಾನವ ಹಕ್ಕುಗಳ ಸಂಸ್ಥೆಗೆ ಸಿಕ್ಕಿದೆ. ಅದನ್ನ ಅವರು ವಾಷಿಂಗ್ಟನ್ ಪೋಸ್ಟ್, ದಿ ಗಾರ್ಡಿಯನ್, ದಿ ವೈರ್ನಂತಹ 17 ಅಂತಾರಾಷ್ಟ್ರೀಯ ಮಾಧ್ಯಮ ಸಂಸ್ಥೆಗಳ ಜೊತೆ ಹಂಚಿಕೊಂಡಿದ್ದಾರೆ. ಈ ಸಂಸ್ಥೆಗಳು, ಡೇಟಾಬೇಸ್ನಲ್ಲಿದ್ದ 50 ಸಾವಿರ ಜನರ ಪೈಕಿ 67 ಪತ್ರಕರ್ತರ ಫೋನ್ಗಳನ್ನ ಫಾರೆನ್ಸಿಕ್ ಅನಾಲಿಸಿಸ್ಗೆ ಒಳಪಡಿಸಿದ್ದಾರೆ. ಈ ವೇಳೆ 23 ಫೋನ್ಗಳು ಹ್ಯಾಕ್ ಆಗಿರೋದು ಗೊತ್ತಾಗಿದೆ. 14 ಫೋನ್ಗಳನ್ನ ಹ್ಯಾಕ್ ಮಾಡಲು ಪ್ರಯತ್ನ ನಡೆದಿರೋದು ಕಂಡುಬಂದಿದೆ. 50 ಸಾವಿರ ಜನ ಪಟ್ಟಿಯಲ್ಲಿ ಭಾರತದ 40 ಪತ್ರಕರ್ತರು, ಮೂವರು ವಿರೋಧ ಪಕ್ಷದ ನಾಯಕರು, ಕೇಂದ್ರ ಸರ್ಕಾರದ ಇಬ್ಬರು ಸಚಿವರು, ಸುಪ್ರೀಂಕೋರ್ಟ್ ಜಡ್ಜ್, ಧಾರ್ಮಿಕ ನಾಯಕರು ಸೇರಿದಂತೆ 300ಕ್ಕೂ ಹೆಚ್ಚು ಭಾರತೀಯರು ಇದ್ದಾರೆ ಅಂತ ಹೇಳಲಾಗ್ತಿದೆ. ಇದರಲ್ಲಿ ದಿ ವೈರ್ ಸಂಸ್ಥೆಯ ಫೌಂಡಿಂಗ್ ಎಡಿಟರ್ಗಳಾದ ಸಿದ್ಧಾರ್ಥ್ ವರದರಾಜನ್ ಮತ್ತು ಎಂ.ಕೆ. ವೇಣು, ಎಕನಾಮಿಕ್ ಅಂಡ್ ಪೊಲಿಟಿಕಲ್ ವೀಕ್ಲಿಯ ಮಾಜಿ ಸಂಪಾದಕ ಪರಂಜೋಯ್ ಗುಹಾ ಥಾಕುರ್ತಾ, ಇಂಡಿಯನ್ ಎಕ್ಸ್ಪ್ರೆಸ್ನ ಮಾಜಿ ಪತ್ರಕರ್ತ ಸುಶಾಂತ್ ಸಿಂಗ್, ಔಟ್ಲುಕ್ನ ಮಾಜಿ ಪತ್ರಕರ್ತ ಎಸ್.ಎನ್.ಎಂ. ಅಬ್ದಿ ಮುಂತಾದವರ ಫೋನ್ ನಂಬರ್ ಇದೆ ಅಂತ ಹೇಳಲಾಗ್ತಿದೆ. ಆದ್ರೆ ವಿರೋಧ ಪಕ್ಷದ ನಾಯಕರು ಯಾರು, ಹಾಲಿ ಸಚಿವರು ಯಾರು ಅನ್ನೋದು ಇನ್ನೂ ಬಹಿರಂಗವಾಗಿಲ್ಲ. 2018ರಲ್ಲಿ ಟರ್ಕಿಯ ಸೌದಿ ರಾಯಭಾರ ಕಚೇರಿಯಲ್ಲಿ ಹತ್ಯೆಯಾದ ಸೌದಿ ಪತ್ರಕರ್ತ ಜಮಾಲ್ ಖಷೋಗಿ ಸಂಪರ್ಕದಲ್ಲಿದ್ದ ಇಬ್ಬರು ಮಹಿಳೆಯರ ಫೋನ್ಗಳನ್ನ ಹ್ಯಾಕ್ ಮಾಡಲು ಕೂಡ ಈ ಪೆಗಾಸಸ್ ಸ್ಪೈವೇರ್ ಸಾಫ್ಟ್ವೇರ್ ಬಳಸಲಾಗಿತ್ತು ಅಂತ ಹೇಳಲಾಗ್ತಿದೆ. ಲಿಸ್ಟ್ನಲ್ಲಿರೋ ಎಲ್ಲಾ 50 ಸಾವಿರ ಜನರ ಮೊಬೈಲ್ಗೂ ಪೆಗಸಸ್ ಸೀಕ್ರೆಟ್ ಆಗಿ ಇನ್ಸ್ಟಾಲ್ ಆಗಿದೆ ಅಂತಲ್ಲ. ಕೆಲವರದ್ದು ಹ್ಯಾಕ್ ಆಗಿರಬಹುದು, ಇನ್ನೂ ಕೆಲವರದ್ದು ಹ್ಯಾಕ್ ಆಗೋ ಲಿಸ್ಟ್ನಲ್ಲಿರಬಹುದು ಅಂತ ದಿ ಗಾರ್ಡಿಯನ್ ವರದಿ ಮಾಡಿದೆ.
ಏನಿದು ಪೆಗಸಸ್?
ಪೆಗಸಸ್ ಅನ್ನೋದು ಸ್ಪೈವೇರ್ ಸಾಫ್ಟ್ವೇರ್ ಆಗಿದೆ. ಇದನ್ನ ಇಸ್ರೇಲ್ನ ಎನ್ಎಸ್ಒ ಗ್ರೂಪ್ ಅಭಿವೃದ್ಧಿಪಡಿಸಿದೆ. ಅಪರಾಧಿಗಳು ಮತ್ತು ಉಗ್ರರ ಫೋನ್ಗಳನ್ನ ಹ್ಯಾಕ್ ಮಾಡಿ ಅವರ ಚಲನವಲನಗಳ ಮೇಲೆ ನಿಗಾ ಇಡಲು ಈ ಸಾಫ್ಟ್ವೇರ್ ಬಳಸಲಾಗುತ್ತೆ. ವಿವಿಧ ದೇಶಗಳ ಸರ್ಕಾರ ಮತ್ತು ಸರ್ಕಾರದ ಏಜೆನ್ಸಿಗಳು ಎನ್ಎಸ್ಒ ಗ್ರೂಪ್ನಿಂದ ಈ ಸಾಫ್ಟ್ವೇರ್ ಅನ್ನ ಪರ್ಚೇಸ್ ಮಾಡ್ತವೆ. ಬಳಿಕ ಯಾರನ್ನ ಟಾರ್ಗೆಟ್ ಮಾಡಬೇಕು ಅಂದುಕೊಂಡಿರ್ತಾರೋ ಅವರ ಮೊಬೈಲ್ನಲ್ಲಿ ಸೀಕ್ರೆಟ್ ಆಗಿ ಇನ್ಸ್ಟಾಲ್ ಮಾಡಲಾಗುತ್ತೆ. ಇದರ ಬಗ್ಗೆ ಮೊಬೈಲ್ ಬಳಕೆದಾರರಿಗೆ ಗೊತ್ತೇ ಇರಲ್ಲ. ನಂತ್ರ ತನ್ನ ಕೆಲಸ ಶುರುಮಾಡೋ ಈ ಪೆಗಸಸ್, ಮೊಬೈಲ್ನಲ್ಲಿರೋ ಫೋಟೋ, ಮೆಸೇಜ್, ಇ-ಮೇಲ್ಗಳನ್ನ ಕದಿಯುತ್ತೆ. ಫೋನ್ ಕಾಲ್ಗಳನ್ನ ರೆಕಾರ್ಡ್ ಮಾಡುತ್ತೆ. ಮೊಬೈಲ್ನಲ್ಲಿನ ಮೈಕ್ರೋಫೋನ್ ಅನ್ನ ರಹಸ್ಯವಾಗಿ ಆ್ಯಕ್ಟಿವ್ ಮಾಡುತ್ತೆ. ಇದರಿಂದ ಆಯಾ ದೇಶಗಳ ಗುಪ್ತಚರ ಸಂಸ್ಥೆಗಳು ಅಥವಾ ಭದ್ರತಾಪಡೆಗಳಿಗೆ ಉಗ್ರರ ವಿರುದ್ಧ, ಅಪರಾಧಿಗಳ ವಿರುದ್ಧ ಕೆಲಸ ಮಾಡೋದು ಈಸಿ ಆಗುತ್ತೆ ಅನ್ನೋದು ಈ ಪೆಗಸಸ್ ಸಾಫ್ಟ್ವೇರ್ನ ಕಾನ್ಸೆಪ್ಟ್. ಆದ್ರೀಗ ಇದೇ ಸಾಫ್ಟ್ವೇರ್ನಿಂದ ಪತ್ರಕರ್ತರು, ರಾಜಕಾರಣಿಗಳು, ಮಾನವ ಹಕ್ಕು ಹೋರಾಟಗಾರರ ಫೋನ್ಗಳನ್ನ ಹ್ಯಾಕ್ ಮಾಡಲಾಗಿದೆ, ಮಾಹಿತಿಯನ್ನ ಕದಿಯಲಾಗಿದೆ ಅನ್ನೋ ಗಂಭೀರ ಆರೋಪ ಕೇಳಿಬಂದಿದೆ. ಇಷ್ಟುದೊಡ್ಡ ಆರೋಪ ಕೇಳಿ ಬಂದ ಬೆನ್ನಲ್ಲೇ ಎನ್ಎಸ್ಒ ಕಂಪನಿ ತನ್ನ ವೆಬ್ಸೈಟ್ನಲ್ಲಿ ಹೇಳಿಕೆಯೊಂದನ್ನ ಬಿಡುಗಡೆ ಮಾಡಿದ್ದು, ಎಲ್ಲಾ ಆರೋಪಗಳನ್ನ ತಳ್ಳಿಹಾಕಿದೆ. ಜೊತೆಗೆ ಫಾರ್ಬಿಡನ್ ಸ್ಟೋರಿಸ್ ಜೊತೆ ಸೇರಿಕೊಂಡು 17 ಅಂತಾರಾಷ್ಟ್ರೀಯ ಮಾಧ್ಯಮ ಸಂಸ್ಥೆಗಳು ನಡೆಸಿದ ತನಿಖೆ ಕಟ್ಟುಕಥೆಗಳಿಂದ ಕೂಡಿದೆ ಅಂತ ಹೇಳಿದೆ. ಆದ್ರೆ ಈ ಸಾಫ್ಟ್ವೇರ್ನಿಂದ ಮಾನವ ಹಕ್ಕುಗಳ ರಕ್ಷಣೆಗೆ ಯಾವುದೇ ಧಕ್ಕೆ ಇಲ್ಲ ಅನ್ನೋದು ಸಾಬೀತು ಆಗೋವರೆಗೂ ಪೆಗಸಸ್ನ ಮೇಲೆ ಮೋರಟೋರಿಯಂ ಹೇರಬೇಕು. ಅದರ ಎಕ್ಸ್ಪೋರ್ಟ್, ಸೇಲ್, ಟ್ರಾನ್ಸ್ಫರ್ ಮತ್ತು ಅದರ ಬಳಕೆಯನ್ನ ಸ್ಥಗಿತಗೊಳಿಸಬೇಕು ಅಂತ ಅಮ್ನೆಸ್ಟಿ ಇಂಟರ್ನ್ಯಾಷನಲ್ ಆಗ್ರಹಿಸಿದೆ.
-masthmagaa.com
Contact Us for Advertisement