masthmagaa.com:
ಅಮೆರಿಕದ ಫೈಝರ್ (Pfizer) ಮತ್ತು ‘ಬಯೋಎನ್ಟೆಕ್’ (BioNTech) ಅಭಿವೃದ್ಧಿಪಡಿಸಿರುವ ಲಸಿಕೆ 90%ನಷ್ಟು ಪರಿಣಾಮಕಾರಿಯಾಗಿದೆ ಅಂತ ಇತ್ತೀಚೆಗೆ ಘೋಷಣೆ ಮಾಡಿದ ಬೆನ್ನಲ್ಲೇ ಇದೀಗ ರಷ್ಯಾದ ‘ಸ್ಪುಟ್ನಿಕ್ V’ ಲಸಿಕೆ 92%ನಷ್ಟು ಪರಿಣಾಮಕಾರಿಯಾಗಿದೆ ಅಂತ ಕಂಪನಿ ಘೋಷಿಸಿದೆ. ಅಂದ್ರೆ ರಷ್ಯಾ ಲಸಿಕೆಯು ಕೊರೋನಾ ತಗುಲುವುದರಿಂದ 92% ರಕ್ಷಣೆ ನೀಡುತ್ತದೆ ಅನ್ನೋದು ಮಾನವ ಪ್ರಯೋಗದ ವೇಳೆ ಗೊತ್ತಾಗಿದೆ ಅಂತ RDIF (Russian Direct Investment Fund) ಹೇಳಿದೆ. ‘ಸ್ಪುಟ್ನಿಕ್-V’ ಲಸಿಕೆಯ ಎರಡೂ ಡೋಸ್ಗಳನ್ನ ಪಡೆದ ಮೊದಲ 16,000 ಸ್ವಯಂಸೇವಕರಿಂದ ಬಂದಂತಹ ಫಲಿತಾಂಶದಲ್ಲಿ ಇದು ಬೆಳಕಿಗೆ ಬಂದಿದೆ. ಈ ಲಸಿಕೆಯನ್ನ ಗಮಲೇ ಇನ್ಸ್ಟಿಟ್ಯೂಟ್ ಮತ್ತು RDIF ಸೇರಿಕೊಂಡು ಅಭಿವೃದ್ಧಿಪಡಿಸಿವೆ.
ಸಾಮಾನ್ಯವಾಗಿ ಲಸಿಕೆಯ ಮಾನವ ಪ್ರಯೋಗ ನಡೆಸುವಾಗ ಅರ್ಧದಷ್ಟು ಸ್ವಯಂಸೇವಕರಿಗೆ ಅಸಲಿ ಲಸಿಕೆ ನೀಡಿದ್ರೆ, ಇನ್ನರ್ಧದಷ್ಟು ಸ್ವಯಂಸೇವಕರಿಗೆ ಪ್ಲಸಿಬೊ ಅಥವಾ ಡೂಪ್ಲಿಕೇಟ್ ಲಸಿಕೆ ನೀಡಲಾಗುತ್ತದೆ. ಇದೀಗ ಲಸಿಕೆಯ ಮಾನವ ಪ್ರಯೋಗಕ್ಕೆ ಒಳಗಾದ 16,000 ಸ್ವಯಂಸೇವಕರಿಗೆ ‘ಸ್ಪುಟ್ನಿಕ್-V’ ಲಸಿಕೆ ಕೊರೋನಾ ವೈರಾಣುವಿನಿಂದ ಶೇ.92ರಷ್ಟು ರಕ್ಷಣೆ ನೀಡಿರೋದು ಆರಂಭಿಕ ಹಂತದಲ್ಲಿ ಗೊತ್ತಾಗಿದೆ ಅಂತ ಕಂಪನಿ ಘೋಷಿಸಿದೆ.
ಅಂದ್ಹಾಗೆ ಈ ಲಸಿಕೆಯ 3ನೇ ಮತ್ತು ಕೊನೇ ಹಂತದ ಮಾನವ ಪ್ರಯೋಗ ಮುಕ್ತಾಯಗೊಳ್ಳುವ ಮೊದಲೇ ರಷ್ಯಾ ಸರ್ಕಾರ ಲಸಿಕೆಗೆ ಅನುಮೋದನೆ ನೀಡಿತ್ತು. ಹೀಗಾಗಿ ರಷ್ಯಾ ಲಸಿಕೆಯ ಸುರಕ್ಷತೆ ಬಗ್ಗೆ ಸಾಕಷ್ಟು ದೇಶಗಳು ಅನುಮಾನ ವ್ಯಕ್ತಪಡಿಸಿದ್ದವು. ಇದೀಗ ನಮ್ಮ ಲಸಿಕೆ ಕೊರೋನಾದಿಂದ 92%ನಷ್ಟು ರಕ್ಷಣೆ ನೀಡಲಿದೆ ಅಂತ ರಷ್ಯಾ ಘೋಷಿಸಿರೋದು ಸಾಕಷ್ಟು ಕುತೂಹಲ ಕೆರಳಿಸಿದೆ. ಸದ್ಯ ರಷ್ಯಾ ರಾಜಧಾನಿ ಮಾಸ್ಕೋದ 29 ಕ್ಲಿನಿಕ್ಗಳಲ್ಲಿ ಸುಮಾರು 40,000 ಸ್ವಯಂಸೇವಕರ ಮೇಲೆ ‘ಸ್ಪುಟ್ನಿಕ್-V’ ಲಸಿಕೆಯ ಮೂರನೇ ಹಂತದ ಮಾನವ ಪ್ರಯೋಗ ನಡೆಯುತ್ತಿದೆ.
-masthmagaa.com
Contact Us for Advertisement