masthmagaa.com:
ಅಮೆರಿಕ: ತುಂಬಾ ಟೈಮಿಂದ ಸದ್ದು ಮಾಡ್ತಿದ್ದ ಯುಎಫ್ಒ ಅಂದ್ರೆ ಅನ್ಐಡೆಂಟಿಫೈಡ್ ಫ್ಲೈಯಿಂಗ್ ಆಬ್ಜೆಕ್ಟ್ಗಳ ಕುರಿತ ಅಮೆರಿಕ ಗುಪ್ತಚರ ವರದಿ ಬಹಿರಂಗವಾಗಿದೆ. 2004ರಿಂದ 2021ರವರಗೆ ಅಮೆರಿಕದಲ್ಲಿ ಸುಮಾರು 144 ಯುಎಫ್ಒ ಘಟನೆಗಳು ವರದಿಯಾಗಿದ್ವು. ಅಮೆರಿಕದ ಸೇನಾ ನೆಲೆಗಳ ಮೇಲೆ, ತರಬೇತಿ ಕೇಂದ್ರಗಳ ಮೇಲೆಲ್ಲಾ ಅಪರೂಪದ ಹಾರುವ ವಸ್ತುಗಳು ಪತ್ತೆಯಾಗಿದ್ವು. ಈ ಸಂಬಂಧ ಈಗ ಗುಪ್ತಚರ ಇಲಾಖೆಯ ಅನ್ಐಡೆಂಟಿಫೈಡ್ ಏರಿಯಲ್ ಫೆನೋಮೆನಾ ಹೆಸರಿನ 9 ಪುಟಗಳ ವರದಿಯನ್ನು ಬಹಿರಂಗಪಡಿಸಲಾಗಿದ್ದು, ಅದ್ರಲ್ಲಿ ಯುಎಫ್ಒಗಳು ಬಾಹ್ಯಾಕಾಶದಿಂದ ಬಂದಿದ್ದು ಅನ್ನೋದಕ್ಕೆ ಯಾವುದೇ ಸಾಕ್ಷ್ಯಾಧಾರಗಳಿಲ್ಲ ಅಂತ ಹೇಳಲಾಗಿದೆ.
ಆದ್ರೆ ಇದ್ರಲ್ಲಿ ಸಾಕ್ಷ್ಯಗಳಿಲ್ಲ ಅಂತ ಹೇಳಲಾಗಿದೆಯೇ ಹೊರತು ಅವುಗಳು ಏಲಿಯನ್ಸ್ಗಳ ನೌಕೆ ಅಲ್ಲ ಅನ್ನೋದನ್ನ ಸ್ಪಷ್ಟವಾಗಿ ನಿರಾಕರಿಸಿಲ್ಲ. 144 ಯುಎಫ್ಒಗಳ ಪೈಕಿ 143ರ ಕುರಿತ ಮಾಹಿತಿ ಅಸ್ಪಷ್ಟವಾಗಿದ್ದು, ಒಂದನ್ನು ಬಲೂನ್ ಎಂದು ಗುರುತಿಸಲಾಗಿದೆ. ಇವುಗಳ ಪೈಕಿ 18 ಘಟನೆಗಳಲ್ಲಿ ಯುಎಫ್ಒಗಳು ತೀವ್ರತೆಯ ಗಾಳಿಯಲ್ಲಿ ಸ್ಥಿರವಾಗಿ ಚಲಿಸಿರೋದು ಮತ್ತು ಯಾವುದೇ ಬಲಪ್ರಯೋಗವಿಲ್ಲದೇ ಇಲ್ಲದೇ ವೇಗವಾಗಿ ಸಾಗುತ್ತಿರೋದು ಕಂಡು ಜನ ಆಶ್ಚರ್ಯಚಕಿತರಾಗಿದ್ರು. ಹೀಗಾಗಿ ಈ ಘಟನೆಗಳನ್ನು ಕೂಡ ವಿವಿಧ ಆಯಾಮಗಳಲ್ಲಿ ಪರೀಕ್ಷಿಸಲಾಯ್ತು ಅಂತ ಕೂಡ ವರದಿಯಲ್ಲಿ ಹೇಳಲಾಗಿದೆ.
ಇನ್ನು 144 ಘಟನೆಗಳ ಪೈಕಿ ಹಲವು ನೈಸರ್ಗಿಕ ಮತ್ತು ಮಾನವ ನಿರ್ಮಿತ ವಸ್ತುಗಳೂ ಆಗಿರಬಹುದು ಅಂತ ಅಂದಾಜು ಮಾಡಲಾಗಿದೆ. ಅಂದ್ರೆ ಹಕ್ಕಿಗಳೋ, ಡ್ರೋನ್ಗಳೋ ರಡಾರ್ ಸಂಪಕಕ್ಕೆ ಬಂದಿರಬಹುದು. ಅಥವಾ ವಾಯುಮಂಡಲದ ವಿದ್ಯಮಾನ ಅಂದ್ರೆ ಐಸ್ ಕ್ರಿಸ್ಟಲ್ಗಳಿರಬಹುದು ಅಂತ ಹೇಳಿದೆ. ಈ ಘಟನೆಗಳ ಪೈಕಿ ಮತ್ತೊಂದಷ್ಟು ಅಮೆರಿಕದ ರಕ್ಷಣಾ ಇಲಾಖೆಯ ಪ್ರಯೋಗದ ಭಾಗವಾಗಿರಬಹುದು. ಅಥವಾ ರಷ್ಯಾ ಮತ್ತು ಚೀನಾದಿಂದ ತಯಾರಿಸಲ್ಪಟ್ಟ ಮುಂದುವರಿದ ತಂತ್ರಜ್ಞಾನವೂ ಇರಬಹುದು ಅಂತ ಕೂಡ ವರದಿಯಲ್ಲಿ ಅಭಿಪ್ರಾಯಪಡಲಾಗಿದೆ.
ಇನ್ನು ಕೆಲವು ಘಟನೆಗಳಲ್ಲಿ ಕಂಡು ಬಂದ ಯುಎಫ್ಒಗಳು ಏನು ಅಂತ ತಿಳಿಯೋಕೆ ಮತ್ತಷ್ಟು ಮುಂದುವರಿದ ತಂತ್ರಜ್ಞಾನ ಬೇಕು. ಒಂದೇ ಮಾತಲ್ಲಿ ಅವುಗಳು ಏನು ಅಂತ ಹೇಳೋಕೆ ಸಾಧ್ಯವಿಲ್ಲ ಎಂದಿರೋ ಗುಪ್ತಚರ ಸಂಸ್ಥೆ ಇವುಗಳನ್ನು ಗುರುತಿಸಲಾಗದ ವೈಮಾನಿಕ ವಿದ್ಯಮಾನಗಳು ಅಂತ ಹೇಳಿದೆ.
ಅಂದಹಾಗೆ ಹೆಚ್ಚುತ್ತಿರುವ ಯುಎಫ್ಒ ಘಟನೆಗಳ ಕುರಿತು ಸಮಗ್ರ ವರದಿ ನೀಡುವಂತೆ ಪೆಂಟಗಾನ್ ಒಂದು ಟಾಸ್ಕ್ ಫೋರ್ಸ್ ರಚಿಸಿತ್ತು. ಕಳೆದ ವರ್ಷ ಪೆಂಟಗಾನ್ನಿಂದ ರಿಲೀಸ್ ಆಗಿದ್ದ ವಿಡಿಯೋವೊಂದು ಫುಲ್ ಸಂಚಲನ ಮೂಡಿಸಿತ್ತು. ನೌಕಾಪಡೆಯ ಯೋಧರು ಪ್ರಶಾಂತ ಮಹಾಸಾಗರದಲ್ಲಿ ಆ ವಿಡಿಯೋ ರೆಕಾರ್ಡ್ ಮಾಡಿದ್ರು. ಅದ್ರಲ್ಲಿ ಆಕಾಶದಲ್ಲಿ ವಿಚಿತ್ರವಾದ ವಸ್ತುಗಳು ತೇಲುತ್ತಿರೋದು ಪತ್ತೆಯಾಗಿತ್ತು. ಅವುಗಳು ನಮ್ಮನ್ನು ಫಾಲೋ ಮಾಡ್ತಿದ್ವು. ಆ ವಾಹನದಲ್ಲಿ ಯಾವುದೇ ಹೊಗೆ ಕೂಡ ಬರ್ತಾ ಇರಲಿಲ್ಲ. ಪದೇ ಪದೇ ತಮ್ಮ ಲೊಕೇಶನ್ ಚೇಂಜ್ ಮಾಡ್ತಿದ್ವು ಅಂತ ನಿವೃತ್ತ ನಾಕಾಪಡೆ ಯೋಧರು ಸಂದರ್ಶನದಲ್ಲಿ ಹೇಳಿಕೊಂಡಿದ್ರು.
-masthmagaa.com
Contact Us for Advertisement