masthmagaa.com:
ಇಡೀ ವಿಶ್ವದ ದೊಡ್ಡಣ್ಣನಾಗ್ತೀನಿ ಅಂತ ಬಾಯಿ ಕಳ್ಕೊಂಡು ಕೂತಿರೋ ಚೀನಾಗೆ ಭಾರತ ತಕ್ಕ ತಿರುಗೇಟು ಕೊಟ್ಟಿದೆ. ಭಾರತದ ಬಹುತೇಕ ವ್ಯಾಪಾರ ಹಿಂದೂ ಮಹಾಸಾಗರದ ಮೂಲಕವೇ ನಡೆಯುತ್ತೆ. ದಕ್ಷಿಣ ಚೀನಾ ಸಮುದ್ರ ನಂದೇ ಅಂತ ಹೇಳಿಕೊಳ್ಳೋ ಚೀನಾ, ಹಿಂದೂ ಮಹಾಸಾಗರದಲ್ಲೂ ಕಂಟ್ರೋಲ್ಗೆ ಏನೇನ್ ಬೇಕೋ ಎಲ್ಲವನ್ನೂ ಮಾಡ್ತಾ ಇದೆ. ಹೀಗಾಗಿ ಭಾರತ ಕೂಡ ಒಂದು ಮಹತ್ವದ ಹೆಜ್ಜೆ ಇಟ್ಟಿದೆ. ಹಿಂದೂ ಮಹಾಸಾಗರದಲ್ಲಿರೋ ಮಾರಿಷಸ್ನ ದ್ವೀಪವಾದ ಅಗಾಲೆಗಾದಲ್ಲಿ ಒಂದು ನೌಕಾನೆಲೆ ನಿರ್ಮಾಣ ಮಾಡ್ತಿದೆ. ಜನ ಕಡಿಮೆ ಇರುವ, ತುಂಬಾ ಚಿಕ್ಕದಾದ ದ್ವೀಪ ಇದಾಗಿದೆ. 630 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ನೌಕಾನೆಲೆಗೆ ಭಾರತ ಮುಂದಾಗಿದ್ದು, ಇಲ್ಲಿಗೆ 8 ಯುದ್ಧ ನೌಕೆಗಳನ್ನು ಕಳುಹಿಸಲಿದೆ ಅಂತ ವರದಿಯಾಗಿದೆ. ಇದ್ರ ಸುತ್ತಮುತ್ತಲಿನ ದ್ವೀಪಗಳಲ್ಲಿ ಅಮೆರಿಕ, ಫ್ರಾನ್ಸ್, ಚೀನಾದ ದ್ವೀಪಗಳು ಕೂಡ ಇವೆ. ಈಗ ಭಾರತ ನೌಕಾನೆಲೆ ನಿರ್ಮಿಸುತ್ತಿರುವ ಅಗಲೆಗಾ ದ್ವೀಪ ಮಾರಿಷಸ್ ಮುಖ್ಯ ದ್ವೀಪದಿಂದ 1100 ಕಿಲೋಮೀಟರ್ ದೂರದಲ್ಲಿದೆ. 12 ಕಿಲೋಮೀಟರ್ ಉದ್ದ ಮತ್ತು ಒಂದೂವರೆ ಕಿಲೋಮೀಟರ್ ಅಗಲದ ಈ ದ್ವೀಪದಲ್ಲಿ ಹೆಚ್ಚು ಕಡ್ಮೆ 300 ಮನೆಗಳಿವೆ. ಇಲ್ಲಿ 3 ಕಿಲೋಮೀಟರ್ ಉದ್ದದ ರನ್ ವೇ ನಿರ್ಮಿಸಲಾಗಿದೆ. ಸಮುದ್ರದ ಮೇಲೆ ಆಗಸದಲ್ಲಿ ಗಸ್ತು ತಿರುಗೋ ಯುದ್ಧ ವಿಮಾನಗಳು ಇಲ್ಲಿ ಲ್ಯಾಂಡ್ ಆಗಲು ಬಳಸಿಕೊಳ್ತಿದೆ. ಇಲ್ಲಿ ಭಾರತದ ಗುಪ್ತಚರ ವ್ಯವಸ್ಥೆ ಕೂಡ ಇದೆ. ಇದ್ರ ಮೂಲಕ ನೈರುತ್ಯ ಹಿಂದೂ ಮಹಾಸಾಗರ ಮತ್ತು ಮೊಜಾಂಬಿಕ್ ಚಾನಲ್ನಲ್ಲಿ ಭಾರತ ತನ್ನ ವಾಯು ಮತ್ತು ನೌಕಾಪಡೆಯ ಉಪಸ್ಥಿತಿಯನ್ನು ಸಾಧಿಸುತ್ತೆ. 2015ರಲ್ಲಿ ಪ್ರಧಾನಿ ಮೋದಿ ಮಾರಿಷಸ್ಗೆ ಹೋಗಿದ್ದಾಗ ಹಲವು ಒಪ್ಪಂದಗಳು ಏರ್ಪಟ್ಟಿದ್ವು. ಇದ್ರಲ್ಲಿ ಅಗಲೇಗಾ ಮಹಾದ್ವೀಪದ ಅಭಿವೃದ್ಧಿ ವಿಚಾರವೂ ಸೇರಿತ್ತು. ಆದ್ರೆ ಈ ಬಗ್ಗೆ ಪ್ರತಿಕ್ರಿಯಿಸಿರೋ ಮಾರಿಷಸ್, ನಮ್ಮ ಮತ್ತು ಭಾರತದ ನಡುವೆ ಆ ರೀತಿಯ ಯಾವುದೇ ಒಪ್ಪಂದ ನಡೆದಿಲ್ಲ. ಅಗಲೇಗಾ ದ್ವೀಪದಲ್ಲಿ ಆ ರೀತಿಯ ಯಾವುದೇ ನೌಕಾ ಅಥವಾ ವಾಯುನೆಲೆ ನಿರ್ಮಾಣವಾಗ್ತಿಲ್ಲ ಅಂತ ಹೇಳಿದೆ. ಆದ್ರೆ ಉಪಗ್ರಹ ಚಿತ್ರದಲ್ಲಿ ಅಗಲೇಗಾ ದ್ವೀಪದಲ್ಲಾಗ್ತಿರೋ ಬೆಳವಣಿಗೆಗಳು ಸ್ಪಷ್ಟವಾಗಿ ಗೊತ್ತಾಗ್ತಿದೆ.
-masthmagaa.com
Contact Us for Advertisement