masthmagaa.com:
ಇದೀಗ ವ್ಯಕ್ತಿಯೊಬ್ಬರು ನಿರಂತರವಾಗಿ 10 ತಿಂಗಳ ಕಾಲ ಕೊರೋನಾದಿಂದ ಬಳಲಿರೋ ಪ್ರಕರಣ ಬೆಳಕಿಗೆ ಬಂದಿದೆ. ಪಶ್ಚಿಮ ಇಂಗ್ಲೆಂಡ್ನ ಬ್ರಿಸ್ಟಲ್ನಲ್ಲಿರೋ 72 ವರ್ಷದ ಡೇವ್ ಸ್ಮಿತ್ಗೆ ಕಳೆದ 10 ತಿಂಗಳಲ್ಲಿ 46 ಬಾರಿ ಕೊರೋನಾ ಪಾಸಿಟಿವ್ ಬಂದಿದ್ದು, 7 ಬಾರಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರೋ ಅವರು, ನಾನು ಬದುಕೋದೇ ಇಲ್ಲ ಅಂತ ಭಾವಿಸಿದ್ದೆ. ನನ್ನ ಕೆಲಸಕ್ಕೆ ರಾಜೀನಾಮೆ ನೀಡಿ, ಕುಟುಂಬಸ್ಥರನ್ನು ಕರೆಸಿ, ಎಲ್ಲರೊಂದಿಗಿನ ವಿವಾದ ಬಗೆಹರಿಸಿಕೊಂಡು ಗುಡ್ ಬೈ ಕೂಡ ಹೇಳಿಯಾಗಿತ್ತು ಅಂತ ಹೇಳಿದ್ದಾರೆ. ಪತ್ನಿ ಲಿಂಡಾ ಕೂಡ ಡೇವ್ ಸ್ಮಿತ್ ಜೊತೆಗೇ ಕ್ವಾರಂಟೈನ್ಗೆ ಒಳಗಾಗಿದ್ರು. ಆ ಕ್ಷಣಗಳನ್ನು ನೆನೆದ ಲಿಂಡಾ ಕೂಡ, ಹಲವು ಬಾರಿ ಡೇವ್ ಸ್ಮಿತ್ ಈ ಕೊರೋನಾ ಗೆದ್ದು ಬರ್ತಾರೆ ಅಂತ ನಾವು ಭಾವಿಸಿಯೇ ಇರಲಿಲ್ಲ. ಹತ್ತತ್ರ ಒಂದು ವರ್ಷದ ಈ ಸಮಯ ನಮ್ಮ ಪಾಲಿಗೆ ನರಕವಾಗಿತ್ತು ಅಂತ ಹೇಳಿದ್ದಾರೆ. ಇನ್ನು ಬ್ರಿಸ್ಟಲ್ ಯುನಿವರ್ಸಿಟಿಯ ಇನ್ಫೆಕ್ಶಿಯಸ್ ಡಿಸೀಸ್ ಕನ್ಸಲ್ಟೆಂಟ್ ಆಗಿರೋ ಎಡ್ ಮೊರಾನ್ ಮಾತನಾಡಿ, ಈ 10 ತಿಂಗಳ ಅವಧಿಯಲ್ಲಿ ನಿರಂತರವಾಗಿ ಡೇವ್ ಸ್ಮಿತ್ ತನ್ನ ದೇಹದಲ್ಲಿ ಜೀವಂತ ಕೊರೋನಾ ವೈರಾಣುವನ್ನು ಹೊಂದಿದ್ದರು ಅಂತ ಹೇಳಿದ್ಧಾರೆ. ಅಂದ್ರೆ ಈ ಅವಧಿಯಲ್ಲಿ ಕೊರೋನಾ ವೈರಾಣು ಡೇವ್ ಸ್ಮಿತ್ ಅವರ ದೇಹದಲ್ಲಿ ನಿರಂತರವಾಗಿ ಹಾವಳಿ ಇಡುತ್ತಲೇ ಇತ್ತು. ನಂತರ ಕಾಕ್ಟೇಲ್ ಆಫ್ ಸಿಂಥೆಟಿಕ್ ಆ್ಯಂಟಿಬಾಡೀಸ್ ಟ್ರೀಟ್ಮೆಂಟ್ ನೀಡಲಾಯ್ತು. ಇದಾದ 45 ದಿನಗಳ ಬಳಿಕ ಡೇವ್ ಸ್ಮಿತ್ಗೆ ಮತ್ತೆ ಟೆಸ್ಟ್ ಮಾಡಿಸಿದಾಗ ಮೊದಲ ಬಾರಿಗೆ ನೆಗೆಟಿವ್ ರಿಪೋರ್ಟ್ ಬಂತು. ಅಂದ್ರೆ ಕೊರೋನಾ ಬಂದ 305 ದಿನಗಳ ಬಳಿಕ ಇದೇ ಮೊದಲ ಬಾರಿಗೆ ಟೆಸ್ಟ್ನಲ್ಲಿ ನೆಗೆಟಿವ್ ರಿಪೋರ್ಟ್ ಬಂದಿತ್ತು. ಅಂದಹಾಗೆ ಈ ಕಾಕ್ಟೇಲ್ ಆಫ್ ಸಿಂಥೆಟಿಕ್ ಆ್ಯಂಟಿಬಾಡೀಸ್ ಅನ್ನೋ ಟ್ರೀಟ್ಮೆಂಟ್ನ್ನು ಅಮೆರಿಕದ ಬಯೋಟೆಕ್ ಸಂಸ್ಥೆ ರೀಜೆನೆರಾನ್ ಅಭಿವೃದ್ಧಿಪಡಿಸಿದೆ. ಆದ್ರೆ ಇದರ ಬಳಕೆಗೆ ಯುನೈಟೆಡ್ ಕಿಂಗ್ಡಮ್ನಲ್ಲಿ ಅನುಮತಿ ಇಲ್ಲ. ಆದ್ರೂ ಕೂಡ ದೀರ್ಘಕಾಲದಿಂದ ಕೊರೋನಾದಿಂದ ಬಳಲುತ್ತಿದ್ದ ಡೇವ್ ಸ್ಮಿತ್ಗೆ ಸಹಾನುಭೂತಿಯ ಆಧಾರದ ಮೇಲೆ ಚಿಕಿತ್ಸೆ ನೀಡಲಾಗಿತ್ತು. ಇದ್ರಿಂದ ನನ್ನ ಜೀವವನ್ನು ನನಗೆ ವಾಪಸ್ ಕೊಟ್ಟಂಗೆ ಆಯ್ತು ಅಂತ ಡೇವ್ ಸ್ಮಿತ್ ಹೇಳಿದ್ದಾರೆ.
-masthmagaa.com
Contact Us for Advertisement