masthmagaa.com:
ಕೊರೋನಾ ವೈರಸ್ಗೆ ಆಕ್ಸ್ಫರ್ಡ್ ಯುನಿವರ್ಸಿಟಿ ಮತ್ತು ಅಸ್ಟ್ರಝೆನೆಕಾ ಕಂಪನಿ ಅಭಿವೃದ್ಧಿಪಡಿಸಿರುವ ಲಸಿಕೆ ಸಾಕಷ್ಟು ಭರವಸೆ ಹುಟ್ಟಿಸಿರುವ ನಡುವೆ ಮತ್ತೊಂದು ಲಸಿಕೆಯ 3ನೇ ಹಂತದ ಮಾನವ ಪ್ರಯೋಗ ಸದ್ದಿಲ್ಲದೆ ಆರಂಭವಾಗಿದೆ. ಚೀನಾ ಮೂಲದ ಖಾಸಗಿ ಸಂಸ್ಥೆ ಸಿನೊವ್ಯಾಕ್ ತಾನು ಅಭಿವೃದ್ಧಿಪಡಿಸಿರುವ ‘ಕೊರೋನಾವ್ಯಾಕ್’ ಲಸಿಕೆಯ 3ನೇ ಮತ್ತು ಕೊನೆಯ ಹಂತದ ಪ್ರಯೋಗವನ್ನು ಬ್ರೆಜಿಲ್ನಲ್ಲಿ ಆರಂಭಿಸಿದೆ.
ಕೊರೋನಾ ಹಾವಳಿಗೆ ತತ್ತರಿಸಿರುವ ಬ್ರೆಜಿಲ್ನಲ್ಲಿ ಸುಮಾರು 900 ಸ್ವಯಂಸೇವಕರಿಗೆ ಈ ಲಸಿಕೆಯ ಮೊದಲ ಡೋಸ್ ಅನ್ನು ನೀಡಲಾಗಿದೆ. ಸೋಂಕು ಹೆಚ್ಚಿರುವ 6 ರಾಜ್ಯಗಳ ಸ್ವಯಂಸೇವಕರು ಈ ಪ್ರಯೋಗದಲ್ಲಿ ಭಾಗವಹಿಸಿದ್ದಾರೆ. ಇದರಲ್ಲಿ ಹೆಚ್ಚಿನವರು ವೈದ್ಯರು ಮತ್ತು ವೈದ್ಯಕೀಯ ಸಿಬ್ಬಂದಿಯೇ ಇದ್ದಾರೆ. ಈ ಪ್ರಯೋಗದ ಆರಂಭಿಕ ಫಲಿತಾಂಶವು 90 ದಿನಗಳ ಒಳಗೆ ಬರಲಿದೆ ಅಂತ ಸರ್ಕಾರ ಹೇಳಿದೆ.
ಅಂದ್ಹಾಗೆ ಇಡೀ ಜಗತ್ತಿನಲ್ಲಿ ಮೂರು ಲಸಿಕೆಗಳು ಮಾತ್ರ ಕೊನೆಯ ಹಂತದ ಮಾನವ ಪ್ರಯೋಗ ನಡೆಸುತ್ತಿವೆ. ಮೊದಲನೇದು, ಆಕ್ಸ್ಫರ್ಡ್ ಯುನಿವರ್ಸಿಟಿ-ಅಸ್ಟ್ರಝೆನೆಕಾ ಅಭಿವೃದ್ಧಿಪಡಿಸಿರುವ ‘AZD1222’ ಲಸಿಕೆ. ಎರಡನೇದು, ಚೀನಾದ ಸಿನೋಫಾರ್ಮ್ ಸಿಎನ್ಬಿಜಿ ಅಭಿವೃದ್ಧಿಪಡಿಸಿರುವ ಲಸಿಕೆ. ಮೂರನೇದು, ಚೀನಾದ ಸಿನೊವ್ಯಾಕ್ ಬಯೋಟೆಕ್ ಅಭಿವೃದ್ಧಿಪಡಿಸಿರುವ ‘ಕೊರೋನಾವ್ಯಾಕ್’ ಲಸಿಕೆ.
ಆಕ್ಸ್ಫರ್ಡ್ ಯುನಿವರ್ಸಿಟಿ-ಅಸ್ಟ್ರಝೆನೆಕಾ ಅಭಿವೃದ್ಧಿಪಡಿಸಿರುವ ‘AZD1222’ ಲಸಿಕೆಯ 3ನೇ ಹಂತದ ಮಾನವ ಪ್ರಯೋಗ ವಿವಿಧ ದೇಶಗಳಲ್ಲಿ ನಡೀತಾ ಇದೆ. ಭಾರತದಲ್ಲೂ ಇದರ ಮಾನವ ಪ್ರಯೋಗ ಆರಂಭಿಸಲು ಸೆರಂ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಸಿದ್ಧತೆ ಮಾಡಿಕೊಂಡಿದೆ. ಇನ್ನು ಸಿನೋಫಾರ್ಮ್ ಸಿಎನ್ಬಿಜಿ ಅಭಿವೃದ್ಧಿಪಡಿಸಿರುವ ಲಸಿಕೆಯ ಪ್ರಯೋಗ ಇತ್ತೀಚೆಗಷ್ಟೇ ಯುನೈಟೆಡ್ ಅರಬ್ ಎಮಿರೇಟ್ಸ್ನಲ್ಲಿ ಆರಂಭವಾಗಿತ್ತು. ಇದೀಗ ಚೀನಾದ ಸಿನೊವ್ಯಾಕ್ ಬಯೋಟೆಕ್ ಅಭಿವೃದ್ಧಿಪಡಿಸಿರುವ ‘ಕೊರೋನಾವ್ಯಾಕ್’ ಲಸಿಕೆಯ ಪ್ರಯೋಗ ಬ್ರೆಜಿಲ್ನಲ್ಲಿ ಆರಂಭವಾಗಿದೆ.
-masthmagaa.com
Contact Us for Advertisement