masthmagaa.com:
ಕೊರೋನಾ ವೈರಸ್ ಹುಟ್ಟಿ, ಇಡೀ ಜಗತ್ತಿಗೆ ಹರಡಿದ್ದು ಚೀನಾದಿಂದ ಅನ್ನೋದು ಎಲ್ಲರಿಗೂ ಗೊತ್ತಿರೋ ವಿಚಾರ. ಆದ್ರೆ ಈ ಡೆಡ್ಲಿ ವೈರಾಣುವನ್ನು ವುಹಾನ್ ಲ್ಯಾಬ್ನಲ್ಲಿ ಸೃಷ್ಟಿಸಿ ಸೋರಿಕೆ ಮಾಡಲಾಗಿದೆ ಅನ್ನೋ ಆರೋಪ ಚೀನಾ ಮೇಲಿದೆ. ಇದೇ ವಿಚಾರಕ್ಕೆ ಅಮೆರಿಕ-ಚೀನಾ ನಡುವಿನ ಸಂಬಂಧ ಮತ್ತಷ್ಟು ಹಾಳಾಗಿದೆ. ಆದ್ರೆ ಚೀನಾ ಮಾತ್ರ ಈ ಎಲ್ಲಾ ಆರೋಪಗಳನ್ನು ತಳ್ಳಿ ಹಾಕಿದೆ.
ಇದರ ನಡುವೆಯೇ ಮಾತನಾಡಿರೋ ವುಹಾನ್ನಲ್ಲಿರೋ ವೈರಾಲಜಿ ಲ್ಯಾಬ್ನ ನಿರ್ದೇಶಕಿ ವಾಂಗ್ ಯಾನ್ಯಿ, ಈ ಪ್ರಯೋಗಾಲಯದಲ್ಲಿ ಬಾವಲಿ ಕೊರೋನಾ ವೈರಸ್ನ 3 ಜೀವಂತ ಸ್ಟ್ರೈನ್ ಬಗ್ಗೆ ಸಂಶೋಧನೆ ನಡೆಸುತ್ತಿದ್ದೆವು. ಆದ್ರೆ ಅದ್ರಲ್ಲಿ ಯಾವುದೂ ಕೂಡ ಕೋವಿಡ್-19ಗೆ ಕಾರಣವಾದ ಸ್ಟ್ರೈನ್ಗೆ ಹೋಲಿಕೆಯಾಗುತ್ತಿರಲಿಲ್ಲ ಅಂತ ಹೇಳಿದ್ದಾರೆ. ಈ ಮೂಲಕ ವುಹಾನ್ ಲ್ಯಾಬ್ನಿಂದ ಕೊರೋನಾ ವೈರಸ್ ಹರಡಿದ್ದಲ್ಲ ಅಂತ ಹೇಳಿದ್ದಾರೆ.
ಪ್ರಯೋಗಾಲಯದಿಂದಲೇ ವೈರಾಣು ಸೋರಿಕೆಯಾಗಿದೆ ಅನ್ನೋ ಡೊನಾಲ್ಡ್ ಟ್ರಂಪ್ ಹಾಗೂ ಇತರರು ಮಾಡುತ್ತಿರುವ ಆರೋಪಗಳು ‘ಶುದ್ಧ ಕಟ್ಟುಕಥೆ’. ನಮ್ಮ ಸಂಸ್ಥೆ ಕಳೆದ ಡಿಸೆಂಬರ್ 30ರಂದು ಅಪರಿಚಿತ ನ್ಯುಮೋನಿಯಾದ ಕ್ಲಿನಿಕಲ್ ಮಾದರಿಯೊಂದನ್ನು ಸ್ವೀಕರಿಸಿತ್ತು. ಅದಕ್ಕೂ ಮೊದಲು ನಮಗೆ ಯಾವುದೇ ಮಾಹಿತಿ ಇರಲಿಲ್ಲ ಅಥವಾ ಈ ವೈರಸ್ ಅನ್ನು ನೋಡಿರಲಿಲ್ಲ.. ಸಂಶೋಧಿಸಿಲ್ಲ ಅಥವಾ ಇಟ್ಟುಕೊಂಡಿರಲಿಲ್ಲ. ವಾಸ್ತವದಲ್ಲಿ ವೈರಸ್ ಇದೆ ಅನ್ನೋದು ಎಲ್ಲರಂತೆ ನಮಗೂ ತಿಳಿದಿರಲಿಲ್ಲ. ನಮ್ಮ ಬಳಿ ವೈರಾಣು ಇಲ್ಲದಿದ್ದಾಗ ಅದು ಸೋರಿಕೆಯಾಗಲು ಹೆಗೆ ಸಾಧ್ಯ? ಅಂತ ಹೇಳಿದ್ದಾರೆ.